လက်နက်ကိုင် အဖွဲ့အစည်း နှစ်ခုကြား အာဏာလု စစ်ပွဲ ဖြစ်ပွားနေရာ ဆူဒန်နိုင်ငံမှာ မိဘမဲ့ ဂေဟာတစ်ခုထဲ ပိတ်မိနေတဲ့ ကလေးတွေ စုစုပေါင်း ၆၀ ကျော်လောက် အသက်ဆုံးရှုံးခဲ့ရကြောင်း သိရပါတယ်။
ဆူဒန်နိုင်ငံရဲ့ မြို့တော် ခါတွမ်ဟာ နိုင်ငံရဲ့ စစ်တပ်နဲ့ အင်အားကြီး အရန်တပ်တွေကြား ပြင်းပြင်းထန်ထန် စစ်ခင်းတိုက်ခိုက်နေတဲ့ နေရာတစ်ခု ဖြစ်ပါတယ်။ ခါတွမ်မှာရှိတဲ့ မိဘမဲ့ ဂေဟာတစ်ခုမှာတော့ မွေးကင်းစ ကလေးတွေ၊ အခါလည်သားလေးတွေ အပါအဝင် ကလေးတွေ ဒါဇင်နဲ့ချီပြီး အစာရေစာ ငတ်ပြတ်တာနဲ့ ဖျားနာမှုတွေကြောင့် အသက်ဆုံးရှုံးကုန်ကြောင်း ဂေဟာ တာဝန်ရှိသူတွေက ပြောပါတယ်။
ပြီးခဲ့တဲ့ အပတ်ကဆိုရင် ၂ ရက်တည်းမှာတင် ကလေး ၂၆ ဦးထိ အစုလိုက် သေဆုံးကုန်တယ်လို့ နီးစပ်သူ တစ်ဦးက AFP သတင်းဌာနဆီ ပြောကြားခဲ့ပါတယ်။ သေဆုံးတဲ့ထဲမှာ ၃ လသားအရွယ် ကလေးတွေတောင် ပါဝင်ခဲ့ကြောင်း သေစာရင်း မိတ္တူတွေနဲ့ ဂေဟာဝန်ထမ်းတွေဆီက မှတ်ချက်တွေအရ သိရပါတယ်။
ဂေဟာထဲမှာ ရိုက်ကူးထားတဲ့ ဗီဒီယို တစ်ခုမှာတော့ ကလေးတွေရဲ့ ရုပ်အလောင်းတွေကို အဖြူရောင် ပိတ်စတွေနဲ့ ထုပ်ပိုးပြီး မြေမြှုပ် သင်္ဂြိုဟ်ဖို့ စိစဉ်နေတာကို တွေ့ရပါတယ်။
Public Service Announcement
စစ်ပွဲတွေကြောင့် ဂေဟာအတွက် လိုအပ်တဲ့ အထောက်အပံ့နဲ့ အစားအသောက် လမ်းကြောင်းတွေ လုံးဝ ပြတ်တောက်ကုန်သလို ကလေးတွေ တပြုံကြီးနဲ့ ရွှေ့ပြောင်းဖို့ကလည်း မဖြစ်နိုင်ကြောင်း၊ ဒါ့အပြင် ဝန်ထမ်း တော်တော်များများကလည်း ထွက်ပြေးကုန်လို့ အခြေအနေတွေက အရမ်း ရှုပ်ထွေး ခက်ခဲနေကြောင်း ဂေဟာမှာ စေတနာ့ဝန်ထမ်းအဖြစ် ကူညီပေးနေသူ အက်ဖ်ကာ အိုမာ မူစတာဖာက ပြောကြားခဲ့ပါတယ်။
တကယ်တော့ ဒီအခြေအနေမျိုးတွေ ကြုံလာမယ် ဆိုတာကို ခါတွမ်မှာ တိုက်ပွဲတွေ စတင်လာ ကတည်းက ရိပ်စားမိခဲ့ကြောင်းလည်း သူက ဝန်ခံပါတယ်။ အခုအခါ ခါတွမ်မှာ တိုက်ပွဲတွေ ဖြစ်နေတာ ၂ လနီးပါး ကြာမြင့်လာပြီး အပစ်အခတ် ရပ်စဲရေး ညှိနှိုင်းမှုတွေကလည်း မအောင်မြင်တော့တာကြောင့် အခြေအနေတွေက ဆက်လက် ဆိုးရွားနေဖွယ် ရှိတယ်လို့ လေ့လာသူတွေက သုံးသပ်ထားကြပါတယ်။
