မတ်-၁၀၊၂၀၂၆။People’s Spring
ထိုင်းနယ်စပ်မှာမြန်မာဖက်ခြမ်းက ကားတွေ၊ မော်တော်ဆိုင်ကယ်တွေကိုဆီမရောင်းတော့တဲ့ ဓာတ်ဆီဆိုင်တွေ ပိုများလာနေပါတယ်။
တက်ခ်ပြည်နယ်ထဲက ခရိုင်တွေမှာ မြန်မာလိုင်စင်နံပါတ်နဲ့ ယာဉ်တွေကို ဓာတ်ဆီနဲ့ ဒီဇယ် ရောင်းချပေးမှာ မဟုတ်ကြောင်း သတိပေးစာ ရေးသားထားတဲ့ ဆိုင်တွေက ပိုများလာနေတယ်လို့ ထိုင်းမီဒီယာတွေက ဖော်ပြခဲ့ပါတယ်။
ဒါတင်မကသေးဘဲ ထိုင်းလိုင်စင်နံပါတ်နဲ့ ကားတွေကိုလည်း ဘတ် ၁၀၀၀ ထက်ပိုပြီး ဆီရောင်းမပေးဘဲပမာဏကို ကန့်သတ်ထားလိုက်ပါတယ်။မြန်မာဖက်ခြမ်း၊ မြဝတီလို မြို့တွေကနေ နယ်စပ်ဖြတ်ကျော်ပြီး ထိုင်းမှာ ဆီလာဖြည့်တဲ့ ကားတွေ ပြီးခဲ့တဲ့ ရက်ပိုင်းမှာ တရိပ်ရိပ် တိုးလာတဲ့နောက် အခုလိုမျိုးထိုင်းလိုင်စင်နံပါတ်နဲ့ ယာဉ်တွေကိုပဲဆီရောင်းချပေးမယ် ဆိုတာမျိုး ကန့်သတ်မှုတွေကို ထိုင်းဆီဆိုင်တွေက စတင် ကျင့်သုံးလာတာ ဖြစ်ပါတယ်။
Public Service Announcement
အီရန်စစ်ပွဲကြောင့် ကမ္ဘာ့နိုင်ငံ အများအပြားမှာ လောင်စာဆီ ပြတ်လပ်မှုတွေ ဖြစ်ပေါ်လာနိုင်ခြေကို စိုးရိမ်နေပြီး ထိုင်း-မြန်မာနယ်စပ်မှာလည်း အဲဒီလို ရိုက်ခတ်မှုတွေရှိလာခဲ့ပါတယ်။မဲဆောက်၊ ဖော့ဖရား၊ အမ်ဖန်း၊ မဲရမတ်နဲ့ သာဆောင်ယန်း ခရိုင်တွေထဲက ဆီဆိုင်တချို့က မြန်မာလိုင်စင် နံပါတ်နဲ့ ယာဉ်တွေကို ဆီရောင်းချပေးတော့မှာ မဟုတ်ကြောင်း ကြေညာစာတွေ စတင်ကပ်ထားခဲ့ပြီး အဲဒီလို ဆိုင်အရေအတွက်က တစ်ရက်ပြီးတစ်ရက် တိုးလာနေပါတယ်။
ဆီဆိုင်တွေမှာတော့ မြန်မာ လိုင်စင်နံပါတ်နဲ့ ယာဉ်တွေကို ဆီရောင်းပေးမှာ မဟုတ်တဲ့အကြောင်း မြန်မာလိုရော၊ ထိုင်းလိုပါ သတိပေးစာတွေ ရေးပြီး ကပ်ထားတာကိုလည်း တွေ့ရပါတယ်။
ကိုးကား-Khaosod
ဓါတ်ပုံ- Khaosod
