သုံးရက်အတွင်း တရုတ် ကျားဖြန့်သမား ၆၅၀ နီးပါးထိ နယ်နှင်ခဲ့ကြောင်း ကမ္ဘောဒီးယားဆို

သုံးရက်အတွင်း တရုတ်နိုင်ငံသား ၆၅၀ နီးပါးကို နယ်နှင်ခဲ့ကြောင်း ကမ္ဘောဒီးယား အစိုးရက ထုတ်ပြန်ခဲ့ပါတယ်။

မေလ ၁၈ ရက်ကနေ ၂၀ ရက်နေ့အတွင်း စုစုပေါင်း တရုတ်နိုင်ငံသား ၆၄၈ ယောက်ကို နယ်နှင်ဒဏ်ခတ်ပြီး တရုတ်နိုင်ငံဆီ ပြန်ပို့ခဲ့တာလို့ မေလ ၂၁ ရက်နေ့မှာ ကမ္ဘောဒီးယား လူဝင်မှု ကြီးကြပ်ရေး ဌာနက ကြေညာခဲ့ပါတယ်။

နယ်နှင်ဒဏ် ခံရသူတွေ အားလုံးဟာ ကမ္ဘောဒီးယားမှာ တရားမဝင် အခြေချ နေထိုင်ပြီး အွန်လိုင်း ငွေကြေး လိမ်လည်မှု ကျားဖြန့်လုပ်ငန်း လုပ်ကိုင်နေသူတွေ ဖြစ်တယ်လို့ ကြေညာချက်မှာ ဖော်ပြထားပါတယ်။

နယ်နှင်ဒဏ် ခံရတဲ့ တရုတ်နိုင်ငံသားတွေကို တရုတ်နိုင်ငံဆီ ပြန်လည် လွှဲပြောင်းပေးရေး လုပ်ငန်းစဉ်ကို ဖနွမ်ပင်မြို့တော်မှာ ရှိနေတဲ့ တရုတ် သံရုံးကလည်း ပူးပေါင်း ကူညီခဲ့တယ်လို့ ဆိုပါတယ်။

Public Service Announcement

တရုတ် ၃၃၀ ကို တက်ချို လေဆိပ်ကနေ လေကြောင်းနဲ့ ပြန်ပို့လိုက်ပြီး နောက်ထပ် ၃၁၈ ဦးကိုတော့ ဆိုင်ယမ်ရိပ် အန်ကော် လေဆိပ်ကနေ နယ်နှင်ခဲ့တာလို့ သိရပါတယ်။

တရားမဝင် ငွေကြေးလိမ်လည်မှု လုပ်ငန်းတွေ ကမ္ဘောဒီးယားမှာ အခြေစိုက်ပြီး လည်ပတ်နေတာကို ထိထိရောက်ရောက် တိုက်ဖျက်ဖို့အတွက် အစိုးရ အာဏာပိုင် အဖွဲ့အစည်းတွေက အားသွန်ခွန်စိုက် ဆက်လက် ဆောင်ရွက်နေတယ်လို့လည်း လူဝင်မှု ကြီးကြပ်ရေးဌာနက ကြေညာခဲ့ပါတယ်။

ကမ္ဘောဒီးယားဟာ အရှေ့တောင်အာရှ ဒေသတွင်းမှာ ကျားဖြန့် လုပ်ငန်းတွေ အခြေစိုက်မှုကြောင့် နာမည်ဆိုး အထွက်ဆုံး နိုင်ငံတစ်ခု ဖြစ်ပါတယ်။

ကိုးကား: Khmer Times