အပစ်ရပ်ထားတဲ့ ကာလအတွင်း အစ္စရေးနဲ့ အီရန်ကြားမှာ အပြန်အလှန် တိုက်ခိုက်မှုတွေ ပထမဆုံးအကြိမ် ပြန်လည် ဖြစ်ပွားလာခဲ့ပါတယ်။
ဇွန်လ ၇ ရက်နေ့က အစ္စရေး မြောက်ပိုင်းကို အီရန်က ဒုံးကျည်တွေနဲ့ ပစ်ခတ်ခဲ့တဲ့ပြီး အဲဒီနောက်မှာတော့ အစ္စရေးကလည်း အီရန် အလယ်ပိုင်းနဲ့ အနောက်ပိုင်းက စစ်ရေး ပစ်မှတ်တွေကို လေကြောင်း တိုက်ခိုက်မှုတွေနဲ့ လက်တုံ့ပြန်ခဲ့ကြောင်း ကြေညာခဲ့ပါတယ်။
အစ္စရေးက လက်ဘနွန်နိုင်ငံ၊ ဘေရွတ်မြို့တော်မှာရှိတဲ့ အီရန် မဟာမိတ် ဟစ်ဇ်ဘိုလာ ပြောက်ကျားတွေ ရှိနေတဲ့ အဆောက်အအုံ နှစ်ခုကို လေကြောင်းကနေ တိုက်ခိုက်ခဲ့ပြီး နောက်တစ်နေ့မှာ အီရန်က အစ္စရေးကို ဒုံးကျည်တွေနဲ့ ပစ်ခတ်ခဲ့တာ ဖြစ်ပါတယ်။
အစ္စရေးစစ်တပ် (IDF)က အီရန်ကနေ ပစ်ခတ်လိုက်တဲ့ ဒုံးကျည် အားလုံးကို ကြားဖြတ် ဟန့်တားနိုင်ခဲ့ကြောင်း အီရန်ရဲ့ ရန်လိုမှုအတွက် ကျိန်းသေ လက်တုံ့ပြန်မယ်လို့ သတိပေးခဲ့ပါတယ်။
Public Service Announcement
အဲဒီနောက် အမေရိကန် သမ္မတ ဒေါ်နယ်လ်ထရမ့်က အီရန် အနေနဲ့ ရန်လိုမှုတွေ ဆက်မလုပ်ဘဲ ဆွေးနွေးပွဲ စားပွဲဝိုင်းဆီ ပြန်လာဖို့ သတိပေးခဲ့သလို မဟာမိတ်ဖြစ်တဲ့ အစ္စရေးကိုလည်း လက်စားချေ တုံ့ပြန်တာမျိုး မလုပ်ဖို့ တောင်းဆိုခဲ့ပါတယ်။ ဒါပေမဲ့လည်း သိပ်မကြာခင်မှာပဲ အီရန်ကို အစ္စရေးက တိုက်ခိုက်ခဲ့တာ ဖြစ်ပါတယ်။
အဲဒီဖြစ်စဉ်က လက်ရှိ အရှေ့အလယ်ပိုင်း စစ်မြေပြင်မှာ အမေရိကန်ရဲ့ ဩဇာသက်ရောက်နိုင်စွမ်းက အကန့်အသတ် ရှိလာနေပြီဆိုတာ မြင်သာစေကြောင်း စစ်ရေး သုတေသီတွေက သုံးသပ်ခဲ့ပါတယ်။ ထရမ့်ဟာ အီရန်စစ်ပွဲမှာ အမေရိကန် ပါဝင်တိုက်ခိုက်စေခဲ့တဲ့ ဆုံးဖြတ်ချက်ကြောင့် ပြည်တွင်းမှာ ဝေဖန်မှုတွေ၊ ဆန့်ကျင်မှုတွေ ကြုံနေရပြီး စစ်ပွဲကို အမြန်ဆုံး ရပ်စဲနိုင်ဖို့ အရေးတကြီး လိုအပ်လာနေပါတယ်။
အီရန်ရဲ့ ရန်စခဲ့တဲ့ လုပ်ရပ်ကြောင့် မြို့တော် တဟီရန်ဟာ လောင်တိုက်သွင်းတာ ခံရလိမ့်မယ်လို့ အစ္စရေး အမျိုးသား လုံခြုံရေးဝန်ကြီး အစ်တ်မာ ဘန်ဂီဗာက သတိပေးခဲ့ပြီး မကြာခင်မှာပဲ အစ္စရေးက အီရန်ကို တိုက်ခိုက်ခဲ့တာပါ။
ပထမဆုံး အနေနဲ့ အစ္စရေးဟာ တဟီရန်မှာရှိတဲ့ အင်မန် ခိုမေနီ အပြည်ပြည်ဆိုင်ရာ လေဆိပ်ဆီ နိုင်ငံတကာ အရပ်ဖက် လေယာဉ်တွေ ပျံသန်းမှုကို နောက်ထပ် ကြေညာချက် မထုတ်ပြန်မချင်း ရပ်နားထားဖို့ သတိပေးခဲ့ပါတယ်။ နောက်တော့ အီရန် အလယ်ပိုင်းနဲ့ အနောက်ပိုင်းမှာ ရှိနေတဲ့ အကြမ်းဖက် အစိုးရ စစ်ရေးပစ်မှတ်တွေကို အစ္စရေး လေတပ်က တိုက်ခိုက်ခဲ့တဲ့အကြောင်း IDFက Telegramမှာ ရေးသား ကြေညာခဲ့ပါတယ်။
အစ္စရေး အစိုးရ မီဒီယာတွေက တဟီရန်၊ တာဘရစ်ဇ်နဲ့ အစ္စဖာဟန်တို့မှာ ပေါက်ကွဲသံတွေ ဆက်တိုက် ကြားနေရကြောင်း အတည်ပြုခဲ့ပေမယ့် ထိခိုက်ပျက်စီးမှု အခြေအနေ အသေးစိတ်ကိုတော့ မထုတ်ပြန်သေးပါဘူး။ အီရန် ပြည်တွင်း မီဒီယာတွေရဲ့ အဆိုအရ အစ္စရေးရဲ့ လေကြောင်းတိုက်ခိုက်မှုတွေဟာ မြို့လယ်ခေါင် ပစ်မှတ်တွေကိုတော့ ရှောင်လွှဲခဲ့တယ်လို့ ယုံကြည်ရကြောင်း သိရပါတယ်။
အမေရိကန်နဲ့ အစ္စရေးတို့ ပူးပေါင်းပြီး ဖေဖော်ဝါရီ ၂၈ ရက်နေ့မှာ အီရန်ကို လေကြောင်းတိုက်ခိုက်မှုတွေ လုပ်ဆောင်ခဲ့ရာက စစ်ရေးပဋိပက္ခ စတင်ခဲ့ပါတယ်။ ဧပြီ ၈ ရက်မှာတော့ အပစ်ရပ် သဘောတူညီမှု ရရှိခဲ့ပြီး အဲဒီနောက်ပိုင်းတလျှောက် ဒါဟာ ပထမဆုံးအကြိမ် အီရန်နဲ့ အစ္စရေးကြား အပြန်အလှန် တိုက်ရိုက် တိုက်ခိုက်မှုတွေ ရှိလာခဲ့တာပါ။ ပြီးခဲ့တဲ့ ရက်ပိုင်းမှာလည်း အမေရိကန်နဲ့ အီရန်ကြား အကန့်အသတ်နဲ့ တိုက်ခိုက်မှုတွေ ဖြစ်ခဲ့ပေမယ့် အပစ်ရပ် သဘောတူညီမှုကိုတော့ နှစ်ဖက်စလုံးက ဆက်လက် ထိန်းသိမ်းထားခဲ့ပါတယ်။
ကိုးကား: BBC
