ကမ္ဘာ့ဖလား ဘောလုံးပြိုင်ပွဲဝင် အင်္ဂလန် ဘောလုံးအသင်းရဲ့ လေ့ကျင့်ရေး ကိရိယာတွေ ခိုးယူမှု ခံခဲ့ရကြောင်း သိရပါတယ်။
အမေရိကန်မှာ ကမ္ဘာ့ဖလား ယှဉ်ပြိုင်ဖို့အတွက် ဖလော်ရီဒါကနေ မစ္ဇူရီမှာရှိတဲ့ Swope Soccer Village လေ့ကျင့်ရေး စင်တာဆီ အကူးမှာ ဇွန်လ ၁၂ ရက်နေ့ ညပိုင်းမှာ ပစ္စည်းတွေ ပျောက်ကုန်တာ ဖြစ်ပါတယ်။ အင်္ဂလန် ဘောလုံးအဖွဲ့ချုပ် (FA)ကတော့ သယ်ယူပို့ဆောင်ရေး ယာဉ်ပေါ်ကနေ ပျောက်ဆုံးသွားတဲ့ ပစ္စည်းတွေ စာရင်းကို အမြန်ဆုံး စစ်ဆေးပြီး အစားထိုးနိုင်ဖို့ အပူတပြင်း စီစဉ်နေကြောင်း ဇွန်လ ၁၃ ရက်နေ့မှာ ပြောပါတယ်။
မန်နေဂျာ သောမတ်စ်တူဟဲလ် ဦးဆောင်တဲ့ အင်္ဂလန် အသင်းဟာ ဇွန်လ ၁၃ ရက်နေ့မှာ ကန်းဆက်စ် စီးတီးကို ရောက်လာမှာ ဖြစ်ပါတယ်။ နောက်တစ်နေ့မှာတော့ လေ့ကျင့်ခန်း အပြည့်ပြန်ဆင်းဖို့ စီစဉ်ထားတာကြောင့် ပျောက်ဆုံးပစ္စည်းတွေကို အစားထိုး ရှာဖွေဖို့ တာဝန်ရှိသူတွေက အပူတပြင်း ကြိုးစားနေရတာပါ။
ပျောက်ဆုံးသွားတဲ့ထဲမှာ လေ့ကျင့်ရေးသုံး ပစ္စည်းတွေ၊ ဘောလုံးတွေ၊ ဘောလုံးကန် ဖိနပ်တွေ ပါဝင်တယ်လို့ ယုံကြည်ရပါတယ်။ အခု ဖောက်ထွင်း ခိုးယူမှု ကိစ္စနဲ့ ပတ်သက်လို့ ဖလော်ရီဒါ ရဲတပ်ဖွဲ့ဟာ FAနဲ့ ချိတ်ဆက်ပြီး စုံစမ်းမှုတွေ လုပ်ဆောင်နေပါတယ်။
Public Service Announcement
အတည်မပြုနိုင်တဲ့ သတင်းတွေအရ အခိုးခံရလို့ အင်္ဂလန် အသင်းဆီမှာ ဘောလုံးတစ်လုံးပဲ ကျန်တော့ပြီး နာမည်ကြီး ကြယ်ပွင့်တွေဖြစ်တဲ့ ဟယ်ရီကိန်းနဲ့ ဂျုဒ်ဘယ်လင်ဂမ်တို့ရဲ့ ဖိနပ်တွေလည်း ပါသွားတယ်လို့ သိရပါတယ်။
ကမ္ဘာ့ဖလားအကြို၊ ဖလော်ရီဒါပြည်နယ်၊ မီယာမီမြို့မှာ အဆင်ပြေပြေ လေ့ကျင့်ခန်း ဆင်းနေခဲ့တဲ့ အင်္ဂလန် အသင်းအတွက်တော့ ဒါက ပြိုင်ပွဲနားကပ်မှ စိတ်အနှောင့်အယှက် ကြုံစရာ ကိစ္စ ဖြစ်လာပါတယ်။ အင်္ဂလန်ဟာ အုပ်စု(ဆ)မှာ ခရိုအေးရှား၊ ဂါနာ၊ ပနားမားတို့နဲ့အတူ ကျရောက်နေပြီး ဇွန်လ ၁၈ ရက်နေ့မှာ ခရိုအေးရှားနဲ့ စတင် ရင်ဆိုင် ကစားသွားမှာပါ။
ကိုးကား: BBC
