ကြိုတင် ကြေညာထားတဲ့အတိုင်း ကုလသမဂ္ဂ (UN) အထွေထွေ ညီလာခံ တက်ရောက်ရင်း အမေရိကန် သမ္မတ ဒေါ်နယ်လ်ထရမ့်ဟာ ဒိန်းမတ်၊ ဂရင်းလန် အစိုးရတွေနဲ့အတူ ဂရင်းလန် လုံခြုံရေး သဘောတူညီမှုကို လက်မှတ် ရေးထိုးခဲ့ပါတယ်။
စက်တင်ဘာ ၂၂ ရက်နေ့တုန်းက နယူးယောက်မှာ ထရမ့်ဟာ ဒိန်းမတ် ဝန်ကြီးချုပ် မက်တေး ဖရက်ဒရစ်ဆန်၊ ဂရင်းလန် ဝန်ကြီးချုပ် ယန်စ် ဖရက်ဒရစ်ခ် နီးလ်ဆန်တို့နဲ့ အဲဒီစာချုပ်ကို လက်မှတ်ရေးထိုးခဲ့တာ ဖြစ်ပါတယ်။ ဒါကြောင့် ဒိန်းမတ်ပိုင် ဂရင်းလန်ကျွန်းကို အမေရိကန် ပိုင်နက်အဖြစ် သွတ်သွင်းလိုကြောင်း ထရမ့်က ပြောဆိုထားလို့ ဒိန်းမတ်နဲ့ တင်းမာမှုတွေ ဖြစ်ပေါ်နေတဲ့ အခြေအနေက အဆုံးသတ်သွားပြီလို့ ဆိုနိုင်ပါတယ်။
ထရမ့်က အာတိတ်စက်ဝိုင်းနဲ့ ထိစပ်နေပြီး အစိတ်အပိုင်းအများစု ရေခဲဖုံးနေတဲ့ ကျွန်းကြီးကို ထိန်းချုပ်ဖို့ဟာ အမေရိကန်ရဲ့ မဟာဗျူဟာ အမျိုးသား အကျိုးစီးပွားအတွက် အထူးအရေးပါတာကြောင့် အဲဒီကျွန်းကို အမေရိကန် ပိုင်နက်အဖြစ် သိမ်းယူလိုကြောင်း ပြောကြားခဲ့ပါတယ်။ ပြီးတော့ အမေရိကန်က မထိန်းချုပ်ရင် နောင်တစ်ချိန်မှာ တရုတ်၊ ရုရှားတို့က ဂရင်းလန်ကို သိမ်းယူသွားနိုင်တယ်လို့ ထရမ့်က ပြောခဲ့ပါသေးတယ်။
ပြီးခဲ့တဲ့ သီတင်းပတ်မှာတော့ ဂရင်းလန်ရဲ့ လုံခြုံရေး အစီအမံ အဝဝကို အမေရိကန်က ထိန်းချုပ်ပိုင်ခွင့်မျိုး သဘောတူညီမှု ရရှိခဲ့ကြောင်း ထရမ့်က ကြေညာပြီး အခုတော့ UN ညီလာခံမှာ တရားဝင် လက်မှတ်ရေးထိုး အတည်ပြုခဲ့တာ ဖြစ်ပါတယ်။
Public Service Announcement
ဒီသဘောတူညီမှုဟာ အရှည်တည်တံ့ပြီး နှစ်ဖက်ကြားက ကောင်းမွန်လှတဲ့ ခင်မင်ရင်းနှီးမှုမျိုးကို ပေါ်လွင်စေလိမ့်မယ်လို့ ထရမ့်က ပြောပါတယ်။ နောက်ပြီး ဒီသဘောတူညီမှုကြောင့်ပဲ အမေရိကန်၊ ဥရောပနဲ့ အားလုံးရဲ့ လုံခြုံရေးအတွက် ထူးကဲတဲ့ အာမခံချက်မျိုး ပေးစွမ်းနိုင်မှာ ဖြစ်တယ်လို့ ထရမ့်က ဆိုပါတယ်။
စာမျက်နှာ ၁၀ မျက်နှာပါတဲ့ သဘောတူညီမှုအရ အမေရိကန်ဟာ ဂရင်းလန် အနောက်မြောက်ဖက် ကမ်းခြေမှာ ရှိရင်းစွဲ စစ်စခန်းအပြင် ကျွန်းရဲ့ တောင်ပိုင်းနဲ့ အရှေ့ပိုင်းတွေမှာပါ စစ်စခန်းတွေ ထပ်မံ ဆောက်လုပ်သွားမှာ ဖြစ်ပါတယ်။ တစ်ဖက်မှာတော့ ဂရင်းလန်ဟာ ဒိန်းမတ်ရဲ့ ပိုင်နက်နယ်မြေ ဖြစ်တယ် ဆိုတာကိုရော၊ ဂရင်းလန် အစိုးရရဲ့ ကိုယ်ပိုင် စီမံအုပ်ချုပ်ပိုင်ခွင့်ကိုပါ အမေရိကန်က ထပ်လောင်း အသိအမှတ် ပြုထားပါတယ်။
ထရမ့်ကတော့ အခု သဘောတူညီမှုကြောင့် အမေရိကန်ဟာ ဂရင်းလန်ကျွန်းရဲ့ လုံခြုံရေး ကဏ္ဍ တစ်ခုလုံးကို အပြီးတိုင် အပြည့်အဝ ထိန်းချုပ်ပိုင်ခွင့် ရလာကြောင်း ပြောကြားခဲ့ပါတယ်။
ဒိန်းမတ် ဝန်ကြီးချုပ် ဖရက်ဒရစ်ဆန်ကတော့ ဒီသဘောတူညီမှုကြောင့် ဒိန်းမတ်ရဲ့ ရပ်တည်မှု အခြေအနေဟာ အရင်ကထက် ပိုကောင်းမွန်သွားမှာ ဖြစ်တယ်လို့ ပြောပါတယ်။ အားလုံး သိတဲ့အတိုင်း လက်ရှိကာလဟာ ဘာကိုမှ ရေရေရာရာ မပြောနိုင်တဲ့ အခြေအနေမျိုးမှာ ဖြတ်သန်း နေထိုင်နေကြရတာ ဖြစ်တယ်လို့ သူက ဆိုပါတယ်။ ခက်ခဲတဲ့ ကာလမျိုးမှာ ဒီသဘောတူညီမှုကြောင့် ဂရင်းလန်က ပိုပြီး စိတ်အေးအေးချမ်းချမ်း နေထိုင်ခွင့် ရလာမယ်လို့ မျှော်လင့်ကြောင်းလည်း ဝန်ကြီးချုပ်က ဆိုပါတယ်။
သဘောတူညီမှု စာချုပ်အရ ဂရင်းလန်ရဲ့ မဟာဗျူဟာကျတဲ့ အပိုင်းတွေမှာ NATO စစ်မဟာမိတ် အဖွဲ့နဲ့ ဥရောပ သမဂ္ဂ (EU) အဖွဲ့ထဲမှာ ပါဝင်ခြင်း မရှိထားတဲ့ နိုင်ငံတွေ တပ်စွဲခွင့်ကို တားမြစ်ထားပါတယ်။ တစ်နည်းအားဖြင့် အမေရိကန်ရဲ့ အဓိက ပြိုင်ဘက်တွေဖြစ်တဲ့ တရုတ်နဲ့ ရုရှားတို့က ဂရင်းလန်မှာ ခြေကုပ်ယူလာနိုင်ခြေကို ကြိုတင် ဟန့်တားထားတဲ့ သဘောပါ။
EU အကြီးအကဲ အန်တိုနီယို ကော်စတာကလည်း အမေရိကန်နဲ့ ဒိန်းမတ်ကြားက သဘောတူညီမှုကို ကြိုဆိုခဲ့ပြီး အာတိတ်ဒေသ လုံခြုံရေး ကျယ်ပြန့်တဲ့ ပူးပေါင်း ဆောင်ရွက်မှုတွေအတွက် အပေါင်းလက္ခဏာဆန်တဲ့ ခြေလှမ်းတစ်ခုအဖြစ် ညွှန်းဆိုသွားခဲ့ပါတယ်။
လူဦးရေ ၅၇၀၀၀ လောက် နေထိုင်တဲ့ ဂရင်းလန်ဟာ နောင်တစ်ချိန် ဒိန်းမတ်ဆီကနေ ခွဲထွက်ပြီး သီးခြားလွတ်လပ်တဲ့ ကိုယ်ပိုင်နိုင်ငံ အနေနဲ့ ရပ်တည်ရင်တောင်မှ လက်ရှိ သဘောတူညီမှုက မပျောက်မပျက် ဆက်ပြီး အသက်ဝင်နေမယ်လို့လည်း သိရပါတယ်။
ကိုးကား: AP
