အတိုက်အခံ အင်အားစုတွေ အဓိက ခြေကုပ်ယူရာ ဒေသထဲက မြို့တော်ကို အီသီယိုးပီးယား ဖက်ဒရယ် အစိုးရတပ်တွေ စတင် ဝင်ရောက်နေပြီလို့ သိရပါတယ်။
ဒါကြောင့် အစိုးရကို တော်လှန်နေတဲ့ တိုက်ဂရေး ပြည်သူ့လွတ်မြောက်ရေးတပ် (TPLF)ဟာ တိုက်ဂရေး ပြည်နယ်ရဲ့ မြို့တော် မက်ကီလီကို စတင်စွန့်ခွာနေပြီလို့ ဒေသခံ လူသားချင်း စာနာထောက်ထားမှု ကူညီရေး အဖွဲ့အစည်းတွေက ပြောပါတယ်။
TPLFဟာ တိုက်ဂရေးမှာ အခြေပြုပြီး အီသီယိုးပီးယားမှာ အစိုးရ မဟုတ်တဲ့ လက်နက်ကိုင် တပ်တွေထဲမှာ အင်အားအကြီးဆုံး အဖွဲ့အစည်းတစ်ခု ဖြစ်ပါတယ်။ ပြီးတော့ အရင်ကလည်း အီသီယိုးပီးယား အစိုးရနဲ့ ပြည်တွင်းစစ်ပွဲကို နွှဲခဲ့ဖူးပါတယ်။
စက်တင်ဘာ ၂၃ ရက်နေ့က အီသီယိုးပီးယား မြောက်ပိုင်းမှာ တိုက်ပွဲတွေ ပြန်စလာခဲ့ပြီး TPLFဟာ တိုက်ဂရေးမှာသာ မကဘဲ အနီးတဝိုက် ပြည်နယ်တွေမှာပါ ထိုးစစ်တွေ ဆင်နွှဲခဲ့ပါတယ်။ စစ်ရေး ပဋိပက္ခတွေက ခပ်မြန်မြန် အရှိန်မြင့်တက်လာတဲ့နောက် ၂၀၂၀ ကနေ ၂၀၂၂ ခုနှစ်ထိ ဖြစ်ပွားခဲ့ပြီး ထိခိုက်ပျက်စီးမှုတွေ အရမ်းများပြားခဲ့တဲ့ ပြည်တွင်းစစ်မီး တကျော့ပြန် တောက်လောင်လာမှာကို ပြည်သူတွေက စိုးရိမ်နေပါတယ်။
Public Service Announcement
ပြီးခဲ့တဲ့ ရက်ပိုင်းမှာတော့ အစိုးရတပ်တွေနဲ့ မဟာမိတ် လက်နက်ကိုင် အဖွဲ့အစည်းတွေဟာ TPLFရဲ့ ထိုးစစ်တွေကို တွန်းလှန်ပြီး မက်ကီလီမြို့ တည်ရှိရာ မြောက်ဖက်ဆီ ရှေ့တိုး ချီတက်နေကြောင်း သိရပါတယ်။
ဖက်ဒရယ် အစိုးရ တပ်တွေနဲ့ မဟာမိတ်တွေကို အခုအခါ မက်ကီလီမြို့ နယ်နိမိတ်ထဲမှာ စပြီး တွေ့မြင်လာရပြီဖြစ်ကြောင်း ဒေသခံ လူမှုကယ်ဆယ်ရေး အဖွဲ့တစ်ခုရဲ့ တာဝန်ရှိသူ တစ်ဦးက ပြောပါတယ်။ မြို့ခံ ဂျာနယ်လစ် တစ်ဦးကလည်း အောက်တိုဘာ ၃ ရက်နေ့မှာ TPLF တပ်တွေနဲ့ ခေါင်းဆောင်ပိုင်းဟာ မက်ကီလီကို စတင် စွန့်ခွာသွားကြကြောင်း ပြောကြားခဲ့ပါတယ်။ TPLF ထိန်းချုပ်ထားခဲ့ရာ အစိုးရ အဆောက်အအုံတွေ၊ ရဲစခန်းတွေဟာ အစောင့်အကြပ် မရှိဘဲ ချန်ထားခံခဲ့ရပါတယ်။
တိုက်ပွဲတွေ စလာကတည်းက တိုက်ဂရေး ပြည်နယ်ထဲမှာ ဖုန်းနဲ့ အင်တာနက် ကွန်ရက်တွေ ဆိုးဆိုးရွားရွား ပြတ်တောက်တာ၊ နှေးကွေးတာတွေ ဖြစ်နေတာကြောင့် အသေးစိတ် အခြေအနေတွေကိုတော့ မသိရသေးပါဘူး။ မြို့ထဲမှာ လုံခြုံရေး အခြေအနေက အရမ်းဆိုးနေပြီး လုယက်မှုတွေ ဖြစ်လာမှာကိုလည်း ဒေသခံတွေက စိုးရိမ်နေပါတယ်။
တိုက်ဂရေးရဲ့ စစ်ဆင်ရေးတွေနဲ့ ပတ်သက်လို့ ဖက်ဒရယ် အစိုးရအဖွဲ့ ဝန်ကြီးချုပ် အဘီအာမက်ရော၊ TPLFဖက်ကပါ ဘာမှတ်ချက်မှ မပေးသေးပါဘူး။
TPLFဟာ တိုက်ဂရေး ဒေသမှာ အားအကောင်းဆုံး လက်နက်ကိုင် အင်အားစုဖြစ်ပြီး အခုနှစ်ဆန်းပိုင်းမှာတော့ အစိုးရက ခန့်အပ်ထားတဲ့ အုပ်ချုပ်မှု စနစ်ကို ဖျက်သိမ်းပစ်ခဲ့ပါတယ်။ ၂၀၂၀ ပြည့်နှစ်တုန်းကလည်း မက်ကီလီမြို့ကို အစိုးရ တပ်တွေက သိမ်းယူခဲ့ဖူးပြီး TPLFက ပြောက်ကျားစစ်ဆင်ရေးတွေနဲ့ တုံ့ပြန်ခဲ့ပါတယ်။ အခုတစ်ကြိမ်မှာလည်း အလားတူ လုပ်ဆောင်လာနိုင်ခြေ ရှိကြောင်း ခန့်မှန်းမှုတွေ ထွက်ပေါ်နေပါတယ်။
ကိုးကား: AFP
