ရေဘေးသင့်မြန်မာပြည်သူများကို ကူညီရန် အမေရိကန် က ဒေါ်လာ ၃သန်း ထပ်မံပေးအပ်

ထားအိ/People’s Spring

မြန်မာနိုင်ငံအတွင်းမှ တိုင်ဖွန်းယာဂိရေဘေးသင့်ပြည်သူများကို ကူညီရန် အမေရိကန်နိုင်ငံတကာဖွံ့ဖြိုးရေးအေဂျင်စီ USAID က ရန်ပုံငွေ ဒေါ်လာ ၃သန်း ပေးအပ်သွားမည်ဟု ရန်ကုန်မြို့အမေရိကန်သံရုံးက ကြေညာသည်။

အဆိုပါအကူအညီမှာ ရေဘေးသင့်ပြည်သူများ၏ လိုအပ်ချက်များကို လေ့လာရန်၊ USAID၏ လူသားချင်းစာနာမှုဆိုင်ရာအကူအညီပေးအပ်သည့် မိတ်ဖက်များနှင့်တွေ့ဆုံရန်နှင့် ကပ်ဘေးတုံ့ပြန်ရေးအတွက် အခြားနည်းလမ်းများရှာဖွေရန် USAID ၏ သဘာဝဘေးအန္တရာယ်တုံ့ပြန်ဆောင်ရွက်ရေးကျွမ်းကျင်ပညာရှင်အဖွဲ့တစ်ဖွဲ့က အောက်တိုဘာလဆန်းပိုင်းတွင် မြန်မာနိုင်ငံတွင်းရှိ ရေဘေးသင့်ဒေသများသို့ သွားရောက်ခဲ့ကြသော ခရီးစဉ်၏ ရလဒ်ဖြစ်ကြောင်း သံရုံး၏ ယမန်နေ့ ကြေညာချက်၌ ဖော်ပြသည်။

Public Service Announcement

အမေရိကန်အစိုးရ၏ ရေဘေးတုံ့ပြန်မှုထပ်ဆောင်းရန်ပုံငွေသည် ကယ်ဆယ်ရေးပစ္စည်းများနှင့် အခြားအကူအညီများကို ဖြန့်ဖြူးခြင်းနှင့် ပျက်စီးဆုံးရှုံးမှုများအတွက် တုံ့ပြန်ဆောင်ရွက်မှုများဆက်လက်ပြုလုပ်နေသည့် USAID ၏ မိတ်ဖက်များအတွက် ဖြည့်စွက်ကူညီခြင်းတို့အပါအဝင် လူသားချင်းစာနာမှုအကူအညီ ပေးအပ်သည့် မိတ်ဖက်အဖွဲ့အစည်းများက ဘေးဒဏ်သင့်အသိုက်အဝန်းများအတွက် လိုအပ်ချက်များကို ဖြည့်ဆည်းရာတွင် ချောမွေ့အဆင်ပြေစေမည်ဟု သံရုံးက ဆိုသည်။

အဆိုပါ ထပ်တိုးရန်ပုံငွေသည် မြန်မာနိုင်ငံအတွင်း လူသားချင်းစာနာမှုအကူအညီလိုအပ်မှုများကို ဖြေရှင်းရန် အမေရိကန်အစိုးရက ထပ်မံပေးအပ်ထားသည့်ရန်ပုံငွေ ဒေါ်လာ ၄၇ သန်းကျော်အပြင် ထပ်မံပေးအပ်ခြင်းဖြစ်ကြောင်း သိရသည်။

မြန်မာနိုင်ငံတွင် ဆိုးရွားစွာရေလွှမ်းမိုးခဲ့ခြင်းကြောင့် လူဦးရေ ၃၆၀ကျော်ရေနစ်သေဆုံးခဲ့ပြီး ၁၀၀ဦးထက်မနည်းပျောက်ဆုံးနေဆဲဖြစ်ကြောင်း ကုလသမဂ္ဂလူသားချင်းစာနာမှုဆိုင်ရာညှိနှိုင်း‌ရေးရုံး(OCHA)က စက်တင်ဘာလကုန်ပိုင်းတွင် ထုတ်ပြန်ထားသည်။

မုန်တိုင်းယာဂိ အကြွင်းအကျန်များနှင့် မုတ်သုံမိုးသည်းထန်စွာရွာသွန်းပြီးနောက် မြန်မာနိုင်ငံရှိ မြို့နယ်ပေါင်း ၃၃၀ အနက် ၇၀ ခန့်တွင် ရေကြီးရေလျှံခြင်းများဖြစ်ပေါ်ခဲ့ပြီး စက်တင်ဘာ ၂၆ရက်အထိ ရေဘေးသင့် လူဦးရေ ၁ သန်းခန့် ရှိကြောင်း OCHA က ဆိုသည်။

ထို့အပြင် မြန်မာနိုင်ငံတဝန်းအရေးပေါ်အသက်ကယ်ဆယ်ရေးအကူအညီလိုအပ်လျက်ရှိသည့် လူ့အသိုက်အဝန်းများကို အကူအညီပေးရန် အမေရိကန်ပြည်ထောင်စုက ဆက်လက် သန္နိဋ္ဌာန်ချထားပြီး တနိုင်ငံလုံးရှိ ပြည်သူများထံသို့ လူသားချင်းစာနာမှုအကူအညီများ အတားအဆီးမရှိ ပေးအပ်နိုင်စေရေးအတွက် စစ်အာဏာရှင်အဖွဲ့အစည်းမှ အာဏာပိုင်များနှင့် ပဋိပက္ခနှင့် သက်ဆိုင်သူများကို အမေရိကန်ပြည်ထောင်စုက တိုက်တွန်းသည်။

ယင်းနောက် မြန်မာပြည်သူများကို အကူအညီများ ပိုမိုပေးအပ်ရာတွင် ၎င်းတို့နှင့်အတူ ပါဝင်ကြပါရန် အခြားသော အလှူရှင်များကိုလည်း အမေရိကန်က နှိုးဆော်ထားသည်။