ဒေါ်လာလိုချင်သောစစ်ကောင်စီက တစ်နှစ်လျှင် ကန်ဒေါ်လာ ၅သောင်းအထက် ပြည်ပမှငွေပြန်လွှဲသူကို လျှပ်စစ်ကားတင်သွင်းခွင့်ပေးမည်ဟု မက်လုံးပေး

ရဲခေါင်/People’s Spring

ဒေါ်လာလိုချင်သောစစ်ကောင်စီက တစ်နှစ်လျှင် အမေရိကန်ဒေါ်လာ ၅သောင်းမှ ၂သိန်းအထက် ငွေပြန်လွှဲမည့် ပြည်ပရောက်မြန်မာနိုင်ငံသားများအား လျှပ်စစ်ကား EV တင်သွင်း ခွင့်ပေးမည်ဟု မက်လုံးပေး ထုတ်ပြန်သည်။

ထိုင်းနိုင်ငံဆိုင်ရာ မြန်မာသံရုံး၏ ဖော်ပြချက်အရ မြန်မာနိုင်ငံသားများက ရရှိသည့် လစာငွေ၊ သို့မဟုတ် အခြားဝင်ငွေများကို မြန်မာနိုင်ငံသို့ ဘဏ်လမ်းကြောင်းမှတစ်ဆင့် ပြန်လည်လွှဲပို့ခြင်းအတွက် အထူးအစီအစဉ်ဖြင့် ခွင့်ပြုခြင်းဟု လည်း ဆိုသည်။

ပုံမှန်လစာရရှိသူများ (သင်္ဘောသားများအပါအဝင်) တစ်နှစ်အတွင်း အမေရိကန် ဒေါ်လာ ၂ သိန်းနှင့်အထက်လွှဲပို့ပါက လွှဲပို့ငွေ၏ ၅ ရာခိုင်နှုန်းတန်ဖိုးနှင့် ညီမျှသော လျှပ်စစ်သုံးမော်တော်ယာဉ် တစ်နှစ်လျှင် တစ်စီးနှုန်း တင်သွင်းခွင့်ရမည်ဟု ဖော်ပြသည်။

Public Service Announcement

ထို့အပြင် ပုံမှန်လစာရရှိသူများမှအပ အခြားဝင်ငွေရရှိသူများ တစ်နှစ်အတွင်း အမေရိကန် ဒေါ်လာ ၅သောင်းနှင့်အထက် လွှဲပို့ပါက လွှဲပို့ငွေ၏ ၅ ရာခိုင်နှုန်းတန်ဖိုးနှင့် ညီမျှသော လျှပ်စစ်သုံးမော်တော်ယာဉ်နှင့်လျှပ်စစ်သုံးမော်တော်ဆိုင်ကယ် တစ်နှစ်လျှင် တစ်စီးနှုန်း တင်သွင်းနိုင်ကြောင်း အသိပေးသည်။

အကျုံးဝင်သူများအနေဖြင့် လျှပ်စစ်သုံးမော် တော်ယာဉ်၊လျှပ်စစ် သုံးမော်တော်ဆိုင်ကယ် တင်သွင်းခွင့်ပြုရာတွင် တစ်ဦးတစ်ယောက်ချင်း တင်သွင်းမှုကိုလည်းကောင်း၊တစ်ဦးတစ်ယောက်ချင်း တင်သွင်းရန် ယာဉ်တန်ဖိုး မပြည့်မီပါက စုပေါင်း၍ တင်သွင်းမှုကိုလည်း ခွင့်ပြုပေးမည် စစ်ကောင်စီက မက်လုံးပေးထားသည်။

“ဒေါ်လာအပြင်ပေါက်စျေးနဲ့ စစ်ကောင်စီရဲ့ ဗဟိုဘဏ်ပေါက်စျေးက အများကြီးကွာတယ်။တကယ်ဦးနှောက်ရှိတဲ့သူတွေက ဘယ်သူမှ အဲဒီလိုလွှဲမှာမဟုတ်ဘူး။နောက်ဆုံး စီးချင်တယ်ဆိုရင်တောင် အပြင်စျေးနဲ့လဲပြီး တင်သွင်းထားပြီးသားပဲ ဝယ်စီးမှာပေါ့”ဟု ပြည်ပရောက် မြန်မာတစ်ဦးက ပြောသည်။

စစ်ကောင်စီ​၏ လျှပ်စစ်ကားတင်သွင်းခွင့် မက်လုံးပေးမှုမှာ ယုတ်တိမဆန်ဘဲ သင်္ဘောသားများပင် ထိုကဲ့သို့သော လစာမရရှိဟု ဆိုသည်။

အောက်တိုဘာ ၃၁ ရက်က ဗဟိုဘဏ်၏ တစ်ဒေါ်လာ ငွေလဲနှုန်းမှာ ၃,၅၇၅ ကျပ်ဖြစ်ပြီး ပြင်ပစျေးကွက်တွင် တစ်ဒေါ်လာ ၄,၅၀၀ ကျပ် ဝန်းကျင်ရှိသည်။