ကဖေး/People’s Spring
ဖားကန့်မြို့နယ်၊ စဘော့ကျေးရွာမှ ကျောက်စိမ်းတူးဖော်ရေးလုပ်ကွက် နွံကန်ပြိုကျမှုတွင် ရုပ်အလောင်း ၂၂ လောင်းရှာဖွေတွေ့ရှိထားပြီး ယနေ့(ဇန်နဝါရီလ ၁၅ရက်)တွင် တတိယမြောက်နေ့ ရှာဖွေရေး ဆက်လက်ပြုလုပ်နေသည်။
စဘော့ကျေးရွာမှနွံကန်သည့်ဇန်နဝါရီ ၁၃ရက် နံနက် ၁နာရီခန့်တွင် ပြိုကျပြီး ရွာအတွင်းရှိ အိမ်ခြေ ၅၀ ကျော် အိမ်ခေါက်မိုး မြုပ်လုနီးပါးအထိ နစ်မြုပ်သွားခဲ့သည်။နွံကန်ပြိုကျစဉ် ထွက်ပြေးလွတ်မြောက်လာသူအချို့လည်းရှိပြီး သေဆုံးသူသည် အနည်းဆုံး ၁၀၀ကျော်နိုင်ကြောင်း ဒေသခံများကခန့်မှန်းခဲ့ကြသည်။
သို့သော် ပျောက်ဆုံးစာရင်းပေးထားသူဦးရေမှာ ၃၆ဦးသာ ရှိပြီး ဇန်နဝါရီလ ၁၃ရက် ရှာဖွေမှု၌ရုပ်အလောင်း၁၂လောင်း၊ ဇန်နဝါရီလ ၁၄ရက်၌ ၁၀လောင်း ရှာတွေ့ထားသည်။
Public Service Announcement
” ကလေးငယ်တွေရော အမျိုးသမီးတွေရောပါတယ်ဗျာ။ရှာဖွေရေးနေရာနားမှာ ငိုသံတွေဆူညံနေတာပဲ။ ရှင်ဖို့ မျှော်လင့်ချက်မရှိတော့ပေမယ့် မိသားစုတင်တွေက စောင့်နေတုန်းလေ”ဟု ဒေသခံတစ်ဦးကပြောသည်။
ဇနနဝါရီလ ၁၃ရက်နေ့က အဆိုပါ နွံကန်ပြိုကျမှုကို ရှာဖွေကယ်ဆယ်ရေးပြုလုပ်နေကြစဉ် ဖားကန့်မြို့နယ် ဆန်ခါနှင့်မဇွပ်ယာန်ရွာအတွင်း ကျောက်စိမ်းတူးဖော်ရေးလုပ်ကွက်များကို စစ်ကောင်စီက လေကြောင်းမှဗုံးကြဲတိုက်ခိုက်ခဲ့သည်။
ထို့ကြောင့် နွံကန်ပြိုကျမှုရှာဖွေကယ်ဆယ်ရေးများ နာရီအနည်းငယ်ကြာရပ်နားခဲ့ရသည်။လေကြောင်းတိုက်ခိုက်မှုတွင် အရပ်သား ဆယ်ဦးထက်မနည်းထပ်မံသေဆုံးခဲ့ကြောင်း ဒေသခံအချို့ကပြောသည်။
