အိမ်သွင်/People’s Spring
စစ်ကိုင်းတိုင်း၊ တမူးမြို့နယ် ခမ်းပါတ်မြို့နှင့် အင်းတော်မြို့နယ်၊ မော်လူးမြို့တို့တွင် ယမန်နေ့ညပိုင်းက စစ်ကောင်စီလေကြောင်းတိုက်ခိုက်မှုအတွင်း အရပ်သား ငါးဦးသေဆုံးခဲ့ကြောင်း သတင်းရရှိသည်။
ခမ်းပါတ်မြို့ကို ဇန်နဝါရီ ၁၆ရက် ည၈နာရီခွဲခန့်တွင် ဗုံးသုံးလုံးကြဲချပြီး မော်လူးမြို့ကို ည ၁၁နာရီ ၄၅ မိနစ်တွင် ဗုံးကြဲခြင်းဟု ဒေသခံများက ပြောသည်။
” ခမ်းပါတ်မှာက နှစ်ဦးသေဆုံးတယ်။ သုံးဦး ဒဏ်ရာရပါတယ်။ သေဆုံးတာမှာ သုံးနှစ်အရွယ်ကလေးငယ်တစ်ယောက် ပါတယ်။ အပျက်အစီးအရမ်းများတယ်”ဟု တမူးမြို့ခံတစ်ဦးက ပြောသည်။
Public Service Announcement
မော်လူးမြို့အား လေကြောင်းတိုက်ခိုက်မှုတွင် အမျိုးသမီးတစ်ဦးအပါအဝင် ဒေသခံပြည်သူသုံးဦးသေဆုံးခဲ့သည်ဟု ပြည်သူ့အုပ်ချုပ်ရေးအဖွဲ့နှင့်နီးစပ်သူတစ်ဦးက ပြောသည်။
” ဘာတိုက်ပွဲမှမရှိဘဲနဲ့ လာပစ်သွားတာဗျ။ ပေါင်၅၀၀ ဗုံးကြဲတာ။ သေဆုံးသူတွေနာရေး အားချင်းပဲ လုပ်နေရတယ်”ဟု မော်လူးမြို့ခံတစ်ဦးက ပြောသည်။
ခမ်းပါတ်နှင့် မော်လူးမြို့သည် အမျိုးသားညီညွတ်ရေးအစိုးရ(NUG)လက်အောက်ခံ ပြည်သူ့ကာကွယ်ရေးတပ်ဖွဲ့များနှင့် မဟာမိတ်များက တိုက်ခိုက်သိမ်းယူခဲ့ပြီး NUGအစိုးရက ထိန်းချုပ်ထားသည့်မြို့များ ဖြစ်သည်။
စစ်ကောင်စီသည် ဇန်ဝါရီအတွင်း ရှမ်းပြည်နယ်မြောက်ပိုင်း သိန္တီမြို့၊ မန္တလေးတိုင်း မိုးကုတ်နှင့်စဥ့်ကူးမြို့၊ ကချင်ပြည်နယ် ဖားကန့်၊ ဗန်းမော်နှင့် တနိုင်းမြို့၊ ရခိုင်ပြည်နယ် ကျောက်တော်၊ ပုဏ္ဏားကျွန်း၊ ရသေ့တောင်မြို့တို့ကို လေကြောင်းမှဗုံးကြဲတိုက်ခိုက်ရာ အရပ်သား ၆၀ဦးထက်မနည်း သေဆုံးခဲ့သည်။
ယနေ့(ဇန်နဝါရီ ၁၇ရက်) မွန်းလွဲပိုင်းတွင်လည်း စစ်ကိုင်းတိုင်း ဟုမ္မလင်းမြို့နယ်အတွင်းတနေရာကိုလည်း လေကြောင်းမှ ဗုံးကြဲတိုက်ခိုက်ခဲ့ကြောင်း သတင်းရရှိသည်။ သို့သော် ထိခိုက်မှုအခြေအနေကို မသိရှိရသေးပေ။
