အွန်လိုင်းငွေလိမ်ဂိုဏ်း(ကျားဖြန့်)အပါအဝင် ဒုစရိုက် လှုပ်ရှားမှုတွေကို ထိထိရောက်ရောက် ဖြိုခွင်းအောင် အာဏာပိုင်တွေကို ဖိအားပေးတဲ့ အနေနဲ့ ထိုင်းအစိုးရဟာ မြန်မာဖက်ခြမ်းက ရွှေကုက္ကိုနဲ့ ကေကေပက်ခ် ဒေသတွေဆီ လျှပ်စစ်ဓါတ်အား ထောက်ပံ့မှု ဖြတ်တောက်ဖို့ စဉ်းစားနေကြောင်း ဒုတိယဝန်ကြီးချုပ်ကခြိမ်းခြောက်ပြောကြားလိုက်ပါတယ်။
တကယ်လို့ ထိုင်းနဲ့ နယ်စပ်တလျှောက်မှာ သောင်းကျန်းနေတဲ့ ဒုစရိုက် ဂိုဏ်းတွေကို ဒေသတွင်း အာဏာပိုင်တွေက ထိထိရောက်ရောက် အရေးမယူဘူးဆိုရင် ထိုင်းဖက်ကဓါတ်အားဖြတ်တောက်တဲ့ အခြေအနေနဲ့ ကြုံတွေ့ရမှာ ဖြစ်တယ်လို့ ထိုင်းကာကွယ်ရေး ဝန်ကြီးလည်းဖြစ်တဲ့ ဖုမ်သမ် ဝီချာယာချိုင်က ဖေဖော်ဝါရီ ၃ ရက်နေ့မှာ သဆိုခဲ့တာပါ။
မြဝတီ မြို့နယ်ထဲက KK Park နဲ့ ရွှေကုက္ကိုတို့ဟာ တရုတ် စီးပွားရေး လုပ်ငန်းရှင် အများစု ဖွင့်လှစ်ထားတဲ့ ငွေလိမ်ဂိုဏ်းတွေ၊ တရားမဝင် အွန်လိုင်း ကာစီနိုတွေအုံနဲ့ကျင်းနဲ့ တည်ရှိရာ နေရာတွေ ဖြစ်ပါတယ်။ ပြီးတော့ အဲဒီ ဒုစရိုက် ဂိုဏ်းတွေနဲ့ ဆက်စပ်ပြီး တရုတ်နိုင်ငံသားတွေကို လူမှောင်ခိုကူးတဲ့ ရာဇဝတ်မှုတွေပါ မြင့်တက်လာတဲ့နောက် ထိုင်းဟာ ဒီပြဿနာကို ထိထိရောက်ရောက် ကိုင်တွယ်ဖို့ တရုတ်ဆီက ဖိအားပေးမှုကိုပါ ခံလာရပါတယ်။
ဖုမ်သမ်ကဥက္ကဋ္ဌအဖြစ်သူတာဝန်ယူထားတဲ့အမျိုးသား လုံခြုံရေး ကောင်စီ (NSC)ဟာရွှေကုက္ကိုနဲ့ ကေကေပက်ခ်တို့မှာ ဒုစရိုက် လှုပ်ရှားမှုတွေအပေါ် ထိရောက်တဲ့ အရေးယူမှုမျိုး မမြင်ရဘူးဆိုရင် သတိပေးတဲ့အနေနဲ့ ကနဦးအဆင့် ဓါတ်အား ထောက်ပံ့မှု ၅၀ ရာခိုင်နှုူန်း လျှော့ချမယ်လို့ ဆိုပါတယ်။
Public Service Announcement
အဲဒါကိုမှ ထူးခြားတဲ့ အပြောင်းအလဲတွေ ရှိမလာသေးဘူးဆိုရင်လုံးဝဥဿုံဓါတ်အားဖြတ်တောက်တာမျိုး အပါအဝင် ပြင်းထန်ကြမ်းတမ်းတဲ့ တုံ့ပြန်မှုတွေ ရှိလာမှာဖြစ်တယ်လို့သူကခြိမ်းခြောက်ခဲ့ပါတယ်။
ထိုင်းနိုင်ငံ ပိုင်နက်နဲ့ သောင်ရင်းမြစ်ကမ်းခြားပြီး တည်ရှိရာ ရွှေကုက္ကိုနဲ့ ကေကေပက်ခ်တို့ဆီ ဓါတ်အားဖြတ်တောက်တာဟာအရပ်သားတွေနဲ့ကောင်းရောင်းကောင်းဝယ် လုပ်ငန်းတွေကိုပါ နစ်နာ ထိခိုက်စေနိုင်တာကြောင့် သတိကြီးကြီးနဲ့ ချဉ်းကပ်ဖို့ လိုတယ်လို့ တချို့ ထိုင်းအာဏာပိုင်တွေကလည်း ပြောကြားထားပါတယ်။
NSC ရဲ့အတွင်းရေးမှူးချုပ်ချတ်ချိုင်ဘန်ချူရတ်ဒ်က သက်ဆိုင်ရာ အာဏာပိုင် အဖွဲ့အစည်းတွေဟာ အဲဒီဓါတ်အားဖြတ်တောက်မှုမျိုးတကယ် အကောင်အထည် ဖော်မယ်ဆိုရင် ကိစ္စတိုင်းကို နှိုက်နှိုက်ချွတ်ချွတ်လေ့လာဖို့ လိုတယ်လို့ မှတ်ချက်ပေးခဲ့ပါတယ်။
ရုတ်တရက် ဓါတ်အား ဖြတ်တောက်မှုတွေဟာ ဓါတ်အား ဖြန့်ချိရေးဆိုင်ရာသဘောတူညီမှု စာချုပ်တွေကို ရှုပ်ထွေးသွားစေနိုင်သလို သာမန် အရပ်သား ပြည်သူတွေအပေါထိခိုက်သက်ရောက်မှုတွေလည်း ဖြစ်လာစေနိုင်တယ်လို့ သူက ဆက်ပြောပါတယ်။
ဒါပေမဲ့ လက်ရှိ ချုပ်ဆိုထားတဲ့ စာချုပ်တွေ သက်တမ်း ကုန်ဆုံးသွားရင်တော့ သက်တမ်း ဆက်မတိုးဘဲ ဓါတ်အား ထောက်ပံ့မှု ရပ်တန့်လိုက်တာမျိုး ဖြစ်နိုင်တယ်လို့တော့ ဆိုပါတယ်။ မြန်မာဖက်ခြမ်း နယ်စပ်ကို ဓါတ်အား ထောက်ပံ့ပေးနေတဲ့ စာချုပ်ပါ အချက်အလက် အသေးစိတ်ကို မထုတ်ပြန်ထားပေမယ့် အဲဒီစာချုပ်မျိုးဟာအများအားဖြင့် သက်တမ်း ၅ နှစ်လောက် ရှိတတ်တယ်လို့သိရပါတယ်။
ကိုးကား-The Nation
