မြန်မာဖက်ခြမ်း နယ်စပ်မှာ တရုတ် အွန်လိုင်း ငွေလိမ်ဂိုဏ်း (ကျားဖြန့်)အတွက် အလုပ်လုပ်ပေးနေရတဲ့ ဟောင်ကောင် အမျိုးသမီး တစ်ဦးကို ကယ်ဆယ်နိုင်ခဲ့ကြောင်း ထိုင်းစစ်တပ်က ပြောပါတယ်။
အသက် ၃၁ နှစ်အရွယ် ဟောင်ကောင် အမျိုးသမီးကို ထိုင်းစစ်တပ်နဲ့ ရဲတပ်ဖွဲ့ ပူးပေါင်းဆောင်ရွက်တဲ့ မစ်ရှင် တစ်ခုမှာ အောင်အောင်မြင်မြင် ကယ်ထုတ်နိုင်ခဲ့တာလို့ ဆိုပါတယ်။ ထိုင်း-မြန်မာ နယ်စပ်က ကျားဖြန့်ဂိုဏ်းတွေရဲ့ လူကုန်ကူးမှုတွေမှာ ဟောင်ကောင် နိုင်ငံသားတွေလည်း သားကောင်အဖြစ် ကျရောက်နေကြောင်း သတင်းပေး တိုင်ကြားမှုတွေကြောင့် ထိုင်းအာဏာပိုင်တွေက အဲဒီအပိုင်းက စေ့စေ့စပ်စပ် စုံစမ်း ကိုင်တွယ်နေတယ်လို့ ဆိုပါတယ်။
တရုတ်နိုင်ငံသားလုပ်ငန်းရှင်အများစု ပိုင်ဆိုင်တဲ့ ကျားဖြန့်ဂိုဏ်းတွေဟာ လူကုန်ကူး ခံရသူတွေကို တရားမဝင် လုပ်ငန်းတွေအတွက်အဓမ္မဖိအားပေး ခိုင်းစေလေ့ ရှိတယ်လို့လည်း ထိုင်းရဲတွေက ပြောပါတယ်။
ဟောင်ကောင်နိုင်ငံသား ၁၂ ဦးထိကျားဖြန့်ဂိုဏ်းတွေရဲ့ အဓမ္မ ခိုင်းစေမှုတွေ ခံနေရတယ်လို့ ယုံကြည်ရကြောင်း ထိုင်းမူးယစ်ဆေးဝါး တိုက်ဖျက်ရေး ဘုတ်အဖွဲ့ရုံး (ONCB)ဆီက အကြောင်းကြားမှုအရ အကောင်အထည် ဖော်ခဲ့တဲ့ မစ်ရှင်မှာ အဲဒီ ဟောင်ကောင် အမျိုးသမီးကို ဖေဖော်ဝါရီ ၂ ရက်နေ့က ကယ်ဆယ်နိုင်ခဲ့တာ ဖြစ်ပါတယ်။
Public Service Announcement
ONCBကထောက်လှမ်းရေးသတင်းတွေအရကျားဖြန့်ဂိုဏ်းတွေ လက်ထဲမှာ ရှိနေတဲ့ ဟောင်ကောင် နိုင်ငံသားတွေဟာ သောင်ရင်းမြစ်ကို ဖြတ်ကူးပြီး ထိုင်းနိုင်ငံ ပိုင်နက်ထဲ ခိုလှုံလာဖို့လိုလားနေကြတယ်လို့ ပြောပါတယ်။
အမျိုးသမီးဟာဖေဖော်ဝါရီ၂ ရက်နေ့မှာ ထိုင်းဖက်ခြမ်းမြစ်ကမ်းဆီချောချောမောမောပြန်ရောက်နိုင်ခဲ့ပြီး သူ့ကို ကယ်ထုတ်နိုင်ဖို့ မြဝတီဖက်ခြမ်းကဒီမိုကရက်တစ်ကရင်အကျိုးပြုတပ်မတော် (DKBA)နဲ့ ပူးပေါင်း ဆောင်ရွက်ခဲ့ကြောင်း ထိုင်းစစ်တပ်က ဆိုပါတယ်။ အမျိုးသမီးကို အမြန်ဆုံး ဟောင်ကောင် ပြန်ပို့ပေးဖို့ စီစဉ်ထားကြောင်းလည်း ထိုင်းစစ်တပ်က အတည်ပြုသွားပါတယ်။
ကိုးကား- The Nation
