ကျော်ဇော/People’s Spring
တနင်္သာရီမြို့နယ်အတွင်းရှိ ကျေးရွာအနှံ့အပြားတွင် စစ်ကောင်စီတပ်နှင့် တော်လှန်ရေးတပ်ဖွဲ့များကြား နှစ်ဘက်တိုက်ပွဲများပြင်းထန်နေ၍ ပြည်သူများအနေဖြင့် သတိပြုနေထိုင်ကြရန် မြိတ်ခရိုင်၊ ပြည်သူ့ကာကွယ်ရေးပူးပေါင်းစစ်ကြောင်း(၁)က အသိပေးထုတ်ပြန်သည်။
မြို့နယ်အတွင်းရှိ ညောင်ပင်ကွင်း၊ ထုံမခါ၊ ထုံတော်၊ သိမ်ခွန်း၊ ငါးမိုင်၊ခြောက်မိုင်၊ ကွင်းသစ်နှင့် ဗောဓိကမ်းစသည့်ကျေးရွာအနှံ့အပြားတွင် စစ်ကောင်စီတပ်နှင့် မြိတ်ခရိုင်၊ ပြည်သူ့ကာကွယ်ရေးပူးပေါင်းစစ် ကြောင်း(၁)တို့ တိုက်ပွဲများ ဆက်တိုက်ဖြစ်ပွားလျှက်ရှိပါသည်ဟု ဖော်ပြသည်။
ထို့ကြောင့် အဆိုပါကျေးရွာများတွင် နေထိုင်သော ကျေးရွာနေပြည်သူများအနေဖြင့်စစ်ကောင်စီနှင့် လုံးဝ(လုံးဝ) ပတ်သက်ခြင်းမပြုဘဲ ဝေးဝေးနေပေးကြပါရန် လေးစားစွာဖြင့် အထူးသတိပေးထုတ်ပြန်လိုက်သည်ဟု ဆိုသည်။
Public Service Announcement
“ကျေးရွာအားလုံး ခြုံပြောရရင် (နှစ်ဘက်) တိုက်ပွဲက တစ်လကျော်ပြီ”ဟု မြိတ်ခရိုင်၊ ပြည်သူ့ကာကွယ်ရေးပူးပေါင်းစစ်ကြောင်း(၁)မှ ပြောခွင့်ရသူတစ်ဦးက လူထုနွေဦးသို့ ပြော သည်။
နှစ်ဘက်တိုက်ပွဲများတွင် စစ်ကောင်စီတပ်မှ ၂၀ ကျော်သေဆုံး၍ ဒဏ်ရာရသူများလည်း အများအပြားရှိသည်ဟု ဆိုသည်။
ထို့အပြင် တော်လှန်ရေးတပ်ဖွဲ့များဘက်မှလည်း ရဲဘော်အချို့ထိခိုက်ကျဆုံးမှုရှိရာ အခြေအနေအပြည့်အစုံကို နှစ်ဘက်တိုက်ပွဲများ ပြီးဆုံးပြီးမှသာ အသိပေးထုတ်ပြန်သွားမည်ဟု ၎င်းက ဆက်ပြော သည်။
ထို့အပြင် နှစ်ဘက်တိုက်ပွဲများတွင် စစ်ကောင်စီတပ်မှ အထိနာ၍ လေကြောင်းပစ်ကူ အကြိမ်ရေ ၂၀ထက်မနည်း လုပ်ဆောင်ထားပြီး ယင်းလေကြောင်းပစ်ခတ်မှုများတွင် ပြည်သူထိခိုက်ဒဏ်ရာရမှုများလည်း ရှိခဲ့ကြောင်း မြိတ်ခရိုင်၊ ပြည်သူ့ကာကွယ်ရေးပူးပေါင်းစစ်ကြောင်း(၁)က အသိပေးသည်။
အလားတူ အင်အားအလုံးအရင်းဖြင့် ကျေးရွာများသို့ ဝင်ရောက်စစ်ကြောင်းထိုးနေသော စစ်ကောင်စီတပ်များသည် ဒေသခံပြည်သူများကို ဖမ်းဆီးသတ်ဖြတ်ခြင်း၊ နေအိမ်များ ဖျက်ဆီးခြင်း၊ ပြည်သူပိုင်ပစ္စည်းများအား လုယက်ဖောက်ထွင်းခိုးယူခြင်းများရှိနေခြင်းကြောင့် တော်လှန်ရေးမဟာမိတ်တပ်ဖွဲ့များက အပြင်းအထန်ခုခံတိုက်ထုတ်နေခြင်းဖြစ်ကြောင်းလည်း စစ်ကြောင်း(၁)က အသိပေးထုတ်ပြန်သည်။
ထို့အပြင် တနင်္သာရီမြို့နယ်အတွင်းရှိ ပြည်သူများအနေဖြင့် တော်လှန်ရေးတပ်ဖွဲ့များ၏ သတိပေးထုတ်ပြန်ချက်များအား ဂရုပြုလိုက်နာရန်လိုအပ်ပြီး အကယ်၍ လိုက်နာခြင်းမရှိပါက ထိခိုက်မှုများဖြစ်ပေါ်လာလျှင် မိမိတာဝန်သာဖြစ်ကြောင်း မြိတ်ခရိုင်၊ ပြည်သူ့ကာကွယ်ရေးပူးပေါင်းစစ်ကြောင်း(၁)က ထပ်မံသတိပေး ထုတ်ပြန်ထားသည်။
