ညောင်ဦးမြို့နယ်အတွင်း စစ်မှုထမ်းရန် စစ်ကောင်စီတပ်ခေါ်ယူမည့် လူငယ် ၇၀၀ကျော်၏ အမည်စာရင်းပေါက်ကြား

ရဲခေါင်/People’s Spring

မန္တလေးတိုင်း၊ ညောင်ဦးမြို့နယ်အတွင်း စစ်မှုထမ်းရန် စစ်ကောင်စီတပ်ခေါ်ယူမည့် လူငယ် ၇၀၀ ကျော်၏ အမည်စာရင်း ရရှိထားကြောင်း ပခုက္ကူခရိုင်အခြေစိုက်လှုပ်ရှားတပ် People’s Democratic Army(PDA)က အသိပေးထုတ်ပြန်သည်။

ညောင်ဦးမြို့နယ်ရှိ ပြည်သူလူထုအတွက်အရေးပေါ် အသိပေးချက်ဟုဆိုကာ စစ်ကောင်စီ၏ အတင်း အကြပ်စစ်မှုထမ်းဥပဒေအရ အဓမ္မစစ်မှုထမ်းခိုင်းရန် အကြုံးဝင်သူများ၏ အမည်စာရင်းများကို စစ်ရေးလှုပ်ရှားမှုတစ်ခုအတွင်းမှ ရရှိခဲ့သည်ဟု PDAက ဆိုသည်။ အမည်စာရင်းကို

PDA ၏ ​ဖေစ်ဘွခ်စာမျက်နှာ https://www.facebook.com/share/1BiRuJNVn5 တွင် သွား​ရောက်ကြည့်ရှုနိုင်ပါသည်။

Public Service Announcement

ထို့ကြောင့် စာရင်းထဲပါရှိသူများအနေဖြင့် စစ်ကောင်စီရန်မှ အမြန်ဆုံးလွတ်မြောက်နိုင်စေရန် အသိပေးခြင်းဖြစ်ကာ နီးစပ်ရာတော်လှန်ရေးအဖွဲ့အစည်းများနှင့် ချိတ်ဆက်၍ ရှောင်ရှားရန်နှင့် PDA အနေဖြင့်လည်း ကူညီပေးနိုင်ရန် အမြဲအဆင်သင့်ရှိနေကြောင်း ဖော်ပြထားသည်။

“လူငယ်​တွေအ​နေနဲ့ စစ်​ကောင်စီရဲ့မတရားပြုသမျှကို ​ခေါင်းငုံ့မခံဘဲ လက်နက်ဆွဲကိုင် ​တော်လှန်ကြဖို့နဲ့ ​တော်လှန်​ရေး အဖွဲ့အစည်းများနှင့် အမြန်ဆုံးပူး​ပေါင်းကြဖို့ တိုက်တွန်းလိုတယ်။ စစ်​ကောင်စီကို အမြစ်ပြတ်​ချေ မှုန်းရုံမှတပါး တခြားမရှိဘူးဆိုတာကို လူငယ်အားလုံး သ​ဘော​ပေါက်ဖို့လည်း လိုတယ်”ဟု PDAတာဝန်ရှိသူက လူထုနွေဦးသို့ ပြောသည်။

ညောင်ဦးမြို့နယ်တွင် စစ်ကောင်စီ၏ ပေါ်တာဆွဲခံရသည့် ဖြစ်စဥ်များကြောင့် လူငယ်များ လက်နက်ကိုင်တော်လှန်ရေး လမ်းစဥ်ကို ကူးပြောင်းလာကြသူများရှိကြောင်းလည်း ညောင်ဦးမြို့နယ်ပြည်သူ့ကာကွယ်ရေး အဖွဲ့(ပကဖ)တပ်ခွဲ(၃)တာဝန်ရှိသူက အသိပေးသည်။

” သူတို့အနေနဲ့က အရင်ကတည်းက ဒီတောထဲကို ရောက်မလာတာပဲ ရှိတာပေါ့နော်။မြို့ပေါ်နေပြီး လိုအပ်တာတွေထောက်ပံ့နေသူတွေ ရောက်လာတဲ့အထဲမှာ များတယ်”ဟု ၎င်းက လူထုနွေဦးသို့ ပြော သည်။

ပြီးခဲ့သည့် ဖေဖော်ဝါရီ ၂၅ရက်ကလည်း ညောင်ဦးမြို့နယ်၊ မြောင်ကျေးရွာ ရှင်ပြုအလှူပွဲကို စစ်ကောင်စီတပ်ဖွဲ့ဝင်များ ဝင်ရောက်စီးနင်းခဲ့ပြီး ရွာခံအမျိုးသား ကိုးဦးအား ဖမ်းဆီးခေါ်ဆောင်သွားခဲ့သည်။

“အရပ်သားတွေကို PDF သတင်းပေးဆိုပြီးတော့ ဖမ်းဆီးတာ။သတင်းရသလောက်တော့ ၉ ယောက်ပေါ့။ ခုထိတော့ ပြန်လည်လွှတ်ပေးတာမျိုးမရှိသေးဘူး”ဟု ညောင်ဦးမြို့နယ် ပကဖ တပ်ခွဲ(၃) တာဝန်ရှိသူက ပြောသည်။

လက်ရှိတွင် ညောင်ဦးမြို့နယ်၏ အရှေ့မြောက်ဘက်ခြမ်းရှိ ငါ့သရောက်မြို့ကို စစ်ကောင်စီက အင်အားတိုး၍ လမ်းပိုင်းစစ်ဆေးမှုများပြလုပ်နေပြီး ပြည်သူများ ဂရုစိုက်နေထိုင်ရန် မြို့နယ်ပြည်သူ့ကာကွယ်ရေးအဖွဲ့က ထုတ်ပြန်ထားသည်။

လူဦးရေနှင့် သန်းခေါင်စာရင်းအရ ညောင်ဦးမြို့နယ်တွင် လူဦးရေ တစ်သိန်းကျော်ရှိပြီး ရပ်ကွက် ၁၃ ခုနှင့် ကျေးရွာအုပ်စု ၅၉ ရွာရှိသည်။