ရဲခေါင်/People’s Spring
ရှမ်းပြည်နယ်တောင်ပိုင်း၊ မိုးဗြဲမြို့တိုက်ပွဲအတွင်းစစ်ကောင်စီတပ်သားရုပ်အလောင်း ၁၂လောင်းနှင့် လက်နက်ခဲယမ်းအချို့သိမ်းဆည်းရရှိကြောင်း မိုးဗြဲပြည်သူ့ကာကွယ်ရေးတပ်မတော် (Moebye PDF)က ယမန်နေ့ညပိုင်းတွင် ထုတ်ပြန်သည်။
မိုးဗြဲ – လွိုင်ကော်လမ်းပိုင်းအား ပြန်လည် ထိန်းချုပ်နိုင်ရန် စစ်ကောင်စီတပ်သည် အင်အားအလုံးအရင်းဖြင့် ထိုးစစ်ဆင်ကာ လေကြောင်း၊လက်နက်ကြီးနှင့် ဒရုန်းပစ်ကူများ အဆမတန်အသုံးပြုနေသည်ဟု ဆိုသည်။
ထို့နောက် ဖေဖော်ဝါရီ ၂၇ ရက်တွင် (၁၀၀၁)မိုးဗြဲပြည်သူ့ကာကွယ်ရေးတပ်နှင့် မဟာမိတ်ပူပေါင်းတပ်တို့သည် စစ်ကောင်စီတပ်နှင့် ပြင်းထန်စွာ တိုက်ပွဲဖြစ်ပွားပြီး နှစ်ဖက်ကျဆုံးမှုရှိခဲ့ကြောင်းအသိပေးသည်။
Public Service Announcement
အဆိုပါတိုက်ပွဲအတွင်း စစ်ကောင်စီတပ်သား ရုပ်အလောင်း (၁၂) လောင်းနှင့် လက်နက်ခဲယမ်းအချို့ကို သိမ်းဆည်းရရှိခဲ့ကြောင်း ဖော်ပြသည်။
“စစ်ကြောင်းထိုးနေတာ အင်အား ၂၀၀နေတာရှိတယ်။ မြေပြင်ပေါ့။နောက်ချန်နဲ့ တပ်ဖြည့်ကတော့ ၄၂၂ တပ်ထဲ ထက်ရှိလိမ့်မယ်။အခု ဒီနေ့ သူတို့စစ်ကြောင်း မလှုပ်လာသေးဘူး”ဟု မိုးဗြဲ မြေပြင်ရှိ တော်လှန်ရေးရဲဘော်တစ်ဦးက လူထုနွေဦးသို့ ပြောသည်။
လက်ရှိအခြေအနေအရ မိုးဗြဲမြို့အား ပူးပေါင်းတပ်မှထိန်းချုပ်ထားဆဲရှိပြီး တိုက်ပွဲချိန်ကြာလာသည်နှင့်အမျှ စစ်ရေးလိုအပ်ချက်များလာသည့် အတွက် ပြည်သူများ၏ကူညီမှု လိုအပ်ကြောင်း မေတ္တာရပ်ခံထားသည်။
ယခုနှစ်ဆန်းပိုင်းကစ၍ မိုးဗြဲမြို့ကို ပြန်လည် ထိန်းချုပ်ရန် စစ်ကောင်စီသည် မြို့၏ (၂)မိုင်ကျော်အကွာအဝေးနှင့် မြောက်ဘက်ခြမ်းတွင်ရှိသော ခြေမြန်တပ်ရင်း ခမရ-၄၂၂တပ် တွင်းသို့ အင်အား ၃၀၀ ထက်မနည်း ဖြည့်တင်း ကာ စစ်ကြောင်းမကြာခဏထိုးခဲ့ပြီး ဖေဖော်ဝါရီ နောက်ဆုံးပတ်ကစ၍ တိုက်ပွဲများပြင်းထန်နေခြင်းဖြစ်သည်။
ရှမ်းပြည်နယ်နှင့် ကရင်နီပြည်နယ်၏ ဝင်ပေါက်၊ ထွက်ပေါက်ဖြစ်သည့် မိုးဗြဲမြို့သည် နှစ်ဖက် တပ်များအတွက် စစ်ရေးအရအရေးပါသည့် နယ်မြေ ဖြစ်သည်။
