“ပုသိမ်လှုပ်တယ်။ ဖျာပုံလည်းလှုပ်တယ်။ မအူပင်လည်းလှုပ်တယ်။ သိသာသွားတယ်”-ဒေသခံ
ဧပြီ-၂ ၊၂၀၂၅။စိုင်းနန်/People’s Spring
ဖျာပုံမြို့အနီး မြန်မာပင်လယ်ပြင်အတွင်းဗဟိုပြု၍ ရစ်ခ်ျတာစကေး၅ အဆင့်ရှိသော ငလျင်တခု ယနေ့ ဧပြီ ၂ရက် ည ၁၀နာရီ ၅၇မိနစ်၌ လှုပ်ခတ်သွားပြီး ဧရာဝတီတိုင်းမြို့နယ်အချို့အပြင် ရန်ကုန်မြို့၌လည်း လှုပ်ရှားမှုရှိခဲ့သည်။
“ပုသိမ်လှုပ်တယ်။ ဖျာပုံလည်းလှုပ်တယ်။ မအူပင်လည်းလှုပ်တယ်။ သိသာသွားတယ်” ဟု ပုသိမ်မြို့ခံတဦးကပြောသည်။
Public Service Announcement
ယနေ့ ည၁၀နာရီ ၅၇မိနစ်အချိန်ခန့်တွင် ဧရာဝတီတိုင်း၊ ဖျာပုံမြို့တောင်ဘက်၈၆ကီလိုမီတာ ( ၅၃ မိုင်ကျော်) အကွာ၊ ကပ္ပလီပင်လယ်ပြင်တွင် မြေအောက်အနက် ၁၀ကီလိုမီတာကိုဗဟိုပြု၍ အင်အားရစ်ချ်တာစကေး ၅.၀ အဆင့်နှင့် အတော်အသင့်အင်အားရှိသည့် မြေငလျှင်တစ်ခုထပ်မံလှုပ်ခတ်ခဲ့ပြီး စစ်ကိုင်းငလျင်ကြီး၏နောက်ဆက်တွဲငလျင်ငယ်များဆက်လက်လှုပ်ခတ်နိုင်သည့်အတွက် ငလျင်ဘေးဆောင်ရန်၊ရှောင်ရန်၊ သတိပြုရန်များနှင့်အညီ နေထိုင်ကြပါရန် အမျိုးသားညီညွတ်ရေးအစိုးရ၊လူသားချင်းစာနာထောက်ထားရေးနှင့်ဘေး
အန္တရာယ်ဆိုင်ရာစီမံခန့်ခွဲရေးဝန်ကြီးဌာန (MOHADM)က သတိ ပေးထားသည်။
အမေရီကန် ငလျင်တိုင်းတာရေးဌာန (USGS)ကလည်း ဖျာပုံမြို့၏ တောင်ဘက် ၈၆ ကီလိုမီတာကိုဗဟိုပြု၍ ပြင်းအား ၅ ရှိသော ဇောက်တိမ်ငလျင်လှုပ်သွားကြောင်းထုတိပြန်ထားသည်။
ဧပြီ ၂ ရက်ည ငလျင်လှုပ်ခတ်မှုကို ရန်ကုန်မြို့တွင်လည်း ခံစားလိုက်ရသည်ဟု မြို့ခံအချို့ကပြောသည်။
မတ်လ ၂၈ ရက်နေ့က စစ်ကိုင်းမြို့အနီးဗဟိုပြု၍ လှုပ်ခဲ့သည့် ရစ်ခ်ျတာစကေး ၇ဒဿမ၇ အဆင့်ငလျင်လှုပ်ပြီးနောက်ပိုင်း မြန်မာနိုင်ငံဒေသအနှံ့တွင် နောက်ဆက်တွဲငလျင်များ မကြာခဏလှုပ်ရှားနေသည်။
