မေ ၄၊၂၀၂၅။ဇော်ရမ်း/People’s Spring
ကချင်ပြည်နယ်၊ ဖားကန့်မြို့နယ် ဆိပ်မူအုပ်စု ကောင်ဆန်ကျေးရွာအနီးရှိ မြေစာပုံဟောင်းတစ်ခုသည် ယမန်နေ့ မေလ ၃ရက် ညနေပိုင်းက ပြိုကျခြင်းဖြစ်ပြီး ရေမဆေးကျောက်ရှာသူ တစ်ဦးသေဆုံးကာ လေးဦး ဒဏ်ရာရခဲ့သည်။
ညနေ ၃နာရီခွဲတွင် ပြိုကျခြင်းဖြစ်ပြီး သေဆုံးသူရုပ်အလောင်း ပြန်ရထားကာ ဒဏ်ရာရသူလေးဦးသည် ဆေးကုမှုခံယူနေရသည်။
” မနေ့က ပြိုလည်း ဒီနေ့ ကျောက်ရှာနေကြတာပဲ။ သတိလေးထားပြီး လုပ်နေကြရတာပေါ့။ မိုးကလည်းကောင်းနေတော့ စိုးရိမ်စရာဖြစ်ပါတယ်”ဟု ဖားကန့်ဒေသခံတစ်ဦးကပြောသည်။
Public Service Announcement
ဖားကန့်မြို့နယ်တွင် မတ်လဆန်းမှစတင်၍ မိုးရွာခဲ့သည်။ မြေစာပုံအချို့နှင့် နွံကန်အချို့မှာ မိုးကြီးပါက ပြိုကျမည့်အန္တရာယ်ရှိနေကြောင်း လူမှုကူညီကယ်ဆယ်ရေးလုပ်ဆောင်သူများက ဆိုသည်။
ဖားကန့်မြို့နယ်၊ နမ့်မှော်ကျေးရွာ၌ ပြီးခဲ့သည့် မတ်လ ၂၁ရက်နံနက်က ကျောက်လုပ်ကွက်တစ်ခုမှ နွံကန်ပေါက်ကျခဲ့သည်။ ရွှံ့နွံများသည် ကျေးရွာလမ်းမအတိုင်း ရွာအတွင်း စီးဝင်လာရာ နေအိမ်အချို့ပျက်စီးခဲ့သည်။ ဇန်နဝါရီကလည်း ဖားကန့်မြို့၊စပေါ့ကျေးရွာတွင် နွံကန်ပြိုကျ၍ ၃၂ဦးသေဆုံးပြီး နေအိမ်၅၀ကျော် ပျက်စီးခဲ့သည်။
