မန္တလေးမှာအုပ်စုလိုက် ဆိုင်ကယ်လုယက်တာ ၊ ခိုးတာတွေ ခပ်စိတ်စိတ်ဖြစ်လာ

မန္တလေးမှာ လူအုပ်စုလိုက် ဆိုင်ကယ်ခိုးမှုတွေ ၊ လုယက်မှုတွေ ဒီရက်ပိုင်းတွေမှာ ခပ်စိတ်စိတ်ဖြစ်ပွားလာပါတယ်။

ခိုးမှု ၊လုယက်မှု ကျူးလွန်သူတွေဟာ အုပ်စုလိုက်ကျုးလွန်ကြတာဖြစ်ပြီး လုယက်ခံရသူတွေကို ရန်ပြုတာတွေကြောင့် အသက်ဆုံးရှုံးရတာတွေရှိနေပါတယ်။

ခိုးတာ ၊လုယက်တာကိုလည်းညပိုင်းတင်မကဘဲ နေ့ခင်းအချိန်တွေပါ ကျုးလွန်လာတာကိုတွေ့ရပါတယ်။

လူရှင်းတဲ့လမ်းမတွေမှာ စောင့်ဆိုင်းနေပြီး လုယက်တာလို့ ကိုယ်တိုင်ကြုံတွေ့ခဲ့ရသူတစ်ဦးကပြောပါတယ်။

Public Service Announcement

” ကျွန်တော်က မြို့သစ်ဖက်ထဲမှာဖြစ်တာ၊လူကလည်းရှင်းနေတော့ နောက်ကနေပါလာပြီး ဆိုင်ကယ်ကိုစောင့်တွန်းတာ ၊ ဖြစ်ချင်တော့ ကားတစ်စီးကဝင်လာပြီးဘေးမှာလူတွေရောက်လာတာနဲ့ ထားခဲ့ကြတာ “လို့ ပြောပါတယ်။

မန္တလေးမြို့က နာမည်ကြီးလက်ဖက်ရည်ဆိုင်ပိုင်ရှင်တစ်ဦးလည်း ပြီးခဲ့တဲ့ရက်ပိုင်းက အုပ်စုလိုက် ဆိုင်ကယ်အလုခံရပြီး ရန်ပြုလို့ရခဲ့တဲ့ဒဏ်ရာနဲ့သေဆုံးခဲ့ရပါတယ်။

ဆိုင်ကယ် ပျောက်ဆုံးမှုတွေ ၊ လုယူခံရမှုတွေနဲ့ ပတ်သက်ပြီး အချို့က စစ်ကောင်စီလက်အောက်ခံ ရဲတပ်ဖွဲ့ထံသို့ သွားရောက်တိုင်ကြားမှုများရှိပေမယ့် အချို့ကတော့မတိုင်ကြားဘူးလို့သိရပါတယ်။

မန္တလေး မြရည်နန္ဒာအိမ်ရာနဲ့ အနီးရှိရပ်ကွက်က နေအိမ်တွေမှာတော့ ခြံစည်းရိုးတွေကို ဖျက်ပြီး ခြံဝင်းထဲက ဆိုင်ကယ်တွေကို လိုက်ထရပ်ကားပေါ်တင်ပြီး ခိုးယူတာတွေလည်း မကြာခဏဖြစ်ပွားနေပါတယ်။