မေ-၂၈၊၂၀၂၅။ကဖေး/People’s Spring
ဖားကန့်မြို့နယ်တွင် စစ်ကောင်စီ လက်နက်ကြီးကြောင့် ကလေးငယ်နှစ်ဦး သေဆုံးသွားပြီး စစ်ကောင်စီစစ်ကြောင်းက ဒေသခံပြည်သူများအား အကြမ်းဖက်ဖမ်းဆီးနေကြောင်း ကချင်လူအခွင့်အရေးစောင့်ကြည့်ရေးအဖွဲ့ – Kachin Human Rights Watch (KHRW)ကထုတ်ပြန်သည်။
ဖားကန့်မြို့နယ်၊ လုံးခင်းဒေသသို့ရောက်ရှိလာသည့်စစ်ကောင်စီစစ်ကြောင်းကမေလ၂၇ရက်ညတွင် လက်နက်ကြီးဖြင့်ပစ်ခတ်ရာ ဆိုင်းဖရာရွာမှ စစ်ဘေးရှောင်တဲအိမ်ပေါ်သို့ ကျရောက်ပေါက်ကွဲပြီးကလေးနှစ်ဦးသေဆုံးခဲ့သည်။
အသက် ၁၀နှစ် နှင့် ၁၂နှစ်အရွယ် ကလေးနှစ်ဦး သေဆုံးခြင်းဖြစ်ကြောင်း KHRW က ထုတ်ပြန်ထားသည်။
Public Service Announcement
ထို့အပြင်မေလ ၂၈ ရက်နေ့ မနက်ပိုင်းတွင်လည်း စစ်ကောင်စီက လက်နက်ကြီးဖြင့်ပစ်ခတ်မှုကြောင့် လုံးခင်းကျေးရွာအဝင်ရှိလယ်ပြင်တံတားနှင့် နေအိမ်အချို့ ပျက်စီးသွားခဲ့ပြီး ဒေသခံပြည်သူလူထုကိုလည်း မတရားအကြမ်းဖက်ဖမ်းဆီးနေကြောင်း ထုတ်ပြန်ထားသည်။
“စစ်ကောင်စစ်ကြောင်းကလုံးခင်းထဲမှာမွှေနေတယ်။နေ့လယ်က တစ်ယောက်ပစ်သတ်ခံရတယ်။ ခုနစ်ယောက်ဖမ်းသွားတယ်။ အပြင်မထွက်ကြဖို့ သတိပေးနေကြတယ် အချင်းချင်း”ဟုလုံးခင်းဒေသခံတဦးကပြောသည်။
မေ၂၈ရက်နံနက်အစောပိုင်းတွင်လုံးခင်းယန်းချက်စက်ရုံမှထွက်လာသည့် စစ်ကောင်စီစစ်ကြောင်းကို KIA၊PDF ပူးပေါင်းတပ်က တိုက်ခိုက်ခဲ့ပြီးတိုက်ပွဲဖြစ်ပွားခဲ့သည်။ တိုက်ခိုက်ခံရပြီးနောက် စစ်တပ်စစ်ကြောင်းသည် လုံးခင်းသံတံတားဟောင်းထိပ်တွင်း တပ်စွဲပြီး အရပ်သားများအားဖမ်းဆီးခဲ့သည်။
ဖမ်းဆီးထားသည့်အရပ်သားများကို တိုက်ပွဲအတွင်း လူသားဒိုင်းလုပ်နေကြောင်း ဒေသခံတစ်ဦးကပြောသည်။ညနေပိုင်းတွင် နံနက်ပိုင်းကကဲ့သို့ တိုက်ပွဲပြင်းပြင်းထန်ထန်မဖြစ်ပွားသော်လည်း သေနတ်ပစ် ခတ်သံများကြားနေရဆဲဟု ဒေသခံအချို့ကပြောသည်။
စစ်ကောင်စီစစ်ကြောင်းရောက်ရှိနေသည့် လုံးခင်းသည် ဖားကန့်နှင့် သုံးမိုင်ကျော်သာဝေးသည်။ လုံးခင်း-မှော်စီစာ-နမ္မဖြစ်-ဖားကန့်လမ်း၊ မှော်စီစာ – ဆောင်းချိန်-အမှိုက်ပုံ-ဖားကန့်လမ်း၊ လုံးခင်း-ငြိမ်းချမ်းသာယာ-မလန်း-နမ္မဖြစ်-ဖားကန့်လမ်းတို့ရှိသည်။ စစ်ကောင်စီသည် လုံးခင်း၌ပင်ရှိသေးပြီး ဖားကန့်သ်ို့ မည်သည့်လမ်းမှသွားမည်ကိုမသိရသေးပေ။
စစ်ကောင်စီစစ်ကြောင်း လုံးခင်းရွာအနီးရောက်ရှိလာ၍ ခုခံတိုက်ပွဲများတိုက်ခိုက်နေပြီး ဒေသခံများစစ်ရေးသတိပြုနေထိုင်ကြရန်၊စစ်ရေးသတင်းများအဆင်မပြတ်နားစွင့်နေရန် ကချင်လွတ်လပ်ရေးတပ်မတော်(KIA)ပြောခွင့်ရ ဗိုလ်မှူးကြီးနော်ဘူက ပြောကြားထားသည်။လုံးခင်းနှင့်ဖားကန့်ပတ်ဝန်းကျင်တွင် တိုက်ပွဲများဖြစ်ပွားလာနိုင်၍ ဘေးလွတ်ရာသို့အချိန်မီရှောင်ကြရန်နှင့် စစ်ရေးသတိရှိကြရန် KIA၊PDFတပ်ဖွဲ့ဝင်များကသတိပေးထားသည်။
ပြီးခဲ့သည်၂၀၂၄ခုနှစ် ဇူလိုင်လက ဆိုင်းတောင်ရွာအား KIA၊PDFက သိမ်းယူသည့်တိုက်ပွဲ ၌စစ်ကောင်စီသည်သံဃာတော်အချို့အပါအဝင် အရပ်သားများကို ဖမ်းဆီးပြီး လူသားဒိုင်းအဖြစ်အသုံးပြုခဲ့ဖူးသည်။
