စက်တင်ဘာ-၁၉၊၂၀၂၆။ရောင်နီ/People’s Spring
တနိုင်ငံလုံးအတိုင်းအတာနဲ့ System Breakdown ဖြစ်နေချိန် ရန်ကုန်မြို့ စမ်းချောင်းမြို့နယ်က ဆိုင်တစ်ဆိုင်မှာ မီးစက်နှိုးထားရာက အောက်ဆီဂျင်ပြတ်ပြီး အသက်ရှူကြပ်နေတဲ့ အမျိုးသမီး ၅ဦး ကို အရေးပေါ်ဌာနကိုပို့ပေးခဲ့ရတယ်လို့ အနာဂတ်အလင်းတန်း ပရဟိတအသင်းက အသိပေးထားပါတယ်။
စမ်းချောင်းမြို့နယ် သံတံတားလမ်းမှာရှိတဲ့ လက်သည်းအလှပြင်ဆိုင်မှာ ဒီနေ့(စက်တင်ဘာ၁၉) ည ၇ နာရီကျော်က မီးစက်နှိုးထားရာက အမျိုးသမီး ၅ဦး အသက်ရှူကြပ်မေ့မျောသွားတာကြောင့် ရန်ကုန်ဆေးရုံကြီးအရေးပေါ်ဌာနကပို့ဆောင်ပေးခဲ့ရတာလို့ အဆိုပါ အသင်းက ထုတ်ပြန်ထားပါတယ်။
ထုတ်ပြန်ထားတဲ့ ဓာတ်ပုံတွေအရ အသက်ရှူကြပ်သူတွေထဲမှာ ဆိုင်ဝန်ထမ်းတွေနဲ့ ဧည့်သည်တွေပါ ပါဝင်တာကို တွေ့ရပါတယ်။
Public Service Announcement
ဆေးရုံကိုပို့ဆောင်ပေးခဲ့သူတွေရဲ့ နောက်ဆက်တွဲအခြေအနေကိုတော့ လူထုနွေဦး အနေနဲ့ သီးခြားအတည်မပြုနိုင်သေးပါဘူး။
ရန်ကုန်အပါအဝင် တနိုင်ငံလုံးအတိုင်းအတာနဲ့ ဒီနေ့ညနေ ၅နာရီခွဲလောက်မှာ System Breakdown ဖြစ်ပြီး လျှပ်စစ်မီးတွေပြတ်တောက်သွားတာလို့ စစ်တပ်လက်အောက်ခံ လျှပ်စစ်ဝန်ကြီးဌာနကထုတ်ပြန်ထားပါတယ်။
မီးပျက်ချိန် အဲကွန်းအလုံခန်းတွေမှာ မီးစက်အသုံးပြုတာကြောင့် အသက်ရှုကြပ်ပြီးသေဆုံးတဲ့ ဖြစ်စဉ်တွေလည်း အရင်ကဖြစ်ခဲ့ဖူးပါတယ်။
“မနှစ်ကလား တစ်နှစ်ကလား ရွှေလောင်းလမ်းမှာလည်း မိသားစု တစ်ခုလုံး ဆုံးသွားတာလေ ပေါ့လို့မရဘူးနော် မီးစက် ဒုက္ခက” လို့ ဒေသခံတစ်ဦးက မှတ်ချက်ရေးသားထားပါတယ်။
