ထိကပလယ်စခန်းမှထွက်ပြေး စစ်သားများတိုက်ခိုက်ခံရပြီး အထိနာ ၊ လက်နက်မျိုးစုံ ၁၆ လက်ထက်မနည်းပူးပေါင်းတပ်သိမ်းဆည်းရရှိ

ဇွန်-၂၄၊၂၀၂၅။ထားမြတ်/People’s Spring

မြန်မာ-ထိုင်းနယ်စပ်ရှိ ထိကပလယ် တပ်စခန်းမှ ထွက်ပြေးသည့် စစ်သားများကို KNU ဦးဆောင်သည့် တော်လှန်ရေးပူးပေါင်းတပ်က လိုက်လံတိုက်ခိုက်ခဲ့ရာ စစ်တပ်အထိနာခဲ့ဟုကရင်သတင်းရင်းမြစ်တဦးက ပြောသည်။

ထိကပလယ်စခန်းကို ကရင်အမျိုးသားလွတ်မြောက်ရေးတပ်မတော်(KNLA)၊ ကရင်အမျိုးသားကာကွယ်ရေးတပ်ဖွဲ့(KNDO)၊ ပြည်သူ့ကာကွယ်ရေးတပ်မတော်(PDF) ပါဝင်သည့် တော်လှန်ရေး ပူးပေါင်းတပ်က ဇွန်လ ၂၂ရက်တွင် သိမ်းပိုက်နိုင်ခဲ့ခြင်းဖြစ်သည်။

“KNDO တပ်ရင်း(၈)နဲ့ KNLA လိုက်ရှင်းတာပေါ့။ဒီနေ့တော့ ထီးကပလယ် ရန်သူထွက်ပြေး တချို့ လမ်းတဝက်မှာ ၂နာရီကျော် စစ်ဖြစ်နေတယ်” ဟု ကရင်သတင်းရင်းမြစ်ကဇွန်လ ၂၄ရက် နေ့လည်တွင် ပြောပြသည်။

Public Service Announcement

စစ်သားများသေဆုံးထိခိုက်မှုများရှိပြီး အထိနာခဲ့ကာ လက်နက်ခဲယမ်းများရရှိခဲ့ဟု သတင်းရင်းမြစ်က ပြောသည်။ထွက်​ပြေးစစ်သားများထံမှ လက်နက်ကြီး၊ လက်နက်ငယ်မျိုးစုံ ၁၆လက်ထက်မနည်း တော်လှန်ရေးပူးပေါင်းတပ်က သိမ်းဆည်းနိုင်ခဲ့သည်ကို People’s Spring ရရှိသည့်သတင်းဓါတ်ပုံတွင်​တွေ့ရသည်။

ထိကပလယ် တပ်စခန်းသည် ယခင်က KNU ဗဟိုဌာနချုပ် အဖြစ် ၂နှစ်ကြာ အသုံးပြုခဲ့သည့် နေရာဖြစ်ပြီး ၁၉၉၇တွင် စစ်တပ်က ထိုးစစ်ဆင်သိမ်းပိုက်သွားခဲ့ရာ ၂၈နှစ်အကြာတွင် KNUက ပြန်လည်သိမ်းပိုက်နိုင်ခဲ့ခြင်းဖြစ်သည်။

ထိကလပယ် စခန်းအပါအဝင် KNU တပ်မဟာ(၆)နယ်မြေရှိ စစ်ကောင်စီ၏ နယ်စပ်တပ်စခန်းများကို တော်လှန်ရေး ပူးပေါင်းတပ်က ဆက်တိုက်သိမ်းပိုက်လျက်ရှိရာ မေလ ၂၃ရက်နောက်ပိုင်း ဘလက်ဒိုတပ်စခန်း၊ ကနဲလေးတပ်စခန်း၊ ရွှေအေးမြိုင်တပ်စခန်း၊ ဘုရင့်နောင်တပ်စခန်း၊ မော်ခီးတပ်စခန်း၊ သေ့ဘောဘိုးတပ်စခန်း တို့ကိုဆက်တိုက် သိမ်းပိုက်နိုင်ခဲ့သည်။

လက်ရှိတွင် မြ၀တီမြို့နယ် မြန်မာ-ထိုင်းနယ်စပ်တွင် ဥကရစ်ထစခန်း၊ဝေါ်လေဗျူဟာ နှင့် တိသဲလယ် ကာကင်းစခန်း သုံးခုသာ ကျန်ရှိတော့ပြီး ယင်းစခန်းများကို သိမ်းပိုက်နိုင်ရေး ဆက်လက်လုပ်ဆောင်မည်ဟု KNU သတင်းရင်းမြစ်က ပြောသည်။