မီတာခမဆောင်လျှင် လျှပ်စစ်မီးဖြတ်တောက်မည်ဟု သတင်းထွက်ချိန် ခရမ်းလျှပ်စစ်ရုံး ဗုံးကွဲ

မီတာခမဆောင်လျှင် လျှပ်စစ်မီးဖြတ်တောက်မည်ဟု သတင်းများထွက်ပေါ်နေချိန် ခရမ်းမြို့လျှပ်စစ်မန်​နေဂျာရုံး ယနေ့(နိုဝင်ဘာ ၁၆)နံနက် ၁၀ နာရီကျော်က ဗုံးပေါက်ကွဲမှုဖြစ်ပွားခဲ့သည်။

အဆိုပါ ဗုံးပေါက်ကွဲမှုကြောင့် ခရမ်းမြို့နယ်လျှပ်စစ်ရုံးအတွင်း ယာယီနေထိုင်သည့် စစ်ကောင်စီတပ်မှ အရာရှိတစ်ဦး၏ နေအိမ်လိုင်းခန်း အနည်းငယ်ထိခိုက်ကာ မျက်နှာကျက်အချို့ ပျက်စီးသွားသည်ဟု ဒေသခံများက ပြောသည်။

ယခုရက်ပိုင်းအတွင်း ခရမ်းမြို့စီမံအုပ်ချုပ်ရေးကောင်စီ ၏ညွှန်ကြားချက်အရ မီတာခမဆောင်သည့်နေအိမ်များအား လျှပ်စစ်မီးဖြတ်တောက်မည်ဟု သတင်းများထွက်ပေါ်နေချိန် အထက်ပါအတိုင်း ပေါက်ကွဲမှုဖြစ်ပွားခဲ့ခြင်း ဖြစ်သည်။

ခရမ်းမြို့နယ်တွင်း မီတာခကောက်ခံမှုများလုပ်ဆောင်လျက်ရှိရာ လျှပ်စစ်မီးသွယ်တန်းထားသည့် ကျေးလက်ဒေသများ၌ နယ်ခံနေ့စားဝန်ထမ်းနှင့်အတူ မြို့နယ်လျှပ်စစ်ဝန်ထမ်းအချို့က မီတာခကောက်ခံခဲ့ရာ မီတာခမဆောင်သည့်နေအိမ် အများအပြားရှိနေသည်။

Public Service Announcement

အချို့ကျေးရွာများတွင် ဇွန်လကုန်အထိနှင့် အချို့ကျေးရွာများ၌ ဇူလိုင်ကုန်အထိ မီတာခကောက်ခံပြီးဖြစ်သော်လည်း သြဂုတ်နှင့် စက်တင်ဘာလများအတွက် မီတာခကောက်ခံခြင်း မရှိသေးပေ။

ခရမ်းမြို့နယ်တွင် ဖေဖော်ဝါရီ ၁ ရက်စစ်တပ်မှအာဏာသိမ်းပြီးအစောပိုင်းကာလများအထိ လျှပ်စစ်မီးပုံမှန်ရရှိခဲ့သော်လည်း ပြီးခဲ့သည့် နှစ်လခန့်ကတည်းက နေ့စဉ်အချိန်ပိုင်းအနေဖြင့်သာ လျှပ်စစ်မီးရရှိတော့ကြောင်း ဒေသခံများက ဆိုသည်။

(ခရမ်းမြို့နယ်ပြည်သူများ လမ်းပေါ်ထွက်ဆန္ဒပြစဉ်က မြို့နယ် EPC ရုံးရှေ့ စစ်ကောင်စီတပ်များနေရာယူထားစဉ်၊ ဓာတ်ပုံ – Khayan Channal)