ယူကရိန်းအတွက် အမေရိကန်လုပ် Patriot လေကြောင်းကာကွယ်ရေး ဒုံးခွင်းဒုံး စနစ်တွေ ပေးပို့သွားမယ်လို့ အမေရိကန် သမ္မတ ဒေါ်နယ်လ်ထရမ့်က ပြောကြားလိုက်ပါတယ်။
ရုရှားသမ္မတ ဗလာဒီမာ ပူတင်ဟာ သူနဲ့ဆွေးနွေးတိုင်း စကားကို ချိုချိုသာသာ ပြေပြေပြစ်ပြစ် ပြောနေပေမယ့် ညနေပိုင်းရောက်တာနဲ့ ယူကရိန်းကို ဗုံးကြဲနေလေ့ ရှိတာကြောင့် အဲဒီရန်ကနေ ယူကရိန်းက တုံ့ပြန် ကာကွယ်ဖို့ လိုအပ်နေပြီလို့ ထရမ့်က ဆိုပါတယ်။
ရုရှားရဲ့ လေကြောင်းတိုက်ခိုက်မှုတွေကို ထိထိရောက်ရောက် ဟန့်တားနိုင်စေမယ့် Patriot စနစ်ပေါင်း ဘယ်နှခုထိ ယူကရိန်းဆီ ပေးပို့မလဲ ဆိုတာကိုတော့ ထရမ့်က အတိအကျ ထုတ်မပြောပါဘူး။ ဒါပေမဲ့ လက်နက် စနစ်တွေအတွက် ကုန်ကျစရိတ်ကိုတော့ ဥရောပ သမဂ္ဂ (EU) အဖွဲ့ဝင် နိုင်ငံတွေဆီက ပြန်ယူဖို့ သဘောတူထားကြောင်း ထရမ့်က ဆိုပါတယ်။
ထရမ့်ဟာ ရုရှားနဲ့ ယူကရိန်းကြား အပစ်အခတ် ရပ်စဲရေးကို ကြားဝင် စေ့စပ် ညှိနှိုင်းပေးနေပေမယ့် ပူတင်က ကြိုးရှည်ရှည်နဲ့ လှန်ထားသလို ဗျူဟာမျိုး အသုံးပြုနေတဲ့အပေါ် အတော်ကြီး စိတ်မရှည် ဖြစ်လာဟန် တူပါတယ်။
Public Service Announcement
ယူကရိန်း သမ္မတ ဗိုလိုဒီမာ ဇီလန်စကီးကတော့ နေ့စဉ်ရက်ဆက် ရုရှားက ဒရုန်းတွေ၊ ဒုံးကျည်တွေနဲ့ ဗုံးမိုးရွာနေတာကို တွန်းလှန်ဖို့ နိုင်ငံရဲ့ ကာကွယ်ရေး စွမ်းရည်ကို ပိုမို ဖြည့်တင်းဖို့ လိုနေကြောင်း ပြောကြားထားပါတယ်။
ထရမ့်က အမေရိကန်ဟာ ယူကရိန်းဆီ Patriotတွေကို ပေးပို့မှာဖြစ်ကြောင်း၊ ယူကရိန်းကလည်း အဲဒီလက်နက် စနစ်တွေကို တကယ်ပဲ လိုအပ်နေကြောင်း၊ ပူတင်ကြောင်း လူတိုင်း အံ့ဩနေကြပြီး ဒီပုဂ္ဂိုလ်ဟာ ဆွေးနွေးနေတဲ့အချိန် စကားကို ချိုချိုလေး ပြောပေမယ့် ညနေကျရင် လူတိုင်းကို ဗုံးပတ်ကြဲနေကြောင်း၊ ဒီကိစ္စနဲ့ ပတ်သက်ရင် ပြဿနာနည်းနည်း ရှိတယ်လို့ ခံစားမိပြီး သူကတော့ လုံးဝ သဘောမကျကြောင်း ထရမ့်က ဝါရှင်တန်ဒီစီ မြို့တော် အပြင်ဖက်က အန်ဒရူးစ် လေတပ်စခန်းမှာ သတင်းထောက်တွေကို ပြောကြားခဲ့ပါတယ်။
ထရမ့်က အမေရိကန်ဟာ ယူကရိန်းဆီ အဆင့်မြင့် စစ်သုံးပစ္စည်း အမျိုးမျိုးကိုလည်း ပေးပို့သွားမှာဖြစ်ကြောင်း၊ အဲဒီအတွက် ကုန်ကျစရိတ် အပြည့်ကိုလည်း ပြန်တောင်းခံမှာဖြစ်ကြောင်း၊ ဒါက အမေရိကန် ဖြစ်စေချင်တဲ့ ပုံစံမျိုးလို့ ဆိုနိုင်ကြောင်းလည်း ဆက်ပြောပါတယ်။
ထရမ့်ဟာ ယူကရိန်း အရေးနဲ့ ပတ်သက်ပြီး ဆွေးနွေးဖို့ အခုသီတင်းပတ်ထဲမှာ NATO စစ်မဟာမိတ် အကြီးအကဲ မတ်ခ်ရူတေးနဲ့လည်း တွေ့ဆုံသွားမယ်လို့ သိရပါတယ်။
ကိုးကား: Reuters
