ဧရာဝတီတိုင်းအတွင်း အာဏာသိမ်းစစ်ကောင်စီအားခုခံ တိုက်ခိုက်မှုအရှိန်မြင့်တက်လာပြီးနောက် စစ်ကောင်စီဒေါက်တိုင် Non CDMဝန်ထမ်းများသည် နေအိမ်နှင့်ရုံးများတွင် ညမအိပ်ရဲတော့ဘဲ နေရာပြောင်းရွှေ့အိပ်နေကြကြောင်းသိ့ရသည်။
“ကျွန်တော့ အစ်မက Non CDMဝန်ထမ်း။အစကရုံးမှာနေတာ။ အခုသူကြောက်နေပြီး ဘယ်မှာ အိပ်တယ်ဆိုတာ မေးမရဘူး”ဟု ဧရာဝတီတိုင်း ပြန်ဆက်ဌာနမှရုံးမှ အရာရှိတစ်ဦး၏ မိသားစုဝင်တစ်ဦးကပြောသည်။
ဧရာဝတီတိုင်းသည် စစ်ကိုင်းနှင့်မကွေးတိုင်းကဲ့သို့ စစ်ကောင်စီအား ထိပ်တိုက်ရင်ဆိုင် တိုက်ပွဲမဖြစ်သေးသော်လည်း ပြည်သူ့ကာကွယ်ရေးပြောက်ကျားအဖွဲ့များက စစ်ကောင်စီဒေါက်တိုင်များကို လိုက်လံတိုက်လိုက်မှု အရှိန် ရလာနေသည်။
ကန်ကြီးထောင့်မြို့တွင် စစ်ကောင်စီတပ်ကားအား ဗုံးပစ်သွင်းတိုက်ခိုက်ခဲ့မှု၊ ပုသိမ်တွင် စစ်ကောင်စီ၏ ယာဉ်ထိန်းရဲနှစ်ဦးအား ပစ်ခတ်သတ်ဖြတ်ခြင်းတို့ကို
မကြာသေးမီးကလုပ်ဆောင်ခဲ့သည်။ ယမန်နေ့(နိုဝင်ဘာ ၁၅ရက်)က ဆိုလျင်စစ်ကောင်စီ၏ ဟိုတယ်ခရီးဝန်ကြီးနှင့် ဧရာဝတီတိုင်းဝန်ကြီးချုပ်လိုက်ပါလာသော စစ်ကောင်စီတပ်သားများစွာပါဝင်သည့် ယာဉ်တန်းကို ချောင်းသာ-ပုသိမ်လမ်းတွင် တော်လှန်ရေးလေးဖွဲ့ကပူးပေါင်းတိုက်ခိုက်ခဲ့ရာ အနည်းဆုံး ၁၀ ဦးသေဆုံးခဲ့သည်။ ထိုအပြင် ယနေ့(နိုဝင်ဘာ ၁၆တွင် )ညနေတွင် ပုသိမ်မြို့ကမ်းနားလမ်းရှိ ရေကြောင်းရဲတပ်ဖွဲ့စခန်းကို လက်နက်ကိုင်အဖွဲ့တစ်ဖွဲ့က
ဝင်ပစ်ရာရဲ လေးဦးဒဏ်ရာရရှိကြောင်းဒေသခံအချို့ကပြောသည်။
Public Service Announcement
ထို့အပြင် စစ်ကောင်စီ၏ဒေါက်တိုင် Non CDM ဝန်ထမ်းများအားစစ်ကောင်စီကို အလုပ်အကျွေးမပြူဘဲ ပြည်သူနှင့် ပူးပေါင်းရန်ဒေသခံကာကွယ်ရေးတပ်ဖွဲ့များကတိုက်တွန်းထားသည်။
“ကျမတို့ စိုးရိမ်ပေမယ့် အခြေအနေအရ ထွက်မရဘူး။ ဘာလုပ်ရမယ်မှန်းလည်း မသိဘူး။ ထွက်ရင်လည်း စကစက ပြဿနာရှာမှာ။ အိမ်မှာလည်း ကျမမရှိရင်မရဘူး”ဟု အထွေထွေအုပ်ချုပ်ရေးဦးစီးဌာနမှ ခရိုင်အဆင့် အရာရှိတစ်ဦးကပြောသည်။
မကြာသေးမီက မြောင်းမြမြို့မှ ပြန်ဆက်ဌာန အမျိုးသမီးအရာရှိတစ်ဦးသည် စစ်ကောင်စီအလိုကျ အင်တာဗျုးကို ဖြေကြားပြီး သတင်းအဖြစ်ထုတ်လွှင့်ခဲ့ရာ ပြည်သူ့ကာကွယ်ရေးတပ်ဖွဲ့အချို့၏ သတိပေးခြင်းခံခဲ့ရသည်။ ယင်းအမျိုးသမီးကို ဧရာဝတီတိုင်းဒေသကြီး ပြန်ဆက်ဦးစီးမှုး ဦးလှမျိုးအောင်အစီအစဉ်ဖြင့် တိုင်းရုံးသို့ ပြန်ခေါ်ယူထားခဲ့ရသည်။ ဦးလှမျိုးအောင်ကိုယ်တိုင်ကလည်း စစ်ကောင်စီဒေါက်တိုင်အဖြစ် နာမည်ကြီးနေသည်။
Non-CDM ဝန်ထမ်းအချို့ကစိုးရိမ်နေသော်လည်းအမျိုးသားညီညွတ်ရေးအစိုးရက အရပ်သားများကို Non-CDM ဝန်ထမ်းများကို ပစ်မှတ်ထားတိုက်ခိုက်မူဝါဒမရှိဘဲ ၊PDFများကိုရော ၊၎င်းတို့လက်အောက်ရှိ ဒေသခံပြည်သူ့ကာကွယ်ရေးအဖွဲ့(LDF)များကိုပါ ကျင့်ဝတ်များစနစ်တကျလိုက်နာရန် တိုက်တွန်းထားသည်။
(ပုသိမ်မြို့လယ်တစ်နေရာကို ပြည်သူ့အစိုးရလက်ထက်ကတွေ့ရစဥ် )
