ဇူလိုင် – ၂၄ ၊၂၀၂၅ /People’s Spring
ဒီနေ့တိုက်ပွဲမှာ လေတပ်ရဲ့ F -16 တိုက်လေယာဉ်တွေဟာ ကမ္ဘောဒီးယားစစ်တပ်ရဲ့ အမိန့်ပေးတပ်စခန်းတွေကို တိတိကျကျဗုံးကြဲ တိုက်ခိုက်နိုင်ခဲ့တယ်လို့ ထိုင်းစစ်တပ်က ထုတ်ပြန်တဲ့ဓာတ်ပုံတွေကို ဘန်ကောက်ပို့စ်သတင်းဌာနက ဖော်ပြလာပါတယ်။
ဗုံးကြဲတိုက်ခိုက်မှုတွေဟာကမ္ဘောဒီးယားရဲ့အမှတ်၈နဲ့ အမှတ် ၉စစ်နယ် မြေ တပ်စခန်းတွေကို ဖျက်ဆီးနိုင်ခဲ့တယ်လို့လည်း ဆိုပါတယ်။
အဲဒီ တပ်စခန်းတွေဟာ ထိုင်းဘက်ခြမ်းကို လက်နက်ကြီးနဲ့ပစ်ခတ်ရာမှာ အဓိကကျတဲ့ တပ်စခန်းတွေဖြစ်တယ်လို့ ဘန်ကောက်ပို့စ်ကရေးသားပါတယ်။
Public Service Announcement
ထိုင်းမီဒီယာတွေမှာတော့ ဒီမနက်တိုက်ပွဲမှာ ကမ္ဘာဒီးယားက အတွဲလိုက်ပစ်ဒုံးတွေနဲ့ ထိုင်းဘက်ခြမ်းကို ပစ်ခတ်ခဲ့တယ်လို့ ဆိုထားပါတယ်။ အဲဒီ လက်နက်ကြီး ကျည်ဟာ နယ်စပ်နားက ထိုင်းရဲ့ ဆစ်စကက် ပြည်နယ်ထဲက ဘန်ဖျူးမှာ ဆီဆိုင်တစ်ခု ထိမှန်ပြီး မီးလောင်နေတဲ့ ဓာတ်ပုံတွေကိုဖော်ပြပါတယ်။
ဒီနောက်မှာတော့ နယ်စပ်မှာရှိတဲ့ ကမ္ဘောဒီးယားက စစ်ရေး ပစ်မှတ်တွေကို တုံ့ပြန်ဖို့ ထိုင်းလေတပ်က F-16 တိုက်လေယာဉ် ၆ စီးကို စေလွှတ်ခဲ့ကြောင်း ထုတ်ပြန်ထားခဲ့ပါတယ်။
ထိုင်းတိုက်လေယာဉ်တွေဟာ ကမ္ဘောဒီးယား ထိန်းချုပ်နယ်မြေထဲကို အနည်းဆုံး ဗုံးနှစ်လုံး ကြဲချခဲ့တယ်လို့လည်း ကမ္ဘောဒီးယား သတင်းဌာန Khmer Times ဖော်ပြပါတယ်။
