ချောင်းဦးမှာကင်းပုန်းဝပ်မယ့် စစ်သား ၄ ဦးတိုက်ခိုက်ခံရပြီး ၄ ဦးလုံးသေ၊​သေနတ် ၄ လက်သိမ်းဆည်းခံရ

ဇူလိုင်-၂၅၊၂၀၂၅။ဇေအောင်၊ရဲ​ခေါင်/People’s Spring

စစ်ကိုင်းတိုင်း၊ ချောင်းဦးမြို့ပေါ်မှာစစ်ကောင်စီယာဥ်တန်းလုံခြုံရေးအတွက်ကင်းပုန်းဝပ်မယ့် စစ်သား ၄ ဦး တိုက်ခိုက်ခံရပြီး ၄ ဦးလုံးသေဆုံးကာ လက်နက်ခဲယမ်းတွေကို ​တော်လှန်ရေးအဖွဲ့တွေကသိမ်းဆည်းရရှိခဲ့ပါတယ်။

ဇူလိုင်၂၃ရက်နေ့ မနက်၅နာရီခွဲခန့်က ချောင်းဦးမြို့၊ ဆည်မြောင်းရုံးအနီးမုံရွာ-မန္တလေးလမ်းမကြီးပေါ်မှာဆိုင်ကယ် ၂စီးနဲ့ ကင်းပုန်းဝပ်ဖို့ ထွက်လာတဲ့ စစ်ကောင်စီတပ်သား ၄ဦးကို ကာကွယ်ရေးအဖွဲ့တွေက တိုက်ခိုက်ခဲ့တာပါ။

အဲဒီတိုက်ခိုက်မှုကြောင့်စစ်သား (၄)ဦးလုံးသေဆုံးပြီး MA 3 ၁ လက်၊ MA 11 ၃ လက်၊ လက်ပစ်ဗုံး ၃ လုံး၊ ဖုန်း ၂ လုံး၊ ၅.၅၆ ကျည် ၄၀၀ တောင့်နဲ့ ဆိုင်ကယ် ၂ စီးကိုပါ သိမ်းဆည်းခဲ့တယ်လို့ Brave Heart Army အဖွဲ့ရဲ့ တာဝန်ရှိသူက ပြောပါတယ်။

Public Service Announcement

“ချောင်းဦးမြို့ပေါ်ကနေမနက်ခင်းအစောပိုင်းကင်းပုန်းဝပ်ဖို့ထွက်လာတဲ့အကောင်တွေ။ဆိုင်ကယ်နှစ်စီးလေးယောက်နဲ့။ ဒီကောင်တွေက ကျွန်တော်တို့ သတ်ကွင်းထဲအထိ ရောက်တဲ့အနေအထားမျိုး။ ကျွန်တော်တို့ သတင်းကြိုရလို့စောင့်တဲ့အနေအထားမှာ ကျွန်တော်တို့ သတ်ကွင်းထဲအထိလည်းရောက်တယ်။ သူတို့ဘာမှလည်း ပြန်ပြီး ပစ်ခတ်နိုင်ခြင်းမရှိဘူး။ တိုက်ပွဲချိန်ကလည်း ဘာမှမကြာလိုက်ဘူး။”လို့ BHA ရဲ့ တာဝန်ရှိသူက​ပြောပါတယ်။

ရုပ်သံဖိုင်နဲ့ တကွသတင်းထုတ်ပြန်တာမှာလည်း အရပ်သားဝတ်စုံဝတ်ပြီး ကျည်ကာအီင်္ကျီဝတ်ထားတဲ့စစ်သား​လေးဦး ​သေဆုံးခဲ့တာကိုလည်း​တွေ့ရပါတယ်။

အဲဒီစစ်ဆင်ရေးကို ချောင်းဦးမြို့နယ်ပကဖ အမှတ်(၁)တိုက်နယ်တိုက်ခိုက်ရေးတပ်စိပ် နဲ့ Brave Heart Army (BHA Local PDF) တို့ ပူးပေါင်းပြီး တိုက်ခိုက်ခဲ့တာဖြစ်ကြောင်း သိရပါတယ်။

ဇူလိုင် ၂၃ရက်နေ့မနက်က စစ်တပ်ယာဥ်တွေဖြတ်သန်းမှာမို့ မုံရွာ-မန္တလေးလမ်းပေါ် မုံရွာနဲ့ ချောင်းဦးကြားမှာ စစ်တပ်က ကင်းပုန်းတွေချထားခဲ့ပြီး ရမ်းသမ်းပစ်ခတ်တာတွေပါရှိခဲ့လို့ ကားတွေပိတ်မိခဲ့ပါသေးတယ်။

ပြီးခဲ့တဲ့ ဇွန်လ ၁၆ ရက်ကလည်း စစ်ကိုင်းတိုင်း၊ ချောင်းဦးမြို့နယ်မှာ စစ်အုပ်စုရဲ့ အိမ်စီးကားတစ်စီးကို BHA က ပစ်ခတ်တိုက်ခိုက်ရာ သုံးပွင့်ဗိုလ်တစ်ဦးအပါ အဝင် ၃ ဦးသေဆုံးပြီး လက်နက်ခဲယမ်းတွေ သိမ်း ဆည်းရမိခဲ့ပါတယ်။

ထိုတိုက်ခိုက်မှုကနေ MA1၊ ပါရီ၊ MA5၊ M9၊ sig batter စုစုပေါင်း သေနတ် ၅ လက် သိမ်းဆည်းရမိပြီး ကားအား မီးရှို့ဖျက်ဆီးခဲ့ကြောင်း BHAက အသိပေးထားပါတယ်။

စစ်ကိုင်းတိုင်း၊ မုံရွာနဲ့ ချောင်းဦးမြို့နယ်တွေမှာ စစ်အုပ်စုဝင်တွေဟာ စစ်တပ်ကယာဥ်တွေနဲ့လာတိုင်း တိုက်ခိုက်ခံရလို့အိမ်စီးကားတွေနဲ့အပြင်ခရီးသည်

တင်ယာဥ်တွေပေါ်မှာပါ လိုက်ပါနေတယ်လို့ ဒေသတွင်းတော်လှန်ရေးတပ်ဖွဲ့တွေဆီကနေသိရပါတယ်။