နောင်ချိုနှင့်ကျောက်မဲ စစ်ကောင်စီလေကြောင်းတိုက်ခိုက်၍ ပြည်သူတစ်ဦး သေဆုံး၊ ၃ဦး ဒဏ်ရာရ

ဇူလိုင်-၂၇၊ ၂၀၂၅။ထားမြတ်/People’s Spring

ရှမ်းပြည်နယ်မြောက်ပိုင်း၊နောင်ချိုနှင့်ကျောက်မဲမြို့နယ်တို့ကိုစစ်ကောင်စီတပ်ကလေကြောင်းမှ ဗုံးကြဲတိုက်ခိုက်ခြင်း၊ လက်နက်ကြီးဖြင့် ပစ်ခတ်၍ ပြည်သူသေဆုံးထိခိုက်မှုရှိခဲ့ကြောင်း တအာင်းတပ်မတော်(TNLA)က ယနေ့ (ဇူလိုင်၂၇ရက်) သတင်းထုတ်ပြန်သည်။

ဇူလိုင်၂၆ရက်ညပိုင်းတွင်နောင်ချိုမြို့နယ်၊ဟိုခိုကျေးရွာကိုစစ်ကောင်စီတပ်ကတိုက်လေယာဉ်ဖြင့် ဗုံးကြဲခဲ့ရာ ပြည်သူ သုံးဦး ပြင်းထန်စွာ ဒဏ်ရာရရှိခဲ့ပြီး နေအိမ်တစ်လုံး ပျက်စီးခဲ့သည်ဟု ဖော်ပြသည်။

စစ်ကောင်စီသည် တိုက်ပွဲဖြစ်ပွားခြင်းမရှိသည့် ကျောက်မဲမြို့နယ် နောင်ပိန်ကျေးရွာကိုလည်းစစ်ကောင်စီက လက်နက်ကြီးဖြင့် ပစ်ခတ်ခဲ့ရာ စစ်ရှောင်နေသည့်အမျိုးသား တစ်ဦး ထိမှန်သေဆုံးခဲ့ဟု အသိပေးသည်။

Public Service Announcement

စစ်ကောင်စီသည် ဇူလိုင် ၁၈ရက်ကလည်း ကျောက်မဲမြိုနယ်၊ အထက်ကြူရှောကျေးရွာကို တိုက်ပွဲဖြစ်ပွားခြင်းမရှိဘဲ လေကြောင်းမှ ဗုံးကြဲခဲ့ရာ အမျိုးသားတစ်ဦး ဒဏ်ရာရရှိကာ နေအိမ် ၈လုံးပျက်စီးခဲ့သည်။

နောင်ပိန်နှင့်အထက်ကြူရှောကျေးရွာအပါအဝင်စစ်ကောင်စီသည် ဇူလိုင်လအတွင်း ကျောက်မဲမြို့နယ်ကို လေကြောင်းတိုက်ခိုက်မှု ၆ကြိမ်ထက်မနည်း ပြုလုပ်ခဲ့ရာ ပြည်သူ ၂ဦးသေဆုံးပြီး ၁၅ဦး ဒဏ်ရာရရှိခဲ့သည်။

ထို့ပြင် နေအိမ် ၃၄လုံး၊ အဆောက်အဦး ငါးလုံးနှင့် စာသင်ကျောင်း တစ်ကျောင်းတို့ ထိမှန်ပျက်စီးခဲ့ဟု ဖော်ပြသည်။

စစ်ကောင်စီတပ်သည် ဇူလိုင်လလယ်တွင် TNLAထိန်းချုပ်ထားသည့် နောင်ချိုမြို့ကို ပြန်လည်သိမ်းပိုက်နိုင်ခဲ့သည်။

ထိုသို့ TNLAဘက်က ဆုတ်ခွာခဲ့ရသော်လည်း နောင်ချိုမြို့တွင်တိုက်ပွဲများ ဆက်ရှိနေမည်ဖြစ်ကြောင်း TNLA က အသိပေးထားသည်။

ပြည်သူများအနေဖြင့် စစ်ကောင်စီ၏ ဗုံးကြဲတိုက်ခိုက်မှုများ ရှောင်ရှားနိုင်ရေး စစ်ရေးအမြဲသတိရှိရန်နှင့် လေကြောင်းရန်ကာကွယ်ရေးဆိုင်ရာနည်းလမ်းများ လိုက်နာဆောင်ရွက်ရန် TNLAက နှိုးဆော်ထားသည်။