ဩဂုတ်-၅၊ ၂၀၂၅။ ထားမြတ်/People’s Spring
ကရင်အမျိုးသားအစည်းအရုံး(KNU) တပ်မဟာ (၃)ညောင်လေးပင်ခရိုင် ကျောက်ကြီး(လယ်ဒို) တွင် ရေကြီးရေလျှံမှုများကြောင့် ကျေးရွာပေါင်း ၈၀ကျော်မှ ပြည်သူများ ရေဘေးကြုံနေကြရဟု KNUဗဟိုက ယနေ့ (ဩဂုတ် ၅ရက်)တွင် သတင်းထုတ်ပြန်သည်။
အဆိုပါဒေသတွင် ဇူလိုင် ၂၄ရက်မှ စတင်၍ ရေကြီးရေလျှံမှုဖြစ်ပွားနေခြင်းဖြစ်သည်ဟုဆိုသည်။
မိုးသည်းထန်စွာရွာသွန်းပြီး စစ်တောင်းမြစ်ရေ ရေကြီးရေလျှံမှုကြောင့် ဒေသတွင်းကျေးရွာအုပ်စု ၂၄ ခုတွင် ယခုအချိန်ထိ ရေနစ် မြုပ်ကာ ကျေးရွာ ၈၀၊ အိမ်ခြေ ၅၀၀၀ကျော်၊ လူဦးရေ ၂၈,၀၀၀ကျော် ရေဘေးသင့်နေသည်ဟု အသိပေးသည်။
Public Service Announcement
ညောင်လေးပင်ခရိုင် ကျောက်ကြီး(လယ်ဒို)တွင် ရေကြီးရေလျှံမှုများကြောင့် ကျေးရွာများ ရေနစ်မြုပ်နေစဉ်။ ဓာတ်ပုံ – KNU ညောင်လေးပင်ခရိုင် ကျောက်ကြီး(လယ်ဒို)တွင် ရေကြီးရေလျှံမှုများကြောင့် ကျေးရွာများ ရေနစ်မြုပ်နေစဉ်။ ဓာတ်ပုံ – KNU ညောင်လေးပင်ခရိုင် ကျောက်ကြီး(လယ်ဒို)တွင် ရေကြီးရေလျှံမှုများကြောင့် ကျေးရွာများ ရေနစ်မြုပ်နေစဉ်။ ဓာတ်ပုံ – KNU
ထို့အပြင် စပါးစိုက်ပျိုးထားသည့် လယ်ဧက သုံးသောင်းကျော် ရေလွှမ်းမိုးပျက်စီးခဲ့ရဟု ထုတ်ပြန်သည်။ရေဘေးကြောင့်စာသင်ကျောင်း၄၀နီးပါး ကျောင်းပိတ်ထားရဟုလည်း အသိပေးသည်။
ညောင်လေးပင်ခရိုင် မူးမြို့နယ်တွင်လည်း ကျေးရွာပေါင်း ၅၇ရွာ ရေဘေးကြုံနေရပြီး ဒေသခံ နေအိမ် ၁၄လုံး ရေထဲမျောပါသွားဟု KNU ညောင်လေးပင်ခရိုင်က အသိပေးထားသည်။
မူး(မုန်း)မြို့နယ်တွင်လယ်ဧက၄၀၀၀ ကျော်ရေနစ်မြုပ်ကာစာသင် ကျောင်း ၁၈ကျောင်းပိတ်ထားရဟု ထုတ်ပြန်သည်။
ရေကြီးရေလျှံမှု ၊ မြေပြိုမှုများကြောင့် လူနေအိမ် ရေတိုက်စားခံရသည့်အပြင် ၂ဦးထက်မနည်း ထိခိုက်ဒဏ်ရာရရှိခဲ့ဟု မူးမြို့နယ်ကရင်အရေးပေါ် ကူညီကယ်ဆယ်ရေးကော်မတီက ဩဂုတ် ၁ရက်တွင် အသိပေးထားပြီး ပြည်တွင်း ပြည်ပ အဖွဲ့များအနေဖြင့် ရေဘေးသင့်ပြည်သူများကိုလူသားချင်းစာနာထောက်ထားမှုဆိုင်ရာအကူအညီများ ပံ့ပိုးပေးရန် တောင်းဆိုထားသည်။
