သြဂုတ်-၈၊၂၀၂၅။ဇော်ရမ်း/People’s Spring
ဖားကန့်တွင် ယမန်နေ့ည၉နာရီကျော်ကစစ်ကောင်စီဗျူဟာကုန်းမှပစ်လိုက်သည့် လက်နက်ကြီးသည် လူနေရပ်ကွက်အတွင်း ကျရောက်ပေါက်ကွဲပြီး အမျိုးသမီး၁ဦးထပ်မံသေဆုံးတာ ပြည်သူ ၅ ဦးဒဏ်ရာရရှိခဲ့သည်။
သြဂုတ် ၇ ရက်ည ၉နာရီ၂၀မိနစ်တွင်စစ်တပ်ဗျူဟာကုန်းကလက်နက်ကြီးပစ်ခတ်ခဲ့ခြင်းဖြစ်ကြောင်းဒေသခံများကပြောသည်။ ဆိုင်းတောင်ကျေးရွာ၊ ဆုတောင်းတောင်မှ လူနေအိမ် ပေါ်ကျရောက်ပေါက်ကွဲခြင်းဖြစ်ကြောင်းဒေသခံအချို့ကပြောသည်။
“လက်ရှိကြားရသလောက်အသက်ကြီးအမျိုးသမီးတစ်ဦးသေဆုံးတယ်။ ဒဏ်ရာရသူတွေလည်းရှိထားတယ်။ လက်နက်ကြီးရန်ကြောင့် ဒေသခံတွေ အပြင်မထွက်ရဲကြဘူး”ဟု ဆိုင်းတောင်တွင်နေထိုင်သူ တစ်ဦးကပြောသည်
Public Service Announcement
ထိုဖြစ်စဉ်သည် ဖားကန့်၌ စစ်ကောင်စီလက်နက်ကြီးဖြင့်ပစ်ခတ်မှုကြောင့် လေးရက်ဆက်အရပ်သားထိခိုက်သေဆုံးမှုဖြစ်သည်။
ဩဂုတ်လ ၄ရက်ကပစ်ခတ်မှုတွင်အသက် ၃ နှစ်အရွယ်ကလေးငယ်အပါအဝင်၃ဦးသေဆုံးပြီး ၁၃ဦးဒဏ်ရာရခဲ့သည်။ဩဂုတ်လ ၅ရက်က ပစ်ခတ်မှုတွင်ရှရော်ခရွာ၊စည်ပင်ကွက်သစ်အတွင်းလက်နက်ကြီးကျရောက်ပေါက်ကွဲပြီး ဆယ်တန်းကျောင်းသူအပါအဝင် သုံးဦးသေဆုံးကာ ၉ဦး ဒဏ်ရာရခဲ့သည်။
ဩဂုတ်လ ၆ ရက်ကလည်း လက်နက်ကြီးဖြင့်ပစ်ခတ်၍ အရပ်သားထိခိုက်မှုရှိခဲ့ပြီး သြဂုတ် ၇ ရက်တွင်လည်း လက်နက်ကြီးဖြင့်ထပ်မံပစ်ခတ်ခြင်းဖြစ်သည်။ ထို့အပြင်ဩဂုတ်လ ၇ရက် ညနေပိုင်းတွင် စစ်ကောင်စီက ဂျက်ဖိုက်တာဖြင့်ဖားကန့်ကိုဗုံးကြဲခဲ့သည်။
