သြဂုတ်-၂၆၊၂၀၂၅။လူအေး/People’s Spring
ရခိုင်ပြည်နယ်၊ မြောက်ဦးမြို့ကို စစ်ကောင်စီက ပေါင် ၅၀၀ ဗုံးကြဲချရာကနဦးသတင်းအရ ဒေသခံအရပ်သား ဆယ်ဦးထက်မနည်းသေဆုံးပြီး ၂၀ ကျော် ဒဏ်ရာရရှိခဲ့ကြောင်းအချို့ကပြောသည်။
ယမန်နေ့(ဩဂုတ်လ ၂၅ ရက်)ည၁၁ နာရီ ၃၀ မိနစ်တွင် စစ်ကောင်စီကမြောက်ဦးမြို့၊ဒိုင်းကျီရပ်ကွက်ကို ဂျက်ဖိုက်တာဖြင့်ဗုံးကြဲခြင်းဖြစ်သည်။
“ဆက်သွယ်ရေးလိုင်းမကောင်းပါ။ဒိုင်းကျီက မြို့ပေါ်မှာပါ။အခုသိရသလောက် သေဆုံးတာ ဆယ်ဦးမကပါ။ ဒဏ်ရာရသူလည်း များပါတယ်။ မြေပြင်မှာက ဘာမှ မထူးခြားပဲ လာပစ်တာပါ”ဟု မြောက်ဦးဒေသထံသတင်းရင်းမြစ်ကပြောသည်။
Public Service Announcement
နေအိမ်နှင့်ကုန်လှောင်ဂိုထောင်အချို့လည်း ပျက်စီးပြီး လူထိခိုက်သေဆုံးမှုနှင့် ပျက်စီးဆုံးရှုံးမှုကို အသေးစိတ်မသိရသေးပေ။ မြောက်ဦးမြို့သည် အာရက္ခတပ်တော်(AA)ထိန်းချုပ်ထားသည့် မြို့ဖြစ်ပြီး စစ်တပ်ဗုံးကြဲမှုနှင့်ပါတ်သက်၍ AA ကလည်း သတင်းမထုတ်ပြန်သေးပေ။
ရခိုင်ဒေတွင်းသတင်းများဖော်ပြပေးနေသော Arakan Princess Media (APM)က ဗုံးကြဲမှုကြောင့် ပြည်သူ ၁၁ ဦးသေဆုံးခဲ့ပြီး ၊၂၁ ဦးဒဏ်ရာရရှိခဲ့ကြောင်း သတင်းဓါတ်ပုံများနှင့်တကွဖော်ပြသည်။ဒိုင်းကျီရပ်ကွက်ရှိစိုက်ပျိုးရေး ဂိုဒေါင်းကိုပေါင် ၅၀၀ ဗုံးကျရောက်ပေါက်ကွဲခဲ့ပြီးအနီးဝန်းကျင်ရှိပြည်သူများသေဆုံးဒဏ်ရာရခဲ့ခြင်းဖြစ်ကြောင်းပါရှိသည်။
စစ်တပ်ဝါဒဖြန့် တယ်လီဂရန် ချန်နယ်များက အ္ရက္ခတပ်တော်(AA) စစ်ဦးစီးချုပ် ဗိုလ်ချုပ်ထွန်းမြင့်နိုင် ရောက်နေ၍ ဗုံးကြဲခြင်းဖြစ်ပြီး သေဆုံးသူများမှာ AA တပ်ဖွဲ့ဝင်များဖြစ်သည်ဟု သတင်းကိုပုံဖျက်၍ ဝါဒဖြန့်နေကြသည်။
စစ်ကောင်စီတပ်သည်သြဂုတ် ၂၅ရက် ညက မြောက်ဦးအပြင် ကချင်ပြည်နယ် ဗန်းမော်မြို့၊ ရှမ်းပြည်နယ် မိုးမိတ်မြို့၊ မန္တလေးတိုင်း မိုးကုတ်မြို့တို့ကိုလည်း ဗုံးကြဲခဲ့သည်။စစ်အုပ်စုဗုံးကြဲမှုကြောင့် ပြည်သူများထိခိုက်သေဆုံးမှု ရှိ၊မရှိ နှင့် ပျက်စီးဆုံးရှုံးမှုအခြေအနေကိုမူ မသိရသေးပေ။
စစ်တပ်အာဏာသိမ်းပြီးနောက်ပိုင်းမှ ၂၀၂၅ ဇူလိုင်လကုန်အထိ စစ်အုပ်စုက နိုင်ငံတစ်ဝန်းလေကြောင်းတိုက်ခိုက်မှုအကြိမ်ပေါင်း ၃,၁၉၁ ကြိမ်ကျူးလွန်ခဲ့ပြီး သေဆုံးသူ စုစုပေါင်း ၃,၄၀၅ ဦး ရှိကြောင်းအမျိုးသားညီညွတ်ရေးအစိုးရ (NUG)ကထုတ်ပြန်ထားသည် ။သေဆုံးသူများထဲတွင်အသက် (၁၈) နှစ်အောက် ကလေးငယ် ၅၀၁ ဦးပါဝင်သည်။
စစ်တပ်က လာမည့်ဒီဇင်ဘာလကုန်ပိုင်းတွင်ရွေးကောက်ပွဲလုပ်မည် ကြေညာပြီး ၆၃ မြို့နယ်ကို စစ်အုပ်ချုပ်ရေးကြေညာပြီးနောက်ပိုင်း ပြည်သူများကိုဦးတည်၍ ဗုံးကြဲသတ်ဖြတ်မှုများ ပိုမိုပြုလုပ်နေသည်။
