■ကျားသစ်သေဆုံးပြီး ညီအကိုလည်းဒဏ်ရာရ
စက်တင်ဘာ-၂၊၂၀၂၅။ထားမြတ်/People’s Spring
ရှမ်းပြည်နယ်မြောက်ပိုင်း၊သိန္နီမြို့နယ်၊နမ့်စလပ်ဒေသခံကချင်တိုင်းရင်း သားညီအကိုနှစ်ဦးက စက်တင်ဘာ ၁ ရက်နေ့တွင်ကျားသစ်တကောင်ကို လုံးထွေးသတ်ပုတ်အနိုင်ယူခဲ့ပြီး ကျားသစ်သေဆုံးကာ ကချင်ညီအကိုလည်း ဒဏ်ရာရရှိခဲ့ကြောင်းဒေသခံ ကချင်သတင်းရင်းမြစ်က ပြောသည်။
ဒေသခံကချင်တိုင်းရင်းသားတောလိုက်မုဆိုးများမှာတောလိုက်ရင်း ကျားသစ်နှင့်ရင်ဆိုင်ရပြီးအနိုင်ရခဲ့ကာကျားသစ်အသေ၏ ဓါတ်ပုံနှင့်ရုပ်သံမှတ်တမ်းမှာစက်တင်ဘာ ၁ရက်က ဒေသတွင်းသတင်းဌာနအချို့နှင့် လူမှုကွန်ရက်တွင် ပြန့်နှံ့လာခဲ့သည်။
Public Service Announcement
“ညီအကိုနှစ်ယောက်ကမုဆိုးဟုတ်တယ်။သူတို့နှစ်ယောက်က သားကောင်လိုက်ရင်းနဲ့တောတွင်းတနေရာမှာ တချက်အရင် သေနတ်နဲ့ပစ်လိုက်တာ။ အဲဒီမှာကျားကဒဏ်ရာရပြီးပြန်ပြီးထွက်ပြေးသွားတာ”ဟုကချင်သတင်းရင်းမြစ်ကဒေသခံမုဆိုတဦးကိုမေးပြီးပြန်ပြောပြသည်။
ထို့နောက်ဒဏ်ရာရကျားသစ်ကိုကချင်ညီအကိုကလိုက်လံရှာဖွေရာ မတွေ့ရှိ၍နားနေစဉ် ကျားသစ် ကပြန်ပေါ်လာပြီး ရန်မူတိုက်ခိုက်လာ၍ လုံးထွေးသတ်ပုတ်ခဲ့ကြရခြင်းဖြစ်သည်။
“အဲဒီနေရာမှာကျားနဲ့ ညီအကိုနှစ်ယောက် သူတပြန် ကိုယ်တပြန် ပြန်ပြီးတိုက်ခိုက်ကြတာ။ကျားကို အမှန်တကယ် ထိုးသတ်တာ သူ့ရဲ့အကို။ ကျားကတော့ညီကိုတိုက်လိုက် အကိုကို ပြန်တိုက်လိုက်နဲ့ အဲဒီလိုမျိုး သူတပြန် ကိုယ်တပြန်တိုက်နေတဲ့အချိန်မှာအကိုဖြစ်တဲ့သူကသူရဲ့ဓားမြောင်နဲ့ ကျားကိုပြန်ထိုးတာ။သူ့အကိုလည်းဒဏ်ရာအများကြီးရသွားတယ်။သူ့အကိုလည်းကျားကိုဖိုက်နေတဲ့အချိန်မှာသူ့ညီပစ်လိုက်တဲ့ကျည်ကသူ့အကိုရဲ့ ခြေထောက်မှာတော့ ထိသွားတယ်” ဟု ကချင်သတင်းရင်းမြစ်က ပြောသည်။
အကိုဖြစ်သူကကျားသစ်ကိုဓါးဖြင့်ထိုးသတ်၍ကျားသစ်သေခဲ့သော်လည်း ညီဖြစ်သူပစ်၍ ကျည်ချော်မှန်သော သေနတ်ဒဏ်ရာခြေထောက်၌ရရှိခဲ့သည်။
ညီအစ်ကိုနှစ်ဦးစလုံးတွင်ကျားသစ်ကကုတ်ခြစ်ထားသောဒဏ်ရာများ ခြေထောက်နှင့်လက်တို့တွင် ရခဲ့သည်ကိုPeople’s Spring ရရှိသောသတင်းဓါတ်ပုံများတွင်တွေ့ရသည်။
အဆိုပါ ဖြစ်ရပ်နှင့်ပတ်သက်ပြီးဒေသတွင်းသဘာ၀ပတ်ဝန်းကျင်ထိန်း သိမ်းရေး စိတ်ဝင်စားသူအချို့က ရှားပါးတိရိစ္ဆာန်များကို တောလိုက်ခြင်းမပြုသင့်ဟု ပြောဆိုခဲ့ကြောင်းလည်း သတင်းရင်းမြစ်က ပြောပြသည်။
“ဒေသတွင်းမှာရှိနေတဲ့သဘာ၀ပတ်ဝန်းကျင်ထိန်းသိမ်းရေးမိတ်ဆွေတွေကပြောကြတာတော့ ကျေးရွာတွေမှာ ပြည်သူလူထုကို ရန်ရှာတို့ အဲဒီလိုမျိုးဆိုကျေးရွာကော်မတီကဆွေးနွေးပြီးရှာဖွေပစ်သတ်တာကတော့ အားလုံးအတွက်ကောင်းပါတယ်။ ဒါပေမဲ့ ဒီလိုရှားပါးကျားသစ်တွေကို မုဆိုးတွေ လိုက်လံရှာဖွေပစ်ခတ်ပြီးမှစျေးထဲမှာပြန်သွားရောင်းစားတဲ့ကိစ္စရပ်တွေကြတော့ ဖြစ်နိုင်ရင် မလုပ်တာကောင်းပါတယ်တဲ့” ဟု ကချင်သတင်းရင်းမြစ်က ပြောသည်။
ကျားသစ်ကိုမြန်မာနိုင်ငံတွင်မျိုးသုန်းပျောက်ကွယ်လုနီးသည့်ရှားပါးတိရစ္ဆာန်အဖြစ်သတ်မှတ်ထားပြီးရှမ်းပြည်နယ်၊ကချင်ပြည်နယ် ၊တနင်္သာရီတိုင်းကသစ်တောတွေမှာ အများဆုံးတွေ့ရသည်။
