■ သေနတ် ၈ လက်နဲ့ခဲယမ်းတွေသိမ်းဆည်းရရှိ
စက်တင်ဘာ-၄၊၂၀၂၅။ဇေအောင်/People’s Spring
မကွေးတိုင်း၊ နတ်မောက်မြို့နယ်မှာ ပျူစောထီးခေါင်းဆောင်အိမ်ကို ဝင်ရောက်တိုက်ခိုက်ရာ ပျူခေါင်းဆောင်အပါအဝင် ၅ ဦးသေဆုံးပြီး လက်နက် ၈ လက်နဲ့ ခဲယမ်းတွေ သိမ်းဆည်းရမိခဲ့တယ်လို့သရက်ခရိုင်အမှတ်(၃)တပ်ရင်း၊ငါးပြေမပြောက်ကျားတပ်ဖွဲ့က သတင်းထုတ်ပြန်ပါတယ်။
စက်တင်ဘာ ၄ ရက်မနက် ၅ နာရီခန့်ကနတ်မောက်မြို့နယ်၊တက်ဝန်ကျေးရွာက ပျုစောထီးခေါင်းဆောင်ဘိုထွန်းနဲ့ ပျူစောထီးတွေကို တော်လှန်ရေးအဖွဲ့တွေက ဝင်ရောက်တိုက်ခိုက်ခဲ့တာပါ။
Public Service Announcement
တိုက်ခိုက်မှုဟာ မိနစ် ၄၀ ခန့် ကြာခဲ့ပြီး ပျူခေါင်းဆောင် ဘိုထွန်းအပါအဝင် ပျူစောထီး ၅ ဦး သေဆုံးတယ်လို့ ငါးပြေမပြောက်ကျားတပ်ဖွဲ့က အသိပေးပါတယ်။
ဒါ့အပြင် ပျူစောထီးတွေရဲ့ ကားတစ်စီးပျက်စီးကာPoint 22လက်လုပ် ပစ္စတို ၁ လက်၊ M1 ကာဘိုင် ၅ လက်၊ ပြောင်းချောသေနတ် ၂ လက်၊ ကာဘိုင်ကျည် ၉၅ တောင့်၊ ပြောင်းချောကျည် ၃၀တောင့် ၊လက်ပစ်ဗုံး ၂ လုံး၊ ငွေသားတစ်သိန်းကျပ်၊ စစ်ဝတ်တန်ဆာများ၊ ဖုန်း ၄ လုံးနဲ့ စစ်မှုထမ်းစာအုပ်တစ်အုပ် သိမ်းဆည်းရရှိခဲ့တယ်လို့ အထက်ပါအဖွဲ့က ထပ်မံအသိပေးပါတယ်။
စစ်ဆင်ရေးကို သရက်ခရိုင် အမှတ် (၃)ငါးပြေမတပ်ရင်းရဲ့ မြေပြန့်ကျားတပ်ခွဲက ဦးဆောင်ပြီး ရေနံချောင်း ပ၊က၊ဖ ၊မင်းဘူးခရိုင်စစ်ဌာန ပြည်သူလုံခြုံရေးတပ်ဖွဲ့၊Chauk Revolutionary Army(CRA)နဲ့ ဒေါင်းစစ်သည်ပြောက်ကျားတပ်ဖွဲ့တို့ပူးပေါင်းတိုက်ခိုက်ခဲ့တယ်လို့ သိရပါတယ်။
ငါးပြေမပြောက်ကျားတပ်ဖွဲ့ကိုဆက်သွယ်မေးမြန်းထားပြီး ပြန်လည်ဖြေကြားခြင်း မရှိသေးပါဘူး။
စစ်ကောင်စီတပ်ဟာ နတ်မောက်မြို့နယ်မှာလည်း တိုက်ပွဲမရှိဘဲ လေကြောင်းတိုက်ခိုက်တာတွေ ပြုလုပ်နေပြီး ဩဂုတ် ၂၄ ရက်ညက လဲဘူးရွာကို လေကြောင်းကနေဗုံးကြဲတိုက်ခိုက်လို့ ကလေးငယ် ၂ ဦးအပါအဝင် ၅ ဦးသေဆုံးပြီး ၁၁ ဦးထက်မနည်းထိခိုက်ဒဏ်ရာ ရရှိခဲ့ပါတယ်။
သြဂုတ် ၃၀ ရက်မှာလည်း နတ်မောက်မြို့နယ်၊ ကန်သာကျေးရွာနဲ့ ဖတ်တောရေကျေးရွာကြားကို စစ်ကောင်စီတပ်က တိုက်ပွဲဖြစ်ပွားခြင်းမရှိဘဲ စက်တပ်လေထီးနဲ့ ဗုံးချတိုက်ခိုက်လို့ အသက် ၂၇ နှစ်အရွယ် သမီးဖြစ်သူမှာ နေရာတင်သေဆုံးပြီး ဖခင်ဖြစ်သူ ထိခိုက်ဒဏ်ရာ ရရှိခဲ့ပါတယ်။
