NATO စစ်မဟာမိတ် အဖွဲ့ဟာ ရုရှားနဲ့ စစ်ဖြစ်နေပြီးသားလို့ ယူဆလို့ရကြောင်း ရုရှား အစိုးရ ပြောရေးဆိုခွင့်ရ အရာရှိက ပြောကြားသွားပါတယ်။
ကရင်မလင် နန်းတော်ရဲ့ ပြောရေးဆိုခွင့်ရ အရာရှိ ဒီမစ်ထရီ ပက်စ်ကော့ဗ်က စက်တင်ဘာ ၁၅ ရက်နေ့ သတင်းစာ ရှင်းလင်းပွဲမှာ အဲဒီလို မှတ်ချက်ပေးသွားခဲ့တာ ဖြစ်ပါတယ်။ သူက NATOဟာ ရုရှားနဲ့ စစ်ဖြစ်နေတဲ့ ယူကရိန်း အစိုးရကို ထောက်ပံ့နေ ကတည်းက ရုရှားနဲ့ စစ်ဖြစ်နှင့်နေပြီးသားလို့ ယူဆနိုင်ကြောင်း ဆိုပါတယ်။
NATOဟာ ရုရှားနဲ့ စစ်ဖြစ်နှင့်နေပြီးကြောင်း၊ ဒီကိစ္စအတွက် အထူးတလည် သက်သေပြနေစရာ မလိုကြောင်း၊ ယူကရိန်းကို NATOက တိုက်ရိုက်ရော၊ သွယ်ဝိုက်ပြီးပါ ထောက်ပံ့ ကူညီနေခဲ့ချိန် ကတည်းက ရုရှားနဲ့ စစ်ဖြစ်နေပြီးသားလို့ သတ်မှတ်လို့ရကြောင်း ပက်စ်ကော့ဗ်က ဆိုပါတယ်။
NATO အဖွဲ့ဝင် နိုင်ငံတွေဖြစ်တဲ့ ပိုလန်နဲ့ ရိုမေးနီးယားတို့က လေပိုင်နက်ထဲ ရုရှားဒရုန်းတွေ ဝင်ရောက်ခဲ့တဲ့ ဖြစ်စဉ်တွေအပြီး ရက်ပိုင်းလောက် အကြာမှာ ရုရှားဖက်က အခုလို သဘောထားမှတ်ချက် ထွက်ပေါ်လာတာပါ။ ပြီးခဲ့တဲ့ သီတင်းပတ်၊ ပိုလန်နိုင်ငံမှာ ကြုံတွေ့ခဲ့တဲ့ ဒရုန်းတွေ ကျူးကျော်မှုမှာတော့ ပိုလန်နဲ့ NATO တိုက်လေယာဉ်တွေ ပူးပေါင်းပြီး ရုရှား ဒရုန်းတချို့ကို ကြားဖြတ် ပစ်ချခဲ့ရပါတယ်။
Public Service Announcement
ပိုလန်မှာ ရုရှား ဒရုန်းတွေကို ပစ်ချခဲ့တဲ့ ဖြစ်စဉ်အပြီး လူမှုကွန်ရက်တွေပေါ်မှာ ပိုလန်ဟာ စစ်ထဲဆွဲသွင်းတာ ခံရတော့မယ်ဆိုတဲ့ သတင်းတု သတင်းမှား ဖြန့်ဝေမှုတွေလည်း သိသိသာသာ မြင့်တက်လာတယ်လို့ လေ့လာ စောင့်ကြည့်သူတွေက ဆိုပါတယ်။ အဲဒီလို အထိတ်တလန့် ဖြစ်စေလောက်မယ့် သတင်းတွေကို ရုရှားနဲ့ ဘီလားရုစ်ကနေ သိသိသာသာ ဝါဒဖြန့်မှုတွေ ရှိလာနေတာလို့ သိရပါတယ်။
ပိုလန်နဲ့ NATO စစ်မဟာမိတ် အဖွဲ့ဟာ ရုရှား-ယူကရိန်း စစ်ပွဲမှာ တိုက်ရိုက် ပါဝင်တိုက်ခိုက်မှုမျိုး မရှိပေမယ့် ယူကရိန်းကို စစ်လက်နက်တွေ၊ ငွေကြေးတွေ၊ စစ်ရေး လေ့ကျင့်ပေးမှုတွေနဲ့ တခြားအကူအညီတွေကို ပံ့ပိုးပေးနေခဲ့ပါတယ်။
ကိုးကား: News Week
