စက်တင်ဘာ-၁၇၊၂၀၂၅။နေ့သစ်/People’s Spring
စစ်ကိုင်းတိုင်း၊ ကသာခရိုင်၊ ဗန်းမောက်မြို့က စစ်တပ်စခန်းတွေကို တော်လှန်ရေးတပ်တွေက စက်တင်ဘာ ၁၅ ရက်ကစပြီးထိုးစစ်ဆင်တိုက်ခိုက်နေတာမှာ စခန်းတချို့ကိုသိမ်းပိုက်ထားပြီလို့ ဒေသခံကာကွယ်ရေးတပ်ဖွဲ့တွေက People’s Springကို ပြောပါတယ်။
စစ်တပ်နဲ့ ရှမ်းနီတပ် (SNA) စုစုပေါင်း အင်အား ၅၀၀ ဝန်းကျင်ရှိတဲ့ ဗန်းမောက်မြို့က စစ်တပ်စခန်းတွေကိုတော်လှန်ရေးတပ်တွေက စက်တင်ဘာ ၁၅ ရက်မနက်အစောပိုင်းမှစပြီး မြို့ကိုသိမ်းနိုင်ဖို့ ထိုးစစ်ဆင်တိုက်ခိုက်နေတာပါ။
လောလောဆယ်မှာတော့ ဗန်းမောက်မြို့ထဲကို ထိုးစစ်ဆင်တိုက်ခိုက်နေတာဖြစ်တယ်လို့ အင်းတော်ပကဖ တာဝန်ရှိသူက ပြောပါတယ်။
Public Service Announcement
တိုက်ပွဲပထမနေ့မှာပဲ မြို့ကို ကာထားတဲ့ စစ်ကောင်စီနဲ့ SNA ပူးပေါင်း စခန်းကာကင်းနေရာတချို့ကို တော်လှန်ရေးအဖွဲ့တွေ ရရှိထားတယ်လို့လည်း သိရပါတယ်။
စစ်ရေးသတင်းရင်းမြစ်ကတစ်ဦးကလည်း ဗန်းမောက်မြို့သိမ်းတိုက်ပွဲဖြစ်ပြီး ပထမဆုံးနေ့မှာပဲ ရှမ်းနီ SNA စခန်း ၃ ခုကို KIA၊PDF အပါအဝင်တပ်ပေါင်းစုက သိမ်းလိုက်ပြီလို့ ပြောပါတယ်။ ကျန်ရှိတဲ့ စခန်းတွေကို ဆက်လက်ထိုးစစ်ဆင်နေတယ်လို့ ဆက်ပြောပါတယ်။ တိုက်ပွဲတိုက်တတိယနေမှာလည်းတိုက်ပွဲတွေဆက်လက်ပြင်းထန်နေပါတယ် ။
ဗန်းမောက်မြို့ကို ကချင်လွတ်လပ်ရေးတပ်မတော်(KIA)နဲ့အတူ PDF တပ်ရင်းတွေ၊ ပကတွေ ၊ဒေသခံကာကွယ်ရေးတပ်တွေစတဲ့ ပူးပေါင်းတပ်တွေက အတူပူးပေါင်းပြီး စစ်တပ်နဲ့ ရှမ်းနီတပ်စခန်းတွေကို တိုက်ခိုက်နေတာဖြစ်ပါတယ်။ တော်လှန်ရေးတပ်တွေနဲ့အတူ ကဒူးတိုင်းရင်းသားတွေနဲ့ဖွဲ့စည်းထားတဲ့ ကဒူးကာကွယ်ရေးတပ်ဖွဲ့လည်း ပါဝင်တိုက်ခိုက်နေတယ်လို့ စစ်ရေးသတင်းရင်မြစ်တဦးကပြောပါတယ်။
စခန်းတချို့သိမ်းခံရတာကြောင့် စစ်ကောင်စီဘက်က လေကြောင်းကနေ တုံ့ပြန်တိုက်ခိုက်တာတွေလည်း ရှိနေပါတယ်။
စစ်တပ် နဲ့ ရှမ်းနီတပ်(SNA)က မြို့ထဲပိတ်မိနေတဲ့ပြည်သူတွေကို ပြင်ပထွက်ခွင့်မပေးပဲ ပိတ်ထားပါတယ် ။စက်တင်ဘာလ ၁၇ ရက်နေ့လယ်အထိ လက်နက်ကြီးပစ်ခတ်သံများကြားနေရတယ်လို့ဒေသခံတစ်ဦးကပြောပါတယ် ။
ဗန်းမောက်မြို့ဟာ အမျိုးသားညီညွတ်ရေးအစိုးရကသိမ်းပိုက်ထိန်းချုပ်ထားတဲ့ အင်းတော်၊ မော်လူး၊ ပင်လည်ဘူးမြို့တွေ ဝန်းရံထားတဲ့ နေရာမှာရှိပါတယ် ။အင်းတော်နဲ့ ကားလမ်းအတိုင်းဆိုရင် မိုင် ၃၀ ခန့် ၊ မော်လူးနဲ့ မိုင် ၅၀ ခန့် ၊ ပင်လည်ဘူးမြိုနဲ့ ၆၁ မိုင် ခန့်အကွာမှာတည်ရှိပါတယ် ။
လက်ရှိစစ်ရေးအခြေအနေကြောင့် အင်းတော်-ဗန်းမောက်ဗျူဟာလမ်းပိုင်းအပါအဝင် အခြားလမ်းပိုင်းအားလုံးကို တော်လှန်ရေးတပ်တွေက စက်တင်ဘာ ၁၅ ရက်ကစလို့ ရက်အကန့်အသတ်မရှိ ပိတ်ထားတယ်လို့ ထုတ်ပြန်ထားပါတယ်။
