ဒီဇင်ဘာ – ၄ ၊၂၀၂၅ ၊ နိုင်ပကောင်း/People’s Spring
ကျားဖြန့် လုပ်ငန်းတွေကြောင့် နာမည်ဆိုးထွက်နေတဲ့ ရွှေကုက္ကိုမြို့သစ်ကို ထိန်းချုပ်ထားသူ ကရင့်နယ်ခြားစောင့်တပ် (BGF) ခေါင်းဆောင် ဗိုလ်ချုပ်စောချစ်သူ တစ်ယောက် လူမြင်ကွင်းကနေ တစ်လနီးပါးကြာ ပျောက်ကွယ်နေရာကနေ ဒီဇင်ဘာလ ၃ ရက် မနက်ပိုင်းမှာ ပြန်ထွက်လာပါတယ်။
ရွှေကုက္ကိုလ်မြို့သစ် ရှိ ကျားဖြန့် လုပ်ငန်းတွေကို စစ်ကောင်စီတပ်နဲ့ BGF တို့ ပူးပေါင်းပြီးစီးနင်းမှု တွေမလုပ်ခင် နိုဝင်ဘာလ ၁၃ ရက် က ရွှေကုက္ကိုမြို့ သစ် မှာ ပြုလုပ်ခဲ့တဲ့ သူ့ရဲ့သမီး ဒုံးအဖွဲ့ကို ကြိုဆိုတဲ့အခမ်းအနားအပြီးမှာ လူမြင်ကွင်းက ပျောက်ကွယ်သွားခဲ့တာပါ။
အဲဒီနောက် နိုဝင်ဘာလ ၁၈ ရက်မှာတော့စစ်ကောင်စီတပ်နဲ့ BGF တို့ဟာ ရွှေကုက္ကိုလ် ရှိ ကျားဖြန့်အလုပ်ရုံအချို့ကို ဝင်ရောက်စီးနင်း တာမျိုး လုပ်ဆောင်ပြခဲ့ပါတယ်။
Public Service Announcement
အရှေ့တောင်အာရှမှာရှိတဲ့ ကျားဖြန့်လုပ်ငန်းတွေကို နှိမ်နင်းဖို့ အထူးတပ်ဖွဲ့ ဖွဲ့စည်းမယ်ဆိုတာကို အမေရိကန်နိုင်ငံခြားရေးဝန်ကြီး ဌာနက နိုဝင်ဘာလ ၁၂ ရက်မှာကြေညာလာပြီးနောက် BGF ခေါင်းဆောင် စောချစ်သူ လူမြင် ကွင်းက ပျောက်ကွယ်နေတဲ့အပေါ် ထင်ကြေးတွေလည်းထွက်ပေါ်ခဲ့ပါတယ်။
BGF ရဲ့ပြောရေးဆိုခွင့်ရှိသူကတော့ သူတို့ ရဲ့ခေါင်းဆောင် ဟာ အပြစ်တစုံတရာ ကျုးလွန်ထားတာမရှိတဲ့အတွက် ဘယ်နေရာကိုမှ ထွက်ပြေး ပုန်းရှောင်တာမရှိဘူးလို့ ထိုင်းသတင်းမီဒီယာကိုဖြေကြားထားခဲ့ပါတယ်။
မနေ့ ( ဒီဇင်ဘာလ ၃ ရက် )မှာတော့ ကရင်ပြည်နယ်၊ လှိုင်းဘွဲမြို့နယ်၊ ကွမ်ဘီကျေးရွာမှာ ပြုလုပ်ခဲ့တဲ့ ဓမ္မာရုံကျောင်း ပန္နက်တင်အခမ်းအနားတစ်ခုမှာ BGF ခေါင်းဆောင် စောချစ်သူ အပါအဝင် BGF တပ်ဖွဲ့ရဲ့ ဒု ဥက္ကဋ္ဌ စောဖားနွီး၊ စစ်ရေးချုပ် စောထွန်းအောင် စတဲ့ တပ်မှုး အရာရှိတွေလည်း ပါဝင်တက်ရောက်ခဲ့တယ်လို့ ဒေသခံတစ်ဦးက ဖော်ပြထားပါတယ်။
လက်ရှိမှာတော့ စောချစ်သူ ထိန်းချုပ်တဲ့ ရွှေကုက္ကိုမြို့သစ်ကို စစ်ကောင်စီတပ်က ဝင်ရောက်စီးနင်းခဲ့ပြီးနောက် ကျားဖြန့်လုပ်ကိုင်နေတဲ့ ၁၃ ထပ် အဆောက်အဦးတစ်လုံးကို စတင်ဖြိုချဖျက်ဆီးခဲ့တယ်လို့ သိရပါတယ်။
ရွှေကုက္ကိုနယ်မြေအတွင်း ကျားဖြန့် လုပ်ငန်းတွေမှာ အသုံးပြုခဲ့တဲ့ အဆောက်အဦး ၁၆၁ လုံးကို ချိတ်ပိတ်သိမ်းဆည်းခဲ့ပြီး တရားမဝင်ဝင်ရောက်နေထိုင်တဲ့ နိုင်ငံခြားသား ၂,၀၀၀ နီးပါးကို ဖော်ထုတ်ဖမ်းဆီးရမိခဲ့တယ်လို့စစ်ကောင်စီက သတင်းထုတ်ပြန်ထားပါတယ်။
