ဒေါ်အောင်ဆန်းစုကြည် ကျန်းမာရေးကောင်းမွန်တယ်လို့ အာဏာသိမ်းစစ်တပ်ဆို

ဒီဇင်ဘာ -၁၆ ၊၂၀၂၅ /People’s Spring

အာဏာသိမ်းချိန်ကတည်းကမတရားဖမ်းဆီးအကျဉ်းချထားတဲ့ နိုင်ငံ တော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်ရဲ့ကျန်းမာရေး ကောင်း မွန်တယ်လို့ စစ်ကောင်စီကဒီနေ့ ( ဒီဇင်ဘာလ ၁၆ )မှာ ထုတ်ပြန်လာပါတယ်။

အာဏာသိမ်းစစ်ကောင်စီဟာမြန်မာ့ဒီမိုကရေစီခေါင်းဆောင်ဒေါ်အောင်ဆန်းစုကြည်ကို အာဏာသိမ်းထားတဲ့ ငါးနှစ်တာကာလအတွင်း တရားခွင်မှာ တွေ့ရတဲ့ သမ္မတ ဦးဝင်းမြင့် နဲ့အတူ ဓာတ်ပုံ တစ်ပုံကို ထုတ်ပြတာကလွဲရင်ဒေါ်အောင်ဆန်းစုကြည်နဲ့ပတ်သက်တဲ့သတင်းကိုအများပြည်သူမသိရအောင်အမှောင်ချထားတာပါ။

ဒါပေမယ့်ဒေါ်အောင်ဆန်းစုကြည်ရဲ့ကျန်းမာရေးနဲ့ပတ်သက်ပြီး စိုးရိမ်စရာ သတင်းတွေထွက်ပေါ်လာချိန်တိုင်းမှာတော့ စစ်ကောင်စီက ငြင်းဆိုလေ့ရှိပါတယ်။

Public Service Announcement

အခုတစ်ကြိမ်မှာလည်း ဒေါ်အောင်ဆန်းစုကြည်ရဲ့သားငယ် ကင်မ်အဲရစ် ခေါ် ကိုထိန်လင်းကမိခင်ဖြစ်သူကိုအဆက်အသွယ်မရတာကြောင့် ကွယ်လွန်သွားပြီလားပင် မသိဘူးလို့ ရိုက်တာသတင်းဌာနကို ပြီးခဲ့တဲ့ ရက်ပိုင်းက ဖြေကြားထားတဲ့အပေါ် စစ်ကောင်စီက တုံ့ပြန်လာတာပါ။

အသက် ၈၀ အရွယ် မိခင်ဖြစ်သူ ဒေါ်အောင်ဆန်းစုကြည်ဟာ မတရားဖမ်းဆီးချုပ်နှောင်ခံထားရချိန်အတွင်းနှလုံးရောဂါ၊အရိုးနဲ့ သွား ကျန်းမာ ရေးပြဿနာတွေကို ခံစားနေရတာတွေကိုတဆင့်စကားနဲ့ ကြားသိရတယ်လို့ ကိုထိန်လင်းက ​ပြောခဲ့ပါတယ်။

ဒေါ်အောင်ဆန်းစုကြည်နဲ့ရှေ့နေအဖွဲ့လည်းတွေ့ခွင့်မရဘူးလို့ ကိုထိန်လင်းကအသိပေးပါတယ်။

“ကျနော် သိရသလောက်တော့ အမေဟာ ကွယ်လွန်ပြီးတာမျိုးလည်း ဖြစ်နိုင်ပါတယ်” လို့ ကိုထိန်လင်းကရိုက်တာသတင်းဌာနကိုပြောထားပါတယ်။

စစ်ကောင်စီကတော့ကိုထိန်လင်းရဲ့ပြောဆိုချက်နဲ့ အဲဒီပြောဆိုချက်ကိုမီဒီယာတွေက သတင်းတု၊သတင်းမှားတွေနဲ့ ပုံကြီးချဲ့လှုံ့ဆော်ဝါဒဖြန့်နေတယ်လို့ ဒီနေ့မှာဆိုပါတယ်။

ဒေါ်အောင်ဆန်းစုကြည်ရဲ့ကျန်းမာရေးနဲ့ပတ်သက်တဲ့သတင်းတွေနဲ့ မကြာခင်မှာကျင်းပမယ့်ရွေးကောက်ပွဲကိုနှောင့်ယှက်လိုတာကြောင့် အချိန်ကိုက် လုပ်ကြံဝါဒဖြန့်တာလို့ စစ်ကောင်စီက စွပ်စွဲပါတယ်။

​ဒါ​ပေမယ့် ​ဒေါ်​အောင်ဆန်းစုကြည် ကျန်းမာတယ်ဆိုတာ စစ်တပ်ကအ​ပြောသက်သက်သာဖြစ်ပါတယ်။

ဒေါ်​အောင်ဆန်းစုကြည်ကို ပြည်သူ​တွေ မမြင်​တွေ့ရတာက ၂၀၂၁ခုနှစ် ​ဖေ​ဖော်ဝါ ၁ ရက်က တည်းကဖြစ်ပါတယ်။

အခုနှစ် ဇွန်လ ၁၈ ရက်ကတော့ ဗြိတိန်အခြေစိုက် The Guardian သတင်းစာက မတရား ဖမ်းဆီးအကျဉ်းချထားတဲ့ သမ္မတ ဦးဝင်းမြင့် နဲ့ နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်တို့ကို စစ်ကောင်စီ ရဲ့ တရားခွင်မှာတွေ့မြင်ရတဲ့ CCTV ရုပ်သံမှတ်တမ်း အချို့ဖော်ပြလာပါတယ်။

၁ မိနစ်နဲ့ ၁၂ စက္ကန့် ကြာမြင့်တဲ့ အဲဒီ ရုပ်သံမှတ်တမ်းမှာ အသံမပါဝင်ဘဲ ၂၀၂၂ ခုနှစ် ၊ သြဂုတ် ၂၂ရက် က တရားခွင်နဲ့ ၂၀၂၂ ခုနှစ် ၊ ဒီဇင်ဘာ ၁၂ရက် က တရားခွင် မြင်ကွင်းအချို့ဖြစ်ပါတယ်။

ဒေါ်အောင်ဆန်းစုကြည် ကျန်းမာ​ကြောင်းစစ်ကောင်စီက မကြာခဏ ပြောပေမယ့် ခိုင်မာတဲ့အ​ထောက်အထားမပြနိုင်ပါဘူး။

ဒါ​ကြောင့် ​ဒေါ်​အောင်ဆန်းစုကြည် ရဲ့သားဖြစ်သူ ကိုထိန်လင်းနဲ့ ပြည်သူ​တွေက ​ဒေါ်​အောင်ဆန်းစုကြည် နဲ့ နိုင်ငံ​ရေးအကျဥ်းသားအားလုံး ပြန်လွှတ်​ပေး​ဖို့ နိုင်ငံ​ပေါင်း နှစ်ဆယ်ဝန်းကျင်မှာ ဆန္ဒပြ​နေကြပါတယ်။

မင်းအောင်လှိုင် ဦးဆောင်တဲ့ စစ်တပ်ဟာ ၂၀၂၀ အထွေထွေရွေးကောက်ပွဲမှာ ဒေါ်အောင်ဆန်းစုကြည်ဦးဆောင်တဲ့ အမျိုးသားဒီမိုကရေစီအဖွဲ့ချုပ် (NLD) ပါတီ သောင်ပြိုကမ်းပြို ထပ်မံအနိုင်ရတဲ့ ရလဒ်ကို လက်မခံဘဲ ရွေးကောက်ပွဲရလဒ်အရလွှတ်တော်စခေါ်မယ့်ရက်မှာအာဏာသိမ်းခဲ့တာပါ။

အာဏာသိမ်းတဲ့၂၀၂၁ ခုနှစ် ၊ဖေဖော်ဝါရီလ ၁ ရက်မနက်အစောပိုင်းမှာ နိုင်ငံတော်အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည်ကို ဖမ်းဆီးခဲ့ပြီး အဲဒီနောက် ပုဒ်မမျိုးစုံတပ်ကာ ထောင်ဒဏ် နှစ် ၃၀ ကျော် ချထားပါတယ်။

ဖမ်းဆီးအကျဉ်းချထားတဲ့ ဒေါ်အောင်ဆန်းစုကြည်ကို ဘယ်နေရာမှာ ချုပ်နှောင်ထားတယ်ဆိုတာကို စစ်ကောင်စီက တရားဝင်ထုတ်ပြန် ပြောဆိုတာမရှိပါဘူး။