ဒီဇင်ဘာ ၃၀၊ ၂၀၂၅။မေရီ/People’s Spring
အမြန်လမ်းမှာ PDFရဲဘော်တွေကို အမြန်တိုက်ဖို့ အားပေးခဲ့တဲ့ အမျိုးသားတစ်ဦးကို စစ်ကောင်စီက ဖမ်းဆီးခဲ့ကြောင်း စစ်တပ်ထောက်ခံတဲ့ တယ်လီဂရန်ချန်နယ်တွေက အောင်ပွဲခံသတင်းဖြန့်နေပါတယ်။
ဒီဇင်ဘာ ၂၉ ရက်က ရန်ကုန်-မန္တလေးအမြန် လမ်းပေါ်ကို မန္တလေးတိုင်း ပကဖ အဖွဲ့၊ စဉ့်ကိုင် မြို့နယ် ပကဖ၊ တံတားဦးမြို့နယ် ပကဖ အဖွဲ့တွေ ရှောင်တခင် စစ်ဆေးချိန် ဖြတ်သန်းသွားတဲ့ ကားတစ်စီးပေါ်ကနေ “မြန်မြန်ဆော်ဗျာ”လို့ ပြောသွားတဲ့ကားသမားတစ်ဦးကို စစ်ကောင်စီက ဖမ်းဆီးခဲ့တာပါ။
အဲဒီအမျိုးသားကို ဖမ်းဆီးဖို့ မိတ္ထီလာမြို့က ပျူစောထီးခေါင်းဆောင် ဇော်ယုထွန်းအပါအဝင် စစ်ကောင်စီထောက်ခံတဲ့ တယ်လီဂရန်ချန်နယ်တွေက ရေးသားခဲ့ကြပါတယ်။
Public Service Announcement
ဖမ်းဆီးခံရပြီးနောက် “အမြန်လမ်းအာချောင်တဲ့ EV ကားနှင့်အတူ တရားခံ ဘိုသိန်းအား ဖမ်းဆီးရမိပြီးဖြစ်”လို့ စစ်ကောင်စီထောက်ခံသူ မိတ္ထီလာမြို့က ပျူခေါင်းဆောင် ဇော်ယုထွန်းက အောင်ပွဲခံ ရေးသားပါတယ်။ စစ်ကောင်စီက အမြန်လမ်းပေါ်မှာ ၎င်းအမျိုးသားစီးနင်းခဲ့တဲ့ EV ကားအစိမ်းရောင်ကိုပါ ဓာတ်ပုံနဲ့တကွ ထုတ်ပြန်ခဲ့ပါတယ်။
အဲဒီဖြစ်စဥ်နဲ့ပတ်သက်ပြီး လူမှုကွန်ရက်သုံးစွဲသူတဦးက “လူတယောက်လွတ်လပ်ခွင့်ကိုတောင် မင်းတို့တွေယုတ်မာချင်ကြပုံက ရယ်စရာကောင်းလွန်းနေတယ်”လို့ မှတ်ချက်ပြုပါတယ်။
ဖမ်းဆီးခံရသူဟာ ရန်ကုန်မြို့၊ လှိုင်မြို့နယ်မှာ နေထိုင်တဲ့ အသက် ၄၉ နှစ်အရွယ် ကိုဘိုဘိုသိန်းဆိုသူဖြစ်ပြီး အိမ်ခန်းအလှဆင်လုပ်ငန်းလုပ်ကိုင်သူလို့ သိရပါတယ်။
တော်လှန်ရေးအဖွဲ့တွေဟာ ရန်ကုန်-မန္တလေး အမြန်လမ်း၊ ကျောက်ဆည်လမ်းခွဲနဲ့ ပြင်စည်လမ်းခွဲကြားရှိ မိုင်တိုင်(၃၃၂)အနီးဝန်းကျင်မှာ ပြည်သူ့ကာကွယ်ရေးပူးပေါင်းအဖွဲ့တွေက ရှောင်တခင် တက်ရောက်စစ်ဆေးခဲ့ကြတာပါ။ စစ်ဆေးချိန် စစ်ကောင်စီတပ်နဲ့ ထိတွေ့ပစ်ခတ်မှု ဖြစ်ပွားခဲ့ကြောင်း တော်လှန်ရေးအဖွဲ့တွေက ထုတ်ပြန်ထားပါတယ်။
