ဒီဇင်ဘာ ၃၀၊ ၂၀၂၅။မေရီ/People’s Spring
မန္တလေးမြို့၊ ပြည်ကြီးတံခွန်မြို့နယ်မှာ ပျူစောထီးတွေက အမျိုးသားတစ်ဦးကို ရိုက်နှက်သတ်ဖြတ်ပြီး ရုပ်အလောင်းကို အမှိုက်ပုံလာပစ်သွားကြောင်း သတင်းရရှိပါတယ်။
မနေ့က ဒီဇင်ဘာ ၂၉ ရက် မနက်ပိုင်းက ပြည်ကြီးတံခွန်မြို့နယ်၊ ၅၉လမ်း၊ ၁၁၄လမ်းနဲ့ ၁၁၅လမ်းကြားရှိ အမှိုက်ကန်အနီးမှာ ရိုက်နှက်နှိပ်စက်ခံထားရပြီး ဦးခေါင်းကြေမွဒဏ်ရာတွေနဲ့ သေဆုံးနေတဲ့ အမျိုးသားတစ်ဦးရဲ့ ရုပ်အလောင်းကို လူတစ်စုက လာရောက်စွန့်ပစ်သွားကြောင်း MDY Revolution က အသိပေးပါတယ်။
မျက်မြင်တွေ့ရှိသူတွေရဲ့အဆိုအရ အလောင်းလာပစ်သူတွေဟာ ၆၂လမ်း ၁၁၇လမ်းနဲ့ ၁၁၈ကြားရှိ ပြည်ကြီးတံခွန်မြို့နယ် (ဃ)ရပ်ကွက် ရပ်ကွက်ရုံးက ပျူစောထီးတွေ ဖြစ်ကြောင်း MDY Revolution က ထပ်မံ အသိပေးပါတယ်။
Public Service Announcement
“တော်တော်သောင်းကျန်းနေတာ။ အဲဒီဘက် ဃ ရပ်ကွက်က ပျူတွေချည့်ပဲ။ ညဘက်ဆို ဘယ်သူမှ အပြင်မထွက်ရဲဘူး”လို့ အဆိုပါ ရပ်ကွက်အနီး နေထိုင်သူတစ်ဦးက ပြောပါတယ်။
သတ်ဖြတ်စွန့်ပစ်ခံရသူရဲ့ အသေးစိတ် အချက်အလက်တွေတော့ မသိရသေးပါဘူး။ စွန့်ပစ်ခံရတဲ့ ရုပ်အလောင်းကို မနက်ပိုင်းမှာပဲ လာရောက်ကောက်ယူသွားတယ်လို့ သိရပါတယ်။
ပြည်ကြီးတံခွန်မြို့နယ်က (ဃ) ရပ်ကွက်ရုံးဟာ အလုပ်အကိုင်မရှိ ရပ်ကွက်ကြမ်းပိုးတွေက ပျူစောထီးများအဖြစ် လုပ်ကိုင်နေပြီး မွှေနှောက်သောင်းကျန်းနေကြောင်း၊ ၎င်းတို့က ပေါ်တာဆွဲတာ အပါအဝင် ရပ်ကွက်နေပြည်သူများအပေါ် အနိုင်ကျင့်လို့ ပြည်သူအချို့မှာ အိမ်ခြံမြေများ ရောင်းချပြီး အခြားနေရာသို့ ပြောင်းရွှေ့သွားကြရသူများပင်ရှိနေကြောင်း MDY Revolution က ထုတ်ပြန်ထားပါတယ်။
မန္တလေးမြို့မှာ စစ်ကောင်စီတပ်လက်အောက်ခံ လက်နက်ကိုင် ပျူစောထီးတွေကနေ ပြည်သူတွေကို ဖမ်းဆီးနှိပ်စက်ငွေညှစ်တာ၊ ခြိမ်းခြောက်လုယက်တာတွေ အဖြစ်များနေကြောင်း မြို့ခံတွေက ပြောပါတယ်။
ပြီးခဲ့တဲ့ ၂၀၂၄ စက်တင်ဘာလအတွင်းကလည်း အဲဒီ (ဃ)ရပ်ကွက်ထဲမှာပဲ နေအိမ်တစ်အိမ်ကို ပျူစောထီးအဖွဲ့က ဓားပြဝင်တိုက်ပြီး အတွင်းပစ္စည်းတွေနဲ့ Hi Jet ကားတစ်စီး ပါသွားခဲ့ဖူးပါတယ်။
