ဇန်နဝါရီ-၁၉၊ ၂၀၂၆။ ထားမြတ်/People’s Spring
ကချင်ပြည်နယ်၊ တနိုင်းမြို့နယ်က ကချင်လွတ်လပ်ရေးတပ်မတော်(KIA) ရှေ့တန်း ကာကင်းစခန်း တစ်ခုနဲ့ ဂိတ် တစ်ခုကို အာဏာသိမ်းစစ်ကောင်စီ လက်အောက်ခံတပ်တွေက ရရှိသွားတယ်လို့ KIA သတင်းပြန်ကြားရေးဌာန တာဝန်ခံ ဗိုလ်မှူးကြီးနော်ဘူက အတည်ပြုပြီး ဒေသတွင်းမှာ စစ်ကောင်စီ လက်အောက်ခံတပ်တွေ ဆက်ရှိနေလို့ အချိန်မရွေး တိုက်ပွဲဆက်ဖြစ်နိုင်ကြောင်းလည်း ပြောပါတယ်။
စစ်ကောင်စီ လက်အောက်ခံ မင်းဇေသန့် ဦးဆောင်တဲ့ ဝါရာဇွပ်ပြည်သူ့စစ်က KIA ရဲ့ ဝေလော ဂိတ်စခန်းနဲ့ ကာကင်းစခန်းနေရာကို သိမ်းရပြီး အလောင်း၊ လက်နက်ခဲယမ်းတွေရတယ်လို့ ထုတ်ပြန်ထားတဲ့အပေါ် ဗိုလ်မှူးကြီးနော်ဘူက အခုလို ပြောတာပါ။
အဲဒီဒေသဟာ KIA တပ်မဟာ (၂) တပ်ရင်း(၁၄) တည်ရှိရာ ပယင်းမှော်ရွှေမှော်တွေဘက်ဖြစ်ပြီး ၂၀၂၅ ဒီဇင်ဘာ ဒုတိယဘက်မှာ စစ်ကောင်စီ လက်အောက်ခံတပ်တွေ ထိုးစစ်ဆင်လာလို့ ရှေ့တန်းကာကင်းစခန်းနဲ့ ဂိတ်ကို လက်လွှတ်ခဲ့ရတာလို့ ပြောပါတယ်။
Public Service Announcement
” နောက်ဆက်တွဲအနေနဲ့တော့ အဲဒီမှော်ဒေသမှာ သူတို့ထိန်းချုပ်နိုင်ဖို့အတွက် စစ်ဆင်ရေးတွေလုပ်တာတွေ့ရပါတယ်”လို့ ဗိုလ်မှူးကြီးနော်ဘူက ပြောပါတယ်။
လတ်တလောမှာ တိုက်ပွဲကြီးတွေမတွေ့ရဘဲ စစ်ကောင်စီလက်အောက်ခံတပ်တွေက ဒရုန်း၊ လက်နက်ကြီးနဲ့ တိုက်ခိုက်တာမျိုးရှိတယ်လို့ပြောပါတယ်။
“KIAဘက်ကလည်း ဒရုန်းနဲ့ပစ်တာ လက်နက်ကြီးနဲ့ ပစ်တာတွေရှိတယ်။ ဒါကြောင့် စစ်ရေးအခြေအနေကတော့ အဲဒီဒေသမှာ တင်းမာတယ်လို့ ပြောလို့ရပါတယ်။ သူတို့ စစ်ကြောင်းတွေ ပြန်ဆုတ်သွားတာမရှိသေးပါဘူး။” လို့ ဗိုလ်မှူးကြီးနော်ဘူက ပြောပါတယ်။
ဒါ့အပြင် စစ်ကောင်စီလက်အောက်ခံတပ်တွေဟာ ပြည်သူတွေ လုပ်ဆောင်နေတဲ့ ရွှေတူးဖော်မှု လုပ်ငန်းတွေ ရပ်နားခိုင်းတာတွေရှိတယ်လို့ ပြောပြပါတယ်။
“တချို့အဖွဲ့တွေလည်း ဆက်လုပ်တာတွေရှိတယ်။ သူတို့ လူတွေကိုတော့ လုပ်ခိုင်းပြီးတော့ သူတို့နဲ့ အကြောမတည့်တဲ့သူတွေကိုတော့ မလုပ်ခိုင်းတဲ့ သဘောတွေ့ရပါတယ်” လို့ ဗိုလ်မှူးကြီးနော်ဘူက ပြောပါတယ်။
အဲဒီဒေသမှာ ပြည်သူလူထုသွားလာရေး အဟန့်အတား အခက်အခဲတွေရှိနေတဲ့ အကြောင်းနဲ့ အချိန်မရွေးထိတွေ့ရင်ဆိုင်တိုက်ပွဲဖြစ်နိုင်တဲ့ အလားအလာရှိကြောင်း ဗိုလ်မှူးကြီးနော်ဘူက ပြောပါတယ်။
