လပွတ္တာ-မြောင်းမြ ကားလမ်းတွင် ခရီးသည်တင်ယာဉ်တစ်စီး လမ်းဘေးသစ်ပင်အားအရှိန်ဖြင့် ဝင်တိုက်မိသဖြင့် ခရီးသည်နှစ်ဦးသေဆုံးပြီး နှစ်ဦးဒဏ်ရာရခဲ့သည်။
ယာဥ်မောင်းနှင့် ယာဥ်နောက်လိုက်အပါအဝင် စုစုပေါင်း ၃၅ဦးလိုက်ပါလာသည့် ခရီးသည်တင် ကားသည် ယနေ့(ဒီဇင်ဘာ ၈ရက်) ညနေ ၄နာရီခန့်တွင် လပွတ္တာ-မြောင်းမြ ကားလမ်းတစ်နေရာတွင် တိုင်းရော့ပြုတ်ပြီး လမ်းဘေးသစ်ပင်ကိုအရှိန်ဖြင့် ဝင်တိုက်ခဲ့ခြင်းဖြစ်ကြောင်းဒေသခံအချို့ကပြောသည်။
“ခရီးသည်နှစ်ယောက်တောင် သေတယ်။ နှစ်ယောက် ဒဏ်ရာရတယ်။ လပွတ္တာဆေးရုံကို ပို့မယ်လို့ ကြားတယ်”ဟုမျက်မြင်တွေ့ရှိသူတစ်ဦးက ပြောသည်။
ဧရာဝတီတိုင်းအတွင်း အသုံးပြုနေသော ခရီးသည်တင်ကားအများစုသည် ကြံ့ခိုင်ရေးမကောင်းဘဲ အချို့ကားများသည် အဝင်အထွက် တံခါးပေါက်များ ဖြုတ်ချထားသည်အထိ စုတ်ပြတ်နေသည်ကိုတွေ့ရကြောင်းခရီးသွားအချို့ကပြောသည်။
Public Service Announcement
အကြမ်းဖက်စစ်ကောင်စီလက်ထက်တွင်ခရီးသည်များဆီမှ ကားလက်မှတ်ခများပိုတောင်းနေပြီး ယင်းလုပ်ရပ်အပေါ် ထိန်းသိမ်းမည့်သူမရှိဖြစ်နေသည်ဟု ခရီးသွားများက ပြောသည်။
