ဖေဖော်ဝါရီ-၂၀၊ ၂၀၂၆။ ထားမြတ်/People’s Spring
ချင်းပြည်ကောင်စီက ဒီကနေ့ ဖေဖော်ဝါရီ ၂၀ရက်မှာ ကျရောက်တဲ့ (၇၈)နှစ်မြောက် ချင်းအမျိုးသားနေ့ ကြေညာချက်ထုတ်ပြန်ခဲ့ရာ ချင်းပြည်ကို ချင်းအမျိုးသားပြည်သူတွေရဲ့ အသက်၊ သမိုင်းနဲ့ အနာဂတ်တို့အတွက် ရင်းနှီးတည် ဆောက်ထားခြင်းဖြစ်လို့ အရွယ်ရောက်ပြည်သူတိုင်း ချင်းပြည်ကာကွယ်ရေးမှာ ပါဝင်ကြရမယ်လို့ ဖော်ပြထားပါတယ်။
တော်လှန်ရေးကာလတွင် မိမိတို့ဌာနေဒေသကို စွန့်ခွာပြီး ရေကြည်ရာမြက်နုရာ ရှာဖွေ ခြင်းဟာ လွယ်ကူသောရွေးချယ်မှု ဖြစ်နိုင်ပေမယ့် အမျိုးသား တော်လှန် ရေးအတွက် မှန်ကန်သောရွေးချယ်မှုမဟုတ်ဟု ဖော်ပြပါတယ်။
ဒါကြောင့် အရွယ်ရောက်ပြီးသူတိုင်း ချင်းပြည်ကို မစွန့်ခွါဘဲ ကဏ္ဍအသီးသီးမှ ချင်းပြည် ကာကွယ်ရေးနဲ့ ချင်းပြည်ရှင်သန်ရပ်တည်ရေးအတွက် ပါဝင်ကြရမှာ ဖြစ်ကြောင်း ထုတ်ပြန်ပါတယ်။
Public Service Announcement
ချင်းပြည်ကောင်စီအနေနဲ့လည်း ချင်းပြည်သူတွေနဲ့ တစ်သားတည်းရပ်တည်ပြီး အကြမ်းဖက် စစ်တပ်ကို နေ့စဉ်ရက်ဆက် တော်လှန် တိုက်ခိုက်နေသလို ချင်းအမျိုးသား တည်ဆောက်ရေး၊ ချင်းပြည် တည်ဆောက်ရေးနဲ့ ချင်းတမျိုးသားလုံး စည်းလုံးညီညွတ်ရေးအတွက် တစိုက်မတ်မတ် ကြိုးပမ်းဆောင်ရွက်နေတယ်လို့ အသိပေးပါတယ်။
ဒါ့အပြင် စစ်အာဏာရှင်စနစ် အမြစ်ပြုတ်ရေးနဲ့ ဖက်ဒရယ်ဒီမိုကရေစီပြည်ထောင်စုတည် ဆောက်ရေးအတွက် မိတ်ဖက်တော်လှန်ရေးအင်အားစုတွေနဲ့ လက်တွဲ ချိတ်ဆက်ပြီး ကြိုးပမ်းနေကြောင်း ဖော်ပြထားပါတယ်။
ချင်းပြည်ကောင်စီဥက္ကဋ္ဌ ပူးဇင်ကျုံးက စစ်အာဏာရှင် စနစ် အမြစ်ကနေ နှုတ်ယူဖို့ တနိုင်ငံလုံး တိုက်ပွဲဝင်နေကြောင်း ပြောကြားပြီး တိုင်းပြည်ကို ပြည်သူမပါဘဲ အုပ်ချုပ်လို့ မရသလို လက်နက်နဲ့ ပြည်ထောင်စု တည်ဆောက်လို့မရဘူးလို့ အသိပေးပါတယ်။
” စစ်တပ်ကြီးစိုးတဲ့စနစ်က ချင်းအမျိုးသားများရဲ့ နိုင်ငံရေးစနစ်နဲ့ ဆန့်ကျင်တဲ့အတွက် ပြည်သူ့ဆီမှာ အာဏာရှိတဲ့ ဒီမိုကေရစီရရှိတဲ့အထိ တိုက်ပွဲဝင်သွားကြမှာ ဖြစ်ပါတယ်”လို့ ပူးဇင်ကျုံးက ပြောပါတယ်။
ဒီကနေ့ကျရောက်တဲ့ ချင်းအမျိုးသားနေ့ အခမ်းအနားကို အမျိုးသားညီညွတ်ရေးအစိုးရ၊ ပြည်ထောင်စုလွှတ်တော်ကိုယ်စားပြုကော်မတီ၊ ကရင်နီပြည်အတိုင်ပင်ခံကောင်စီ၊ ပအိုဝ်းအမျိုးသားဖက်ဒရယ်ကောင်စီ တို့ကလည်း သဝဏ်လွှာတွေ ပေးပို့ခဲ့ပါတယ်။
အမျိုးသားညီညွတ်ရေးအစိုးရ ယာယီသမ္မတ ဒူဝါလရှီးလက အခမ်းအနားကို တက်ရောက်အမှာစကား ပြောကြားခဲ့ရာ ပြည်ထောင်စုတည်ဆောက်ရေးမှာ ချင်းလူမျိုးတွေရဲ့ ပါဝင်ဦးဆောင်မှုက အထူးအရေးပါကြောင်းပြောကြားခဲ့ပါတယ်။
ဒါ့အပြင် ချင်းပြည်တရပ်လုံးမှာ ချင်းအမျိုးသားလွတ်မြောက်ရေးကို ဆုံးခိုင်းတိုင်အောင် ဖော်ဆောင်နိုင်ဖို အထူးလိုအပ်ပြီး အဲဒီအတွက် အရေးကြီးဆုံးက ညီညွတ်ရေးဖြစ်ကြောင်း ပြောပါတယ်။
” အာမခံချက်ပြည့်၀တဲ့ ချင်းပြည်လွတ်မြောက်ရေးကို စစ်ရေးအရ နိုင်ငံရေးအရ တပြိုင်နက်တည်း ဖော်ဆောင်နိုင်ဖိုလည်းလိုပါတယ်။ အဲဒါက အရေးကြီးတာက အမျိုးသား ညီညွတ်ရေးကိစ္စဖြစ်ပါတယ်။ ချင်းလူမျိုးတွေ အချင်းချင်း တိုင်တိုင်ပင်ပင်ညှိညှိနှိင်းနှိင်း လုပ်နိုင်မှ ချင်းပြည်တည်ဆောက်ရေးဟာ အောင်မြင်မှာ ဖြစ်တယ်ဆိုတာ ယုံကြည်ပါတယ်။ ချင်းတွေအချင်းချင်း အင်အားတွေကို စုစည်းထားမှ ချင်းပြည်လွတ်မြောက်ရေးအတွက် အာမခံချက်ရှိမှာ ဖြစ်ပါတယ်”လို့လည်း ယာယီသမ္မတက ပြောပါတယ်။
