မနက်ဖြန် (ဒီဇင်ဘာ ၁၀ ရက်)တွင် ပြုလုပ်မည့် အသံတိတ်သပိတ် (Silent Strike)ပြုလုပ်ရန် ညွှန်ကြားထားခြင်းမရှိဆိုသော အမျိုးသားဒီမိုကရေစီအဖွဲ့ချုပ်၏ ထုတ်ပြန်စာအတု လူမှုကွန်ရက်၌ ဖြန့်ဝေနေသည်။
အဆိုပါ ထုတ်ပြန်စာအတုတွင် ဒီဇင်ဘာ ၁၀ရက်သည် အစ္စလာမ်ဘာသာဝင်တို့၏ ဝတ်ပြုဆုတောင်းသည့် (သောကြာနေ့)ဖြစ်ပြီး ထိုနေ့ကို Silent Strike ပြုလုပ်ခြင်းသည် အခြားသော ဘာသာဝင်တို့အား စိတ်အနှောက်အယှက်ဖြစ်စေသဖြင့် ပုံမှန်အတိုင်းသွားလာရန် တိုက်တွန်းသည်ဟု ဆိုသည်။
“လူထုသပိတ်ကို ရသလောက် မအောင် ၊မမြင်ဖြစ်အောင်လုပ်တာ။ပြီးတော့ ဘာသာရေးမှိုင်းပါ ပါတယ်။ကျွန်တော် အစ္စလာမ်ဘာသာဝင်ပါ။ ကျွန်တော် အမဲသားရောင်းပါတယ်။မနက် (ဒီဇင်ဘာ ၁၀ ရက်မှာ) ဆိုင်ပိတ်ပါမယ်။ Silent Strike မှာပါ ဝင်မှာပါ”ဟု အင်းစိန်မြို့နယ် စျေးတစ်ခုမှ ကိုလှမျိုး(အမည်လွှဲ)က လူထုနွေဦးသို့ ပြောသည်။
“ဟိုဘက်က အကြမ်းဖက်စစ်အုပ်စုက ကြောက်ပြီး ဖြန့်နေတာ။ ပြည်သူတွေက သူတို့ထက် နားလည်တယ်။ အားလုံးလည်း အသံတိတ်သပိတ်မှာ ပါဝင်မယ်လို့ ယုံကြည်တယ်”ဟု ပြင်ဦးလွင်မြို့နေ အသက် ၄၀အရွယ် အမျိုးသားတစ်ဦးက ပြောသည်။
Public Service Announcement
အသံတိတ်သပိတ် ပြုလုပ်မည့်ရက်ကို သီးခြားထုတ်ပြန်ပေးမည်ဟုလည်း ထုတ်ပြန်စာအတုတွင်ဖော်ပြသည်။
မြန်မာနိုင်ငံလုံးရှိ ပြည်သူများက မနက်ဖြန် (ဒီဇင်ဘာ ၁၀ ရက်)တွင် နံနက် ၁၀နာရီမှ ညနေ ၄နာရီအထိအပြင်မထွက်ဘဲ စစ်အာဏာရှင်ကို ဆန့်ကျင်တော်လှန်ကြောင်း ပြသမည့် တိတ်ဆိတ်ငြိမ်သက်ခြင်းသပိတ်ကို တစ်နိုင်ငံလုံးအတိုင်း အတာဖြင့် ပြုလုပ်ရန် ပြည်သူအချင်းချင်း လှုံ့ဆော်တိုက်တွန်းနေကြသည်။
ထို့ကြောင့် ရန်ကုန်မြို့ရှိ အချို့ဆိုင်မှာ မနက်ဖြန်တွင် ဆိုင်ပိတ်မည်ဟု ယနေ့(ဒီဇင်ဘာ၉) ကတည်းက အသိပေးကြေညာနေသည်။
ဒီဇင်ဘာ ၁၀ ရက်သည် ကမ္ဘာ့လူ့အခွင့်အရေးနေ့ဖြစ်ပြီး“တိတ်ဆိတ်ငြိမ်သက်ခြင်း သပိတ်” (Silent Strike)နှင့် “အနက်ရောင် လှုပ်ရှားမှု” (Black Campaign)များတွင် ပါဝင်ကြခြင်းဖြင့် စစ်အာဏာရှင်ကို တော်လှန်ကြရန် ပြည်သူများကို တိုက်တွန်းထားသည်။
