မတ်-၂၃၊ ၂၀၂၆။ဟာနာဆန်/People’s Spring
မကွေးတိုင်း၊ မြိုင်မြို့နယ်က ကန်နီကျေးရွာက ကင်းပတ်နေတဲ့ ပျူစောထီးအဖွဲ့ကို တိုက်ခိုက်ရာ သုံးဦး သေဆုံးကြောင်း အညာမြေတပ်ပေါင်းစု ပြောရေးဆိုခွင့်ရှိသူ ကိုဘိုဘိုသန့်ဇင်က ပြောပါတယ်။
မနေ့က မတ်လ ၂၂ ရက် မနက်ပိုင်းက ကန်နီရွာကထွက်လာတဲ့ အင်အား ၂၀ခန့်ရှိတဲ့ ပျူစောထီးအဖွဲ့ကို အညာမြေတပ်ပေါင်းစုက စောင့်ဆိုင်းတိုက်ခိုက်ခဲ့ရာ တိုက်ပွဲချိန် ၁နာရီနီးပါး ကြာမြင့်ခဲ့ကြောင်း အညာမြေတပ်ပေါင်းစုက တာဝန်ရှိသူက ပြောပါတယ်။
အဲဒီတိုက်ပွဲအတွင်းမှာ ပျူစောထီး သုံးဦး သေဆုံးပြီး ၂ဦး ဒဏ်ရာရရှိခဲ့ကြောင်း ၎င်းတာဝန်ရှိသူက ဆိုပါတယ်။
Public Service Announcement
“တိုက်ပွဲဖြစ်တဲ့နေရာက သူတို့ကန်နီပျူရွာနဲ့ နီးပါတယ်။ ရွာဝန်းကျင်ပါပဲ။ တိုက်ခိုက်ခံရပြီးတော့ သူတို့ရွာထဲ ပြန်ဝင်သွားတယ်”လို့ အညာမြေတပ်ပေါင်းစုရဲ့ပြောရေးဆိုခွင့်ရှိသူ ကိုဘိုဘိုသန့်ဇင်က ပြောပါတယ်။
အဲဒီတိုက်ခိုက်မှုကို ပခုက္ကူခရိုင် အမှတ် (၆)တပ်ရင်းက ဦးဆောင်ပြီး၊ အမှတ် (၂၊ ၇)တပ်ရင်းနဲ့ အညာမြေတပ်ပေါင်းစု (Drone Team)တို့ ပူးပေါင်းဆောင်ရွက်ခဲ့ခြင်းဖြစ်ကြောင်း သိရပါတယ်။
ကန်နီပျူစောထီးရွာက ပျူစခန်းဟာ အနီးနားရှိ ကျေးရွာသားများနဲ့ ဆိတ်ကျောင်း၊ နွားကျောင်းသူတွေကို ဖမ်းဆီးသတ်ဖြတ်မှုတွေ ပြုလုပ်ခဲ့ဖူးပါတယ်။
လက်ရှိမှာ မြိုင်မြို့နယ်အတွင်းက ကန်နီ၊ သရက်ကန်နဲ့ တွင်းမစတဲ့ ပျူစောထီးအားကောင်းတဲ့ ကျေးရွာသာ ကျန်ရှိပြီး ဝက်ပုတ်၊သရက်ကွ၊ကိုင်းတောမ နယ်မြေရဲစခန်းနဲ့ Well 2ရေနံမြေရဲစခန်းတွေကိုတော့ တော်လှန်ရေးအင်အားစုများက ၂၀၂၄ ကတည်းက သိမ်းပိုက်စိုးမိုးထားပါတယ်။
