ကရင်နီ(ကယားပြည်နယ်) ဖရူဆိုမြို့နယ် အခြေစိုက် အကြမ်းဖက်စစ်ကောင်စီ၏ ခမရ (၄၂၈) တပ်ကို ကရင်နီတပ်မတော်(KA)နှင့် KNDF တို့ ဝင်ရောက်တိုက်ခိုက်ရာ စစ်ကောင်စီတပ်သား သုံးဦးသေ၊ ငါးဦး ဒဏ်ရာရရှိခဲ့သည်ဟု KNDF တာဝန်ရှိသူက လူထုနွေဦးသို့ပြောသည်။
ဒီဇင်ဘာ ၁၁ ရက် ည ၁၀နာရီခွဲခန့်က ခမရ(၄၂၈)တပ်ကို တိုက်ခိုက်ရာတွင် တောင်ပေါ်တစ်နေရာနှင့် မြို့ဘေးတစ်နေရာမှ တိုက်ခိုက်ခဲ့သည်ဟု ၎င်းက ဆိုသည်။
“အကြမ်းဖက်စစ်တပ်ကို ကြိုပြီး တိုက်တာပေါ့။တခြား စစ်ဗျူဟာ အခင်းအကျင်းကျတော့ ပြောလို့မရသေးဘူးဗျ”ဟု အထက်ပါတာဝန်ရှိသူက ပြောသည်။
“အရင်တုန်းက အဲဒီတပ်ကို မတိုက်ဖူးပါဘူး။ တိုက်ပွဲဖြစ်စဉ်ကတော့ ရှေ့တန်းရဲ့ပေးပို့ချက်အရ ထုတ်ပြန်ထားတဲ့အတိုင်းလောက်ပါပဲ”ဟု KNDF ဖရူဆိုဇုန် ပြောရေးဆိုခွင့်ရှိသူက ပြောသည်။
Public Service Announcement
ယမန်နေ့ညပိုင်းကလည်း ဖရူဆို မြို့မရဲစခန်းကိုလည်း KNDF နှင့် KA ပူးပေါင်း၍ တိုက်ခိုက်ခဲ့ကြောင်းလည်း သိရသည်။အဆိုပါဖြစ်စဥ်မှ အကြမ်းဖက်စစ်ကောင်စီ၏ ထိခိုက်သေဆုံးမှုကို KNDF က အတည်မပြုနိုင်သေးပေ။
တိုက်ပွဲ ဖြစ်စဥ်တွင် အကြမ်းဖက်စစ်ကောင်စီတပ် က လက်နက်ကြီးများဖြင့် ပစ်ခတ်ခဲ့သော်လည်း ကရင်နီတပ်မတော်ဘက်မှ ထိခိုက်ကျဆုံးမှုမရှိကြောင်းလည်း သိရသည်။
မေလက စတင်ခဲ့သောကရင်နီ(ကယားပြည်နယ်) အတွင်း ဒီးမော့ဆို၊ လွိုင်ကော်တို့တွင်သာ အကြမ်းဖက်စစ်ကောင်စီတပ်နှင့် ကရင်နီတပ်မတော်တို့ နှစ်ဖက်ထိတွေ့ တိုက်ပွဲအများဆုံးရှိခဲ့သည်။
(KNDF /B-09တပ်သားများကို တွေ့ရစဥ်)
