အရာတော်မှာ စစ်တပ်က ဘုန်းကြီးကျောင်း ၃ကျောင်းကို အသေခံဒရုန်းနဲ့ ဗုံးကြဲတိုက်ခိုက်လို့ သံဃာတော် ၂ပါး ဒဏ်ရာရ၊ သာသနိက အဆောက်အအုံတွေ ပျက်စီး

ဧပြီ ၉၊ ၂၀၂၆။ ဇေအောင်/People’s Spring

​စစ်ကိုင်းတိုင်း၊ အရာတော်မြို့နယ်က ကမ်းပြူကျေးရွာမှာ စစ်တပ်က အသေခံဒရုန်းတွေနဲ့ ဘုန်းကြီးကျောင်း ၃ကျောင်းကို ဗုံးကြဲတိုက်ခိုက်လို့ သံဃာတော် ၂ ပါး ဒဏ်ရာရရှိပြီး သာသနိကအဆောက်အအုံတွေ ပျက်စီးခဲ့ပါတယ်။

မနေ့က ဧပြီ ၈ ရက် ညနေ ၄ နာရီ ၁၇မိနစ်ခန့်က အရာတော်မြို့နယ် ကမ်းပြူကျေးရွာက ဘုန်းတော်ကြီးကျောင်း ၃ကျောင်းကို ဗုံးသီးချတိုက်ခိုက်ခဲ့တာလို့ ဒေသခံများက ပြောပါတယ်။

အဲဒီတိုက်ခိုက်မှုကြောင့် ကျောင်းတိုက်အတွင်းရှိ သံဃာတော် (၂)ပါး ထိခိုက်ဒဏ်ရာများ ရရှိခဲ့ပြီးဘုန်းတော်ကြီးကျောင်းဝန်းအတွင်းရှိ ရှေးဟောင်းအဆောက်အအုံတွေနဲ့ သာသနာ့နယ်မြေအတွင်းရှိ အဆောက်အဦးတချို့ ထိခိုက်ပျက်စီးမှုများ ရှိခဲ့ကြောင်း ဒေသခံများက ပြောပါတယ်။

Public Service Announcement

“တိုက်ပွဲဖြစ်ပွားခြင်းမရှိဘဲ နမခတပ်ကနေ အသေခံဒရုန်း (၃)စင်းနဲ့ လေကြောင်းတိုက်ခိုက်သွားတာပါ”လို့ ဒေသခံတစ်ဦးက ပြောပါတယ်။

ဧပြီ ၇ရက်ကလည်း အသေခံဒရုန်းနှစ်စင်းနဲ့ ဒီပဲယင်းမြို့နယ် တနေရာကို လေကြောင်းတိုက်ခိုက်ခဲ့ပါသေးတယ်။

ဧပြီ ၆ ရက်ကတော့ ရွှေဘိုမြို့နယ်အနောက်ခြမ်းက ကျေးရွာတစ်ရွာမှာရှိတဲ့ စစ်ဘေးရှောင်စာသင်ကျောင်းကို စစ်တပ်က ဂျက်ဖိုက်တာနှစ်စီးနဲ့ လေကြောင်းတိုက်ခိုက်ရာ စာသင်ပေးတဲ့ ဆရာတော်တစ်ပါး ပျံလွန်တော်မူပြီး ကလေးငယ်တွေပါ ထိခိုက်မှုရှိခဲ့ပါတယ်။

လက်ရှိမှာ စစ်ကောင်စီတပ်ဟာ စစ်ရေးနဲ့ မသက်ဆိုင်တဲ့ ဘာသာရေးအဆောက်အအုံတွေနဲ့ လူနေကျေးရွာတွေကို ဒရုန်းတွေ အသုံးပြုကာ ဆက်တိုက်တိုက်ခိုက်နေခြင်းကြောင့် တော်လှန်ပြည်သူများအနေနဲ့ စစ်ရေးအသိ၊ စစ်ရေးသတိဖြင့် အမြဲမပြတ် ဂရုပြုနေထိုင်ကြဖို့ တော်လှန်ရေး အင်အားစုတွေက တိုက်တွန်းနှိုးဆော်ထားပါတယ်။