လေးကေကော်မှာ စစ်ရှောင်ရသူ ထောင်နဲ့ချီရှိလာ၊ ကူညီကယ်ဆယ်ရေးပစ္စည်းတွေလိုအပ်နေ

လေးကေကော်မြို့သစ်မှာ KNU နဲ့စစ်ကောင်စီတပ်ဖွဲ့ဝင်တွေကြားဖြစ်ပွားတဲ့ တိုက်ပွဲကြောင့် စစ်ရှောင်ရသူဦးရေ များလာပြီး ကူညီကယ်ဆယ်ရေးပစ္စည်းတွေ လိုအပ်နေတယ်လို့သိရပါတယ်။

တိုက်ပွဲဟာ မနေ့က ဒီဇင်ဘာလ ၁၅ ရက်စတင်ပြီးဖြစ်ပွားနေကာ ဒီနေ့မှာလည်း ဆက်လက်ဖြစ်ပွားနေတယ်လို့ ဒေသခံတွေကပြောကြပါတယ်။

ဒါကြောင့် ဒေသခံတွေဟာ ဘေးလွတ်ရာကိုတိမ်းရှောင်နေရပြီး သူတို့တွေအတွက် အစားအသောက် ၊သောက်ရေနဲ့ အမိုးအကာတွေ အရေးတကြီးလိုအပ်နေတယ်လို့ ကူညီပေးနေတဲ့. ခရစ်ယာန်သင်းအုပ် ဆရာတစ်ဦးက ပြောပါတယ်။

တိုက်ပွဲတွေကြောင့် လေးကေကော်မြို့သစ်ပေါ်မှာ နေတဲ့ ဒေသခံတွေက အနီးပတ်ဝန်းကျင်ကကျေးရွာတွေ ၊တောတွေထဲကို ဝင်ပြေးကြရတဲ့အခြေအနေဖြစ်နေတာပါ။

Public Service Announcement

တိုက်ပွဲစဖြစ်တဲ့မနေ့က တင် တိမ်းရှောင်ရသူ ထောင်ကျော်ရှိခဲ့ပြီး ဆက်လက်များပြားလာနိုင်တယ်လို့လည်း ကူညီကယ်ဆယ်ရေးလုပ်ဆောင်နေတဲ့ ခရစ်ယာန်သင်းအုပ်က ပြောပါတယ်။

လက်ရှိမှာတော့ ဘေးလွတ်ရာ ဘာသာရေးအဆောက်အဦးတွေမှာ နေရာချထားပေးနေရတယ်လို့သိရပါတယ်။

စစ်ရှောင်တွေရဲ့ စားဝတ်နေရေးနဲ့ နေထိုင်ရေးအတွက် ကရင်နှစ်ခြင်းခရစ်ယာန်အသင်းတော် တာဝန်ရှိသူတွေက တာဝန်ယူစောင့်ရှောက်ပေးနရပြီး စစ်ရှောင်တွေ ပြန့်ကျဲနေလို့ လိုက်လံစုစည်းပြီး နေရာထိုင်ခင်းတွေ ချထားဆောင်ရွက်ပေးလျက်ရှိနေတယ်လို့ သိရပါတယ်။