ဟောမုဇ် ရေလက်ကြားဆီကို စစ်သင်္ဘောတွေ စေလွှတ်မယ်ဆိုရင် အကျိုးဆက်တွေက လှပမှာ မဟုတ်ဘူးလို့ အီရန်က ဗြိတိန်နဲ့ ပြင်သစ်တို့ကို သတိပေးခဲ့ပါတယ်။
ဥရောပ နိုင်ငံတွေ အနေနဲ့ စစ်သင်္ဘောတွေ ဖြန့်ကျက်စေပြီး အရှေ့အလယ်ပိုင်း ဒေသရဲ့ စစ်ရေးတင်းမာမှုကို ပိုပြီး ရှုပ်ထွေး ဆိုးရွားလာအောင် မလုပ်သင့်ဘူးလို့လည်း အီရန် ဒုတိယ နိုင်ငံခြားရေး ဝန်ကြီးက မေလ ၁၀ ရက်နေ့မှာ ပြောကြားခဲ့ပါတယ်။
ပြင်သစ်နဲ့ ဗြိတိန်တို့က အရှေ့အလယ်ပိုင်းဆီ စစ်သင်္ဘောတွေ စေလွှတ်ဖို့ စီစဉ်ခဲ့တဲ့နောက် အီရန်ဖက်က အခုလို ခြိမ်းခြောက်မှုဆန်ဆန် တုံ့ပြန်ခဲ့တာ ဖြစ်ပါတယ်။
အစ္စရေးနဲ့ အမေရိကန်တို့ရဲ့ ရန်လို တိုက်ခိုက်မှုတွေကို တုံ့ပြန်တဲ့ အနေနဲ့ အီရန်က ပိတ်ဆို့ထားတဲ့ ဟောမုဇ် ရေလက်ကြားထဲ ဝင်ရောက်လာမယ့် ဗြိတိန်နဲ့ ပြင်သစ် စစ်သင်္ဘောတွေဟာ ပြတ်သားပြီး ထိရောက်မြန်ဆန်တဲ့ တုံ့ပြန်မှုတွေကို ကြုံလာရလိမ့်မယ်လို့ အီရန် ဒုတိယ နိုင်ငံခြားရေးဝန်ကြီး ကာဇမ် ဂါရီဘာဘာဒီက ဆိုပါတယ်။
Public Service Announcement
ဗြိတိန် ကာကွယ်ရေး ဝန်ကြီးဌာနက တော်ဝင်ရေတပ်ရဲ့ HMS Dragon စစ်သင်္ဘောကို အရှေ့အလယ်ပိုင်း ဒေသဆီ ပို့ဆောင်လိုက်ကြောင်း ကြေညာပြီးတဲ့နောက် အီရန်က အခုလို သတိပေးခဲ့တာပါ။ အဲဒီ သင်္ဘောဟာ ဟောမုဇ် ရေလက်ကြား လုံခြုံရေးကို ကူညီ စောင့်ရှောက်မယ့် နိုင်ငံတကာ ပူးပေါင်းဆောင်ရွက်ရေး မစ်ရှင်မှာ ချိတ်ဆက်ဖွယ် ရှိပါတယ်။
ဒါပေမဲ့ ပြင်သစ် သမ္မတ အီမန်နျူရယ်လ် မာခရွန်နဲ့ ဗြိတိန် ဝန်ကြီးချုပ် ဆာကီရာ စတာမာတို့က အဲဒီလို လုံခြုံရေး မစ်ရှင်မျိုးဟာ အမေရိကန်နဲ့ အီရန်တို့ကြားက စစ်ပွဲ အဆုံးသတ်သွားပြီးမှ ဖြစ်လာနိုင်လိမ့်မယ်လို့လည်း ပြောကြားထားပါတယ်။ လောလောဆယ် အီရန်စစ်ပွဲက အပစ်အခတ် ရပ်စဲထားပေမယ့် တရားဝင် အဆုံးသတ်နိုင်ဖို့ အတွက်တော့ အမေရိကန်နဲ့ အီရန်တို့ကြားက ညှိနှိုင်းမှုတွေ အဆင်မပြေသေးပါဘူး။
ရေလမ်းကြောင်းတွေကို ကာကွယ်ဖို့ပါဆိုတဲ့ အကြောင်းပြချက်နဲ့ ဟောမုဇ် တဝိုက်မှာ ဖျက်သင်္ဘောတွေ ထပ်ပြီး ဖြန့်ကျက်လာမယ့် လုပ်ရပ်တိုင်းဟာ လက်ရှိ ပဋိပက္ခကို ပိုပြီး အရှိန်မြင့်လာစေမှာ ဖြစ်ကြောင်း၊ ဗြိတိန်၊ ပြင်သစ်၊ ဒါမှမဟုတ် ဘယ်နိုင်ငံဆီကပဲဖြစ်ဖြစ် ရောက်လာမယ့် စစ်သင်္ဘောတွေဟာ အမေရိကန်ရဲ့ လက်ရှိ တရားလက်မဲ့ ကိစ္စတွေမှာ ပူးပေါင်း ပါဝင်မယ်ဆိုရင် အီရန် လက်နက်ကိုင် တပ်တွေရဲ့ ပြတ်သားပြီး မြန်ဆန်တဲ့ တုံ့ပြန်မှုကို ကြုံတွေ့ရမှာဖြစ်ကြောင်း ဂါရီဘာဘာဒီက လူမှုကွန်ရက်ပေါ်မှာ ရေးသားထားခဲ့ပါတယ်။
ဒါကြောင့် သက်ဆိုင်ရာ နိုင်ငံတွေ အနေနဲ့ အခြေအနေတွေကို ပိုရှုပ်ထွေးအောင် မလုပ်ကြဖို့ အီရန်က အကြံပြုလိုကြောင်းလည်း သူက ဆိုပါတယ်။
လက်ရှိမှာတော့ အီရန်က ဟောမုဇ် ရေလက်ကြားကို ပိတ်ထားပြီး ဟောမုဇ်ရဲ့အထွက် အိုမန်ပင်လယ်ကွေ့မှာတော့ အီရန် ရေယာဉ်တွေ ဖြတ်သန်းမှုကို တားဆီးဖို့ အမေရိကန် ရေတပ်က ဖြန့်ကျက် နေရာယူထားပါတယ်။
ဟောမုဇ် ရေလက်ကြားဟာ နေ့စဉ် ကမ္ဘာ့ရေနံနဲ့ ဓာတ်ငွေ့ တင်ပို့မှု စုစုပေါင်း ငါးပုံတစ်ပုံလောက် ဖြတ်သန်းနေတဲ့ မဟာဗျူဟာ ရေလမ်းကြောင်း တစ်ခုပါ။ ဟောမုဇ် ရေလက်ကြား ပိတ်ဆို့ခံထားရခြင်းက နိုင်ငံတကာမှာ ရေနံနဲ့ လောင်စာဆီ စျေးတွေ မြင့်တက်လာစေပြီး စွမ်းအင်အကျပ်အတည်း တစ်ခုကို ဖြစ်ပေါ်လာစေခဲ့ပါတယ်။
ကိုးကား: Independent
