မင်းအောင်လှိုင် တောင်ငူလာပြီးနောက် ဗိုလ်ချုပ်ရုပ်ထုဖယ်ရှားခံရ

ဇွန် ၁၀၊ ၂၀၂၆။ဒလပန်း/People’s Spring

ပဲခူးတိုင်း၊ တောင်ငူမြို့ကိုအာဏာသိမ်းခေါင်း​ဆောင် မင်းအောင်လှိုင်လာပြီးနောက် ဗိုလ်ချုပ်အောင်ဆန်းရုပ်ထု ဖယ်ရှားခံခဲ့ရတယ်လို့ ဒေသခံတွေက ပြောပါတယ်။

ဒီ​နေ့(ဇွန် ၁၀)မနက်အစောပိုင်းမှာတောင်ငူမြို့ ၁၇ရပ်ကွက်၊ကန်လမ်းအတက်က ဗိုလ်ချုပ်အောင်ဆန်းရုပ်ထုကို စစ်အုပ်စုက ဖယ်ရှားခဲ့တာလည်းဖြစ်ပါတယ်။

“ညကရှိသေးတယ်။ မနက်မှာမရှိတော့တာ။ဘယ်ရောက်သွားလဲတော့မသိဘူး “လို့ ဒေသခံတစ်ဦးကပြောပါတယ်။

Public Service Announcement

ပြီးခဲ့တဲ့ ဇွန်လ ၆ ရက်မှာ အာဏာသိမ်း​ခေါင်း​​ဆောင်မင်းအောင်လှိုင် တောင်ငူမြို့ကို လာရောက်ခဲ့ပြီး ​၄ ရက်အကြာမှာဗိုလ်ချုပ်အောင်ဆန်းရုပ်ထုဖယ်ရှားခံခဲ့ရတာလည်းဖြစ်ပါတယ်။

“၆ရက်နေ့ကမအလလာတယ်။သူ့ကျွန်သဘောက်ကောင်ရဲဝင်းဦးပါလာတယ်။သူ့မိန်းမ ကြူကြူလည်းပါတယ်။ဗိုလ်ချုပ်သမီးကို ဖမ်းထားပြီးဗိုလ်ချုပ်ကို သေချာမကြည့်ရဲလို့ ဖျက်ခိုင်းတာဖြစ်မယ်”လို့တောင်ငူမြို့ခံ အမျိုးသမီးတစ်ဦးက ပြောပါတယ်။

တောင်ငူမြို့ ၁၇ ရပ်ကွက်၊ ကန်လမ်းအတက်က ဗိုလ်ချုပ်အောင်ဆန်းရုပ်ထုကို ၁၀၁ နှစ်ပြည့် ဗိုလ်ချုပ်အောင်ဆန်းမွေးနေ့ အထိမ်းအမှတ်အဖြစ် ၂၀၁၆ ခုနှစ်မှာ ဖွင့်လှစ်ခဲ့တာဖြစ်ပါတယ်။ဗိုလ်ချုပ်အောင်ဆန်း ​ကြေးရုပ်ဟာ အမြင့် ၁၅ပေရှိပါတယ်။

စစ်တပ်က အာဏာသိမ်းပြီးနောက် စစ်တပ်နဲ့ စစ်တပ်လက်အောက်ခံအဖွဲ့အစည်းတွေဟာ နိုင်ငံတဝန်းက ဗိုလ်ချုပ်အောင်ဆန်းရုပ်ထုတချို့ကို ဖြိုချဖျက်ဆီးတာတွေ လုပ်လာခဲ့တာဖြစ်တယ်။

၂၀၂၅၊ ဩဂုတ်လ ၇ ရက်မှာလည်း ပဲခူးမြို့လယ်ခေါင်က ဗိုလ်ချုပ်အောင်ဆန်းကြေးရုပ်ထုကို စစ်တပ်က ဖယ်ရှားဖျက်ဆီးတာတွေလုပ်ဆောင်ခဲ့ပါတယ်။

ဇွန်လ ၆ရက်နေ့မှာအာဏာသိမ်းခေါင်းဆောင် မင်းအောင်လှိုင် နဲ့ တပ်ချုပ်ဗိုလ်ချုပ်ကြီးရဲဝင်းဦးတို့ ​တောင်ငူမြို့ကို လာရောက်ခဲ့ပါတယ်။အဲ့ဒီ‌နေ့ညနေပိုင်းမှာမင်းအောင်လှိုင်သွားမယ်လို့ သတင်းရတဲ့ တောင်ငူ မဆရ (၃) စစ်ဆေးရုံ နဲ့ ကေတုမတီလေဆိပ် ကို ၁၀၇ မမရှော့တိုက်ဒုန်း​တွေနဲ့ပစ်ခတ်တိုက်ခိုက်ခဲ့တယ်လို့ Brave Warriors For Myanmar -BWM အဖွဲ့က​ပြောပါတယ်။