ဇွန်-၂၄၊၂၀၂၆။People’s Spring
၂၀၂၆ ကမ္ဘာ့ဖလား အုပ်စု ဒုတိယပွဲစဥ်တွေ ယှဥ်ပြိုင်ပြီးချိန် မှာ ၂ ပွဲစလုံးနိုင်ပြီး ရမှတ် ၆ မှတ်ရကာ ၃၂ သင်းရှုံးထွက်အဆင့်ကိုလွတ်လွတ်ကျွတ်ကျွတ် တက်ရောက်နိုင်ခဲ့တဲ့အသင်း ၇ သင်းရှိပါတယ် ။
ပြိုင်ပွဲ ၁၃ ရက်မြောက်နေ့ နောက်ဆုံးပွဲစဥ်အဖြစ် ကိုလံဘီယာ နဲ့ ဒီအာကွန်ဂို အသင်းတို့ပွဲမှာ မူနောဇ် ရဲ့သွင်းဂိုးနဲ့ ကိုလံဘီယာက တစ်ဂိုး-ဂိုးမရှိနဲ့အနိုင်ရခဲ့ပါတယ်။ဒါကြောင့် ၂ပွဲ ကန် ၂ ပွဲလုံးနိုင်ပြီး ရမှတ် ၆ မှတ်နဲ့ နောက်တစ်ဆင့်တက်ရောက်သွားတာပါ ။ဒီရလဒ်ကြောင့် အုပ်စုပွဲ ၂ ပွဲ ကစားပြီးချိန်မှာ ကိုလံဘီယာက ရော်နယ်လ်ဒိုရဲ့ပေါ်တူဂီအသင်းထက်၂ မှတ်အသာနဲ့ အုပ်စုဇယားထိပ်ရောက်ခဲ့တာပါ ။
အုပ်စုနောက်ဆုံးပွဲမှာ ကိုလံဘီယာနဲ့ ပေါ်တူဂီထိပ်တိုက်တွေ့ပြီး အုပ်စုဗိုလ်နေရာအတွက် တိုက်ပွဲဝင်ကြရမှာပါ ။
Public Service Announcement
အုပ်စု ၁၂ စု ၊အသင်းပေါင်း ၄၈ သင်းယှဥ်ပြိုင်တဲ့ ပြိုင်ပွဲမှာ ပွဲစဥ် ၂ အပြီး ၂ ပွဲစလုံးနိုင် ရမှတ် ၆ မှတ်စီနဲ့ ရှုံးထွက်အဆင့်တက်ရောက်နိုင်တဲ့အသင်းတွေက အိမ်ရှင် မက္ကဆီကို ၊အမေရီကန် ၊ဂျာမနီ ၊ပြင်သစ် ၊နော်ဝေ ၊ အာဂျင်တီးနားနဲ့ကိုလံဘီယာတို့ဖြစ်ပါတယ်။ဒီအသင်းတွေက အုပ်စုနောက်ဆုံးပွဲ ဘယ်လိုရလဒ်ထွက်ထွက် ၃၂ သင်းရှုံးထွက်အဆင့်တက်ရောက်သွားပါပြီ ။
ဒါပေမယ့် အုပ်စုနောက်ဆုံးပွဲတွေဟာ အုပ်စုဗိုလ်နေရာအတွက် အဆုံးအဖြတ်ပေးမှာဖြစ်ပါတယ်။ပြင်သစ်နဲ့ နော်ဝေတို့က တစ်အုပ်စုတည်းဖြစ်ပေမယ့် ၂ ပွဲစီနိုင်ထားကြတာဖြစ်ပါတယ် ။
မနေ့ညကယှဥ်ပြိုင်တဲ့နာမည်ကြီး အဂ်လန်ကလည်း ဂါနာကိုသရေသာကစားနိုင်လို့ ရမှတ် ၄ မှတ်နဲ့ အုပ်စုကိုဦးဆောင်နေပါတယ် ။
ကနေဒါ ၊ဘရာဇီး ၊နယ်သာလန် ၊အီဂျစ် ၊ စပိန်၊အဂ်လန် တို့ကလည်း တစ်ပွဲနိုင် တစ်ပွဲသရေ ရမှတ် ၄ မှတ်စီ နဲ့ သက်ဆိုင်ရာအုပ်စုတွေကိုဦးဆောင်နေပြီး နောက်တဆင့်တက်ဖို့အခြေအနေကောင်းနေပါတယ် ။
အုပ်စု ၁၂ စုထဲက အုပ်စု ပထမ နဲ့ ဒုတိယအသင်း ၂ သင်းစီ စုစုပေါင်း ၃၂ သင်းအပြင် အုပ်စုတတိယအကောင်းဆုံး ၈ သင်းကိုပါနောက်တဆင့်တက်ခွင့်ရမှာဖြစ်လို့ ၄ မှတ်ရတဲ့အသင်းတွေကလည်း နောက်တဆင့်တက်ခွင့်ရဖို့သေချာသလောက်ဖြစ်နေတာပါ။ဒါအပြင် ၂ပွဲစီကစားပြီးချိန် တတိယရတဲ့အသင်းတွေဟာ ရမှတ်အများဆုံး ၃ မှတ်အထိပဲရယူထားနိုင်သေးတာတွေ့ရပါတယ် ။
အုပ်စုနောက်ဆုံးပွဲတွေအပြီး နောက်တဆင့်တက်ဖို့ဆုံးဖြတ်တဲ့အခါ ရမှတ်တူနေရင် ထိပ်တိုက်တွေ့ဆုံမှု (head to head)အသာရတာကို အဓိကထားဆုံးဖြတ်မှာဖြစ်ပြီး ဂိုးကွာချက်ကဒုတိယဦးစားပေးဖြစ်မှာဖြစ်ပါတယ်။
